Proverbios 26 - Bible in Tzotzil de Chenalhó with Deuterocanon

¹ Jech chac c'u cha'al mu snupin me chac' tayo ta yorail q'uepelaltique xchi'uc mu snupin chac' vo' ta yorail c'aojtique, ja' jech mu snupin me ich'bil ta muc' li bol cristianoe.

² Li j'ilc'ope mu xc'ot ta jtojoltic ti me muc ta jmulticuque, jech chac c'u cha'al mut, o xaval-eq'uen ti xvilet no'ox jelovel ti mu xluchi ta jtojoltique.

³ Li ca'e chich'be smelol ta torcio, li buroe chich'be smelol ta vozal; ja' no'ox jech ec li boch'o bole chich'be smelol ta nucul.

⁴ Mu me xanupultasbe slo'il li boch'o bole, yu'un naca me te xlic boliban ec.

⁵ Tac'bo sutel jech chac c'u cha'al tsc'an tac'bel sc'op li boch'o bole, yu'un jech mu snop ti lec bije.

⁶ Li boch'o tstacbe batel mantal jun bol vinique ja' jech chc'ot jech chac c'u cha'al boch'o tsboj yacan ti ja' no'ox tsa' svocol stuque.

⁷ Li coxoe mu xu' yu'un nat chanov ja' jech li bol cristianoe mu xu' yu'un chal li bic'tal lequil chanubtasele.

⁸ C'alal chich' ac'bel stanal li jimich'e, mu smeloluc me chich' chuquel lec li tone, ja' jech mu smeloluc me chich' ich'el ta muc' li boch'o bole.

⁹ Jech chac c'u cha'al jyacubel ti mu xa'ibe xc'uxul li ch'ix ch-och ta sbec'tale, ja' jech li bol cristianoe mu xa'ibe smelol li bic'tal lequil chanubtasele.

¹⁰ Li boch'o chic' ta abtel bol vinic, o me jcotcovil vinique ja' co'ol chac c'u cha'al j'ac'flecha ti ep boch'o chac'be svocole.

¹¹ Li bol cristiano ti te no'ox chcha'pasilan o sbol talele ja' jech chac c'u cha'al jcot ts'i' ti chcha'lo' yan velta xee.

¹² Mu'yuc bu xquiltic ti toj bij li boch'o chal ti oy lec sbijile; ja' xu' to jutuc li boch'o bole.

¹³ Ti c'u cha'al mu x'abtej o li boch'o ch'aje, jech chal: “Oy bolom snac'oj sba ta be; oy bolom chmalavan ta xoraltic”, xi.

¹⁴ Li boch'o ch'aj ti te no'ox xbalet ta svayabe ja' jech c'otem jech chac c'u cha'al macna ti te no'ox xvelet o ta stsaclebe.

¹⁵ Li boch'o toj ven ch'aje ja' no'ox lec cha'ay stiq'uel sc'ob ta sets'; puru mac'linel tsc'an, solel tic'bel ta ye tsc'an.

¹⁶ Li boch'o ch'aje tsnop ti ja' xjelov to sbijil jech chac c'u cha'al me oy vucub viniquetic lec bijique.

¹⁷ Me ta jtic' jbatic ta c'op ti ma'uc jventatique, xu' chlic sjol jech chac c'u cha'al jcot ts'i' me ta jnitbetic ta xchiquine.

^18-19 Li boch'o tslo'la xchi'il ti ts'acal chalbe ti slo'il no'oxe ja' jech chc'ot jech chac c'u cha'al jun jchuvaj ti chac' tsanajtic flecha ti chmilvan xchi'uque.

²⁰ Me mu'yuc boch'o toj ech'em xlo'ilaje, mu xlic c'op, jech chac c'u cha'al c'oc' ti te no'ox chtu'p me mu'yuc si'ile.

²¹ Li ac'ale lec stsan ta ora, li si'e chac' lec yac'alil; ja' no'ox jech li jsimaroniltique xu' ta ora tsliques c'op.

²² Li boch'o toj ech'em xlo'ilaje toj lec ya'yel li c'usi chale; chc'ot xa c'alal ta yut co'ntontic yu'un ya'yel.

²³ Me oy jun bin ti bonbil ta saquil taq'uine, toj lec xa c'upil sba yilel; ja' jech li boch'o chopol c'usi oy ta yo'ntone, toj lec xa ya'yel li c'usi chale.

²⁴ Li boch'o stsoq'uet yo'ntone mu xac' ta ilel ti c'alal chc'opoje, ac'o me toj chopol li c'usi tsnop ta yo'ntone.

²⁵ Me toj lec xasc'opanot yilele, mu me xach'un, yu'un puru chopol c'usi oy ta yo'nton.

²⁶ Ac'o me mu xac' ta ilel ti stsoq'uet yo'ntone, pero li xchopolile ta ono'ox xvinaj ta stojol scotol xchi'iltac.

²⁷ Li boch'o ta sjoc'be xch'enal xchi'ile ja' te ta x'och yalel stuc; li boch'o ta xbalch'un batel jbejuc tone ja' te net'bil ta xc'ot stuc.

²⁸ Li epalc'ope chijyac'butic jvocoltic; li lo'iletic ti toj lec xa ya'yele chijsocutic yu'un.