Proverbios 23 - Bible in Tzotzil de Chenalhó with Deuterocanon

-6-

¹ Me oy chayic'ot ta ve'el li boch'o tsots yabtele, q'uelo me lec c'usi chapas ta stojol li boch'o te oye.

² Ac'o me solel chavi'naj xa, ts'ico to avo'nton.

³ Mu me xaslo'laot li smuil lequil ve'lile, yu'un naca me ja' no'ox chavich' lo'lael o.

-7-

⁴ Mu me xamil aba ta abtel sventa chac'an chapas ta jc'ulej; bijan me, mu me ja'uc xbat avo'nton o ta snopel.

⁵ Q'uelo lec avil li c'ulejalile, anil no'ox chbat; xco'laj no'ox xchi'uc ta xloc' xic' ya'yel; jech chac c'u cha'al xic ta xvil no'ox batel.

-8-

⁶ Mu me xachi'in ta ve'el ta xmexa li boch'o t'ut'e; mu me xpich'etuc avo'nton yu'un li lequil ve'lil oy yu'une,

⁷ yu'un ja' no'ox ta snop ti ep chlaj li c'usi oy yu'une. Ac'o me “la' ve'an, uch'an vo'”, xayutot, pero mu ta yutsiluc yo'nton.

⁸ Ta ts'acal chlic lo'ilajuc avo'nton, jech mu'yuc stu chc'ot ti toj lec laj ac'opane.

-9-

⁹ Mu me teuc yabinoj chalo'ilaj li boch'o bole, yu'un ja' no'ox ta sna'le li c'usi lec chavale.

-10-

¹⁰ Mu me xabat'ajesic li poco' ts'aquetic avu'unique; mu me xane'tbe yosil li me'on ololetique.

¹¹ Yu'un oy me Jc'opojel yu'unic, ja' li Boch'o lec xu' yu'une; ja' me chtal scontrainoxuc.

-11-

¹² Ac'o me lec ta avo'ntonic li chanubtasele; tuc'ulano me lec li bijubtasele.

-12-

¹³ Mu me xapajes aba ta staq'uiel li anich'one, yu'un me chavac'be nucule mu'yuc ta xcham o.

¹⁴ Yu'un me chavac'be nucule ja' sventa mu xch'ay batel.

-13-

¹⁵ Jnich'on, me lec bij chabate, lec jun co'nton avu'un.

¹⁶ Bats'i xcuxet no'ox jol co'nton avu'un, me puru tuc' c'usitic chloc' ta avee.

-14-

¹⁷ Mu me xati'-o'nta li jpasmuliletique; ja' no'ox xavich' ta muc' scotol c'ac'al li Muc'ul Diose.

¹⁸ Jech jbel sc'oplal chata li c'usi chamalae; li c'usi sc'oplal chatae ta persa chc'ot ta pasel.

-15-

¹⁹ Jnich'on, a'yo me lec ava'ay, jech chabijub; ja' me xatam batel li lequil bee.

²⁰ Mu me xachi'in li jyacubeletique xchi'uc li boch'o mu xpaj yo'ntonic ta ve'ele.

²¹ Yu'un li jyacubeletic xchi'uc li boch'o c'usiuc no'ox tstun slajesique tspasic ta me'on; li boch'otic ch'ajique solel pac' noch sc'u' spoc' tslapic.

-16-

²² Ch'uno me c'usi chayalbot li atote yu'un xnich'onot; mu me xabaj ame' ti c'alal me'el xae.

²³ C'ano me li bijubtasel, li chanubtasel, xchi'uc li tojobtasele; oyuc me ta avo'nton chasa'.

²⁴ Li totil ti lec tuc' yo'nton xnich'one xcuxet no'ox yo'nton; li boch'o toj lec bij xnich'one jun no'ox yo'nton yu'un.

²⁵ Alab nich'nabetic, ac'beic xcuxetel yo'nton li atot ame'ique; cuxetuc no'ox yo'nton avu'unic li boch'o la svoq'uesoxuc laj yayintasoxuque.

-17-

²⁶ Jnich'on, ac'o lec avo'nton ta jtojol; ja' q'uelo lec avil li c'usi ta jpase.

²⁷ Yu'un li jmulavil antse ja' jech chac c'u cha'al natil xab; li yan antse ja' jech chac c'u cha'al pozo ti toj lots'ole.

²⁸ Ta sa' c'u x'elan chislo'lautic jech chac c'u cha'al jun j'elec', jech ep viniquetic chch'ayic o batel yu'un.

-18-

²⁹ ¿Boch'o ti tsta ep svocole? ¿Boch'o ti abul sbae? ¿Boch'o ti puru c'op no'ox tsta, ti x'oc'olet no'oxe? ¿Boch'o ti ta jech no'ox tuch'ultic sbae? ¿Boch'o ti chacbejanic no'ox sbec' sate?

³⁰ Ja' li boch'o mu spajes sba ta uch' poxe, ti te ono'ox tsa'ilan o li c'usitic chac' yacubele.

³¹ Mu me xaslo'laot li c'usitic chac' yacubele; mu me xpich'aj avo'nton ti lec xa c'ant'ojan, ti lec xa st'islajet c'alal lechel ta bise, ti mu xa vocoluc chyal ta uch'el yilele.

³² Yu'un ta ts'acal ta jta ep jvocoltic yu'un, ja' jech chac c'u cha'al c'alal tsti'utic jcot jti'val chon.

³³ Toj yan sba c'usitic chlic aval yu'un, jech chlic anop, chlic aval c'usitic chopol.

³⁴ Xco'laj xa xchi'uc cajalot ta barco chava'ay ti c'alal xyuc'lajet li nabe; xco'laj xa xchi'uc luchulot ta sni' ste'el barco chava'ay.

³⁵ Ts'acal jech chlic aval: “La smajicun pero mu'yuc c'ux xca'ay; laj yac'bicun nucul pero muc xca'ay, pero icux xa co'nton, chbat jsa' yan velta li poxe”, xachi.