Proverbios 27 - Bible in Tzotzil de Chenalhó with Deuterocanon

¹ Mu me xanop ti oy c'usi lec xu' chapas ta yoc'omale, yu'un mu xana' c'usi yich'oj tal li jun c'ac'al oc'ome.

² Mu me xaval atuc ti lec ac'oplale; yan boch'o ac'o yal ti ich'bilot ta muq'ue.

³ Li ton xchi'uc yi'e toj olic, pero li sc'ac'al yo'nton bol cristianoe ja' xjelov to yalal ta xcha'chopal.

⁴ Li ilinele toj tsots, li sc'ac'al o'ntonale ja' jsoquesvanej; toj vocol chcuch' cu'untic noxtoc li ti'-o'ntaele.

⁵ Ja' toj lec ti jamal chij'albat c'usi jmultique; ja' chopol me lec xa c'anbilutic yilele.

⁶ Ja' xloc' venta me chijyututic li boch'o lec jc'opan jba jchi'uctique; ja' altic me chists'uts'utic xa yilel li cajcontratique.

⁷ Li boch'o lec noj xch'ute mu'yuc stu yu'un li spom muc'ta pome; yan li boch'o oy vi'nal cha'ye, c'alal xa ta c'usi ch'a lec chi' cha'ay.

⁸ Li boch'o chjatov no'ox loq'uel ti bu ivoq'ue ja' jech chac c'u cha'al jcot mut ti chicta comel stase.

⁹ Li muil poxile toj xcuxet xa chca'itic yu'un; ja' jech toj xcuxet co'ntontic yu'un ti c'alal oy boch'o chisbijubtasutique.

¹⁰ Mu me xacomtsan li boch'o lec xac'opane xchi'uc li boch'o lec sc'opan sbaic xchi'uc atote. C'alal oy jvocoltique, ja' lec me ja' no'ox ta jc'opantic li boch'o nopol nacalutic jchi'uctique; ja' vocol me ja' chbat jc'opantic li jchi'iltic ta voq'uel ti nom to nacalique.

¹¹ Jnich'on, bijan me, jech xcuxet no'ox co'nton avu'un; jech xu' ta jtac'be li boch'o chopol chiyalbun jc'oplale.

¹² Li boch'o bijubtasbile chotquin li c'usi chopole, jech mu sc'an stic' sba te; yan li boch'o mu'yuc bije tstic' no'ox sba batel, jech te ta sta o svocol.

¹³ Li boch'o tstic' sba ta piarol yu'un yan cristianoe ich'bo sc'u'; li boch'o tsva'an sba ta sventa yil xchi'ile c'anbo prentail.

¹⁴ Li boch'o chbat sc'opan xchi'il ta ic'pulan ti x'avet no'ox c'otele ja' chc'ataj ta uts'intael ti jech ta spase.

¹⁵ Me jsa'c'op ants quic'ojtique, ja' jech chc'ot ta jtojoltic jech chac c'u cha'al ts'ujel ta yorail vo'olaltic.

¹⁶ Li boch'o tsc'an tspajese ja' co'ol jech chac c'u cha'al me tsc'an tspajes li iq'ue, o jech chac c'u cha'al me tsc'an tstsac ta sc'ob li aceitee.

¹⁷ Li taq'uine tsc'an juxbel ye ta taq'uin noxtoc; ja' no'ox jech ec li cristianoe ta ye cristiano xu' ta xbijub.

¹⁸ Li boch'o ta xchabi lec li higo te'e ta slo'be sat; ja' no'ox jech ec li boch'o lec sc'anoj yajvale ta sta ich'el ta muc'.

¹⁹ Li c'usi oy ta co'ntontique lec jna'tic, jech chac c'u cha'al lec xquil jsatic ta vo'e.

²⁰ Li yavil animaetic xchi'uc li c'atinbaque mu sta yo'ntonic ta ve'el; ja' jech li jsatique mu x'ech' yo'nton o ta sq'uelel li c'usi chile.

²¹ Li taq'uinetique ta c'oc' ta xvinaj me ja' saquil taq'uin, me ja' c'anal taq'uin; ja' no'ox jech ec li cristianoe ta sventa ich'el ta muc' chlic vinajuc c'u x'elan yo'nton.

²² Ac'o me solel chamaj jech chac c'u cha'al trigo li boch'o bole, mu ono'ox xloc' o li sbolil yo'ntone.

²³ Q'uelo me lec c'u x'elan li achijtaque; teteuc me ach'ulel achi'uc.

²⁴ Yu'un li jc'ulejaltique mu sbateluc osil te oy, jech noxtoc li ajvalile mu scotoluc jabil tiq'uil ta yabtel.

²⁵ C'alal ta xch'i tal li jobeltique, c'alal ta xyaxub tal li ts'i'laltique, xchi'uc c'alal chich' tsobel tal li ts'i'laltic ta vitsetique,

²⁶ lec xch'i o li avunin chijtaque, ja' te chata o ac'u' ta sventa li stsotsile; jech noxtoc ta sventa avunin tentsuntac chaman o avosil.

²⁷ Jech noxtoc ta ya'lel xchu' me'tentsunetic avu'un chata ave'elic achi'uc avajnil anich'nab, xchi'uc scotol li boch'otic te ch-abtejic avu'une.