Proverbios 24 - Bible in Tzotzil de Chenalhó with Deuterocanon

-19-

¹ Mu me xati'-o'nta li boch'otic chopolique; mu me chacuc xbat achi'in ava'ay noxtoc,

² yu'un puru sa' c'op no'ox oy ta yo'ntonic, yu'un ja' no'ox chalilanic o ti tspasic c'usi chopole.

-20-

³ Ta sventa jbijiltic xu' lec chijbat junultic ta na; ta sventa lec jna'tic snopel lec chbat cu'untic.

⁴ Ta sventa sbijil jol co'ntontic, ta xnoj ta c'usitic lec li jnatique xchi'uc ta c'usitic tsots sc'oplal.

-21-

⁵ Ja' ven jtunel li boch'o bije; ja' mu sta jech stu li boch'o ja' no'ox tsots slomoe. Ja' tsots sc'oplal me oy c'usi jna'tique; ja' mu tsotsuc sc'oplal me ja' no'ox lec tsotsutique.

⁶ Yu'un c'alal chich' pasel c'ope, tsc'an lec bij li boch'o chchapane; c'alal chich' pasel canale, tsc'an ep li boch'o chchapanique.

-22-

⁷ Li boch'o mu'yuc sbijile mu sna' c'usi chal ti c'alal oy c'usi chich' chapanele, yu'un mu'yuc ta yo'nton li lequil bijubtasele.

-23-

⁸ Li boch'o ja' no'ox snopoj tspas o c'usi chopole, le'e toj chopol sjol, xi sc'oplal.

⁹ Li boch'o bole ja' no'ox oy ta yo'nton li mulile; li jna'levaneje mu'yuc lec ch-ilat yu'un li cristianoetique.

-24-

¹⁰ Me chchibaj avo'nton c'alal yorail oy avocole, yu'un mu'yuc stsatsal avo'nton.

-25-

¹¹ Pojo me li boch'o ta xa xich' milele; coltao li boch'o yu'un xa chcham yu'unique.

¹² Yu'un ac'o me ts'acal chaval ti muc xava'ye, pero sna'oj li boch'o yiloj c'usi oy ta co'ntontique; xotquin li boch'o tsq'uel c'u xij'elanutique; ja' chac'be stojol c'u x'elan yabtel li jujun cristianoe.

-26-

^13-14 Jnich'on, c'ano me li abijile yu'un ja' toj lec, jech chac c'u cha'al c'alal chalo' li spom muc'ta pome, toj lec chi' ta lo'el; ja' jech chava'ay c'alal me chata li abijile. Me chata li abijile, toj lec chabat; li c'usi chamala chatae, persa chc'ot ta pasel.

-27-

¹⁵ Mu me c'usi chopol xanop xapasbe li boch'o tuc' yo'ntone; mu me xbat avelc'anbe c'usi oy yu'un.

¹⁶ Ac'o me chyal ta lum vucubuc velta li boch'o tuc' yo'ntone, ta ono'ox stam sba liquel yan velta; yan li boch'o chopolique te chyalic o ta lum ta scoj svocolic.

-28-

¹⁷ C'alal chyal ta lum li avajcontrae, mu me xatse'inta; c'alal me tsbosi yacane, mu me xcuxetuc xa avo'nton.

¹⁸ Le'e mu lecuc chil li Muc'ul Diose; xu' vo'ot chlic joybijuc ta aba sc'ac'al yo'nton li Diose.

-29-

¹⁹ Mu me xa'ilin ta scoj li boch'o chopolique; mu me xti'etuc avo'nton ta stojol li jpasmuliletique.

²⁰ Yu'un li stuquique mu'yuc c'usi lec tstaic; j'ech'el chtu'p sc'oplalic o.

-30-

²¹ Jnich'on, ich'o me ta muc' li Muc'ul Diose, ich'o ta muc' noxtoc li ajvalile; mu me xbat achi'in li boch'o chcontrainvanique.

²² Yu'un ta anil no'ox xu' tsta svocolic; mu'yuc boch'o sna' c'u x'elan ch-ac'bat svocolic yu'un li Diose xchi'uc li ajvalile.

Yantic bijubtaseletic yu'unic li boch'o bijique

²³ Li'i ja' bijubtaseletic laj yalic noxtoc li boch'otic bijique: Me t'ujbil no'ox boch'o chich' ich'bel ta muc' ya'yej c'alal oy chapanele, mu lecuc.

²⁴ Li boch'o jech chalbe li boch'o oy smule: “Mu'yuc amul”, me xute, ta xchopolc'optaat yu'un li cristianoetique; mu'yuc lec ch-ilat o yu'un li muc'tic lume.

²⁵ Yan li boch'o chac'be stoj smule toj lec ch-ilat; lec ch-albat sc'oplal yu'un li cristianoetique.

²⁶ Li boch'o lec tstac' sutel lo'ile, ja' jech chc'ot jech chac c'u cha'al boch'o chich' ts'uts'bel yee.

²⁷ Chapano ba'yuc abolomal; abtejan lec ta avosil; ts'acal to xu' chava'an li anae.

²⁸ Mu me xava'an aba ta j'epalc'op testigo ta scontrainel li achi'ile; mu me xalo'lavan achi'uc li avee.

²⁹ Mu me jechuc xanop: “Ti c'u x'elan la spasbune ja' jech ta jpasbe ya'ay ec; ac'o spas ya'ay ec ti c'u x'elan la spasbune”, mu me xachi.

³⁰ C'alal lijelov ta yosil li boch'o ch'aje, c'alal lijelov ta ts'usubtic yu'un li boch'o mu sna' snopele,

³¹ puru ch'ix te ch'iem ta yosil laj quil; noj ta puru ch'ixtic li yosile, xchi'uc jinem scotol li tonetic ti setbil oe.

³² C'alal laj quil jeche, muc jch'ay ta co'nton; oy c'usi lec la jchan o.

³³ Me puru vayel chapase, me puru nicubajel chapase, me chamey no'ox ac'ob ta vayele,

³⁴ ta xtal stsacot li me'onale, chayac'bot lec avocol jech chac c'u cha'al jun j'elec' ti yich'oj tal lec yabtejebe.