Proverbios 25 - Bible in Tzotzil de Chenalhó with Deuterocanon

Xcha'voc'al chanubtaseletic laj yal Salomón

¹ Li'i ja' bic'tal lequil chanubtaseletic yu'un li Salomone; ts'acal to ja' xa no'ox la xcha'loc'taic ta vun li yaj'abteltac Ezequías, ajvalil ta Judae.

² Ja' yich'el ta muc' Dios ti c'alal oy c'usi mucul smelol yu'une; ja' yich'el ta muc' ajvalil ti c'alal tsjambe lec smelole.

³ Li stayalil vinajele, li snatil yut banamile, li c'usitic tsnopic ajvaliletique, mu'yuc boch'o xu' tsna'.

⁴ Loq'uesbo yic'ubal li saquil taq'uine, jech xu' chich' lec tunesel.

⁵ Loq'ueso ta abtel ta stojol ajvalil li boch'o chopole, jech lec tuc' chbat yabtel li ajvalile.

⁶ Mu me muc'uc xapas aba ta stojol li ajvalile; mu me xbat chotlan yo' bu oy li banquilaletique.

⁷ Ja' lec malao no'ox iq'uel; ja' vocol me ja' no'ox ata q'uexlaltasel ta stojol li banquilaletique. Me oy c'usi laj avil lec ta asate,

⁸ mu me ta aniluc xavac' ta chapanel; mu me ts'acaluc to mu xa xana' c'usi chapas c'alal me layal xa'ox ta q'uexlal yu'un li yane.

⁹ Me oy boch'o ta stic'bot amule, xu' chapoj aba, pero mu me xavinajesbe c'usi mucul yu'un li yane.

¹⁰ Yu'un me oy boch'o laj ya'ye, xu' chayac'ot ta q'uexlal, jech te tsoc o ac'oplal, mu'yuc xa xpoxil o.

¹¹ Li lequil c'op chich' alel c'alal ja' yorail tsc'an alele ja' jech chc'ot jech chac c'u cha'al sloc'obal mantsano pasbil ta c'anal taq'uin xchi'uc ta saquil taq'uin.

¹² Li lequil taq'uiel chac' boch'o bije ja' jech chc'ot yu'un jech chac c'u cha'al lequil nats'il pasbil ta c'anal taq'uin li boch'o lec chc'ot ta yo'ntone.

¹³ Li lequil j'almantale ja' jech c'otem jech chac c'u cha'al siquil bot c'alal chcuch'tic ta yorail c'ux c'ac'ale yu'un toj xcuxet no'ox yo'nton yu'un li boch'otic chtacvanic batele, yu'un lec chpat yo'nton yu'un li yajvale.

¹⁴ Li boch'o chal oy c'usi chac', ti ts'acal mu'yuc c'usi chac' oe, ja' jech chac c'u cha'al toc, xchi'uc ic' ti mu'yuc chac' ya'lele.

¹⁵ Li smuc'ul co'ntontique tslamajes li ile; li c'unil c'ope tslamajes li c'usi chopol ta xc'ot ta pasele.

¹⁶ Me oy laj ata spom muc'ta pome, mu me toj epuc xalo'; mu me ja'uc ta scoj toj ep chalo' ti chlic axeta loq'uele.

¹⁷ Me oy chavu'lan li boch'o nopol nacalot achi'uque, mu me teuc no'ox xacujcun, naca me xlic ech'uc yo'nton avu'un, jech xu' chlic scontrainot.

¹⁸ Li boch'o jeche' no'ox ta snopbe smul xchi'ile ja' jech c'otem jech chac c'u cha'al martillo, cuchilo, xchi'uc flecha ti lec ts'ubts'ub sni'e.

¹⁹ Me ja' ta jpat co'ntontic yu'un boch'o lec sna' smaquel satil c'alal oy jvocoltique, ja' jech chijc'ot jech chac c'u cha'al boch'o c'asem yacan, xchi'uc boch'o lajemic ta chon stanal ye.

²⁰ Li boch'o xq'uejin no'ox ta q'ueojetic c'alal oy svocol xchi'ile co'ol chc'ot jech chac c'u cha'al ta jloc'betic sc'u' c'alal toj ech'em sique, xchi'uc c'alal chcac'betic ats'am ti bu tuch'eme.

²¹ Me ta xvi'naj li avajcontrae, ac'bo sve'el; me taquin yo'ntone, ac'bo vo' yuch'.

²² Jech chlic q'uexovuc avu'un; ja' Muc'ul Dios chayac'bot atojol.

²³ Li ic' chtal ta nortee ja' chic' tal li q'uinubale; li c'usi chopol chloc' ta quetique ja' chac' li sc'ac'al o'ntonale.

²⁴ Ja' xloc' venta me mu'yuc lec jnatic bu nacalutique; ja' altic toj lec jnatic me jsa'c'op ants quic'ojtique.

²⁵ Li lequil a'yej chtal ta nome ja' jech chac c'u cha'al siquil yoxo' chcuch'tic c'alal taquin co'ntontique.

²⁶ Li boch'o mu'yuc smule, me chlic xi'uc yu'un jun chopol vinique ja' jech chc'ot jech chac c'u cha'al jun nio' ti chlic tatubuque.

²⁷ Me toj ep ta jlo'tic spom muc'ta pome, mu lecuc ta sventa jbec'taltic; jech noxtoc mu lecuc ta jventatic me toj ech'em ich'bilutic ta muq'ue.

²⁸ Li boch'o mu sna' stsalel c'usi chopol tsc'an yo'ntone ja' jech c'otem jech chac c'u cha'al jun lum ti mu'yuc scoraltonale, ti mu vocoluc ch-och yajcontrae.