Proverbios 22 - Bible in Tzotzil de Chenalhó with Deuterocanon

¹ Ja' toj jun yutsil me lec jc'oplaltique; ja' altic me ja' no'ox ep jc'ulejaltique, me ja' no'ox oy ep c'anal taq'uin, saquil taq'uin cu'untique.

² Li jc'ulej xchi'uc li me'one co'olic no'ox ta xchibalic, yu'un co'ol pasbilic yu'un li Muc'ul Diose.

³ Li boch'o bije ta xil li c'usi xi'bal sbae, jech mu xbat stic' sba te; yan li boch'o muc bijuque tstic' no'ox sba batel, jech te ta sta o svocol.

⁴ Me chquich'tic lec ta muc' li Muc'ul Diose, me biq'uit chcac' jbatic ta stojole, oy c'usi lec ta jtatic; ta jta jc'ulejaltic, ich'el ta muc', xchi'uc jcuxlejaltic li' ta banamil.

⁵ Li boch'otic chopolique ta puru ch'ixtic, ta puru chuculaltic bu chanovic; yan li boch'o tsq'uel sba leque tsvoc' sba, mu xbat te.

⁶ Chanubtasic lec avalab anich'nabic ti bu beal tsc'an tstam batele, jech mu scomtsanic o ti c'alal mol me'elic xae.

⁷ Li me'onetique ja' yajvalic chc'ot li jc'uleje; li jq'uextaq'uinetique mozoinbilic chc'ot yu'un boch'o chac' ta q'uexel staq'uine.

⁸ Li boch'o tsts'un c'usi chopole ja' ta sc'aj li c'usi chopol la sts'une; li stsatsal ti la spas o c'usi chopole ja' ta xmilat o yu'un.

⁹ Li boch'o toj abul sba chil xchi'ile, me chac'be sve'el li me'onetique, ta sta slequilal.

¹⁰ Taco loq'uel ta atojolic li jtoybae, jech ta xlam li c'usi chopole, jech mu'yuc xa c'op, mu'yuc xa chopolc'optael.

¹¹ Li boch'o tuc' yo'ntone xchi'uc li boch'o lec no'ox xc'opoje lec chc'anat yu'un li ajvalile.

¹² Li Muc'ul Diose chchabibe lec c'usi tsnop li boch'o bijique; tsmacbe ta be c'usi tsnopic li jlo'lavanejetique.

¹³ Li boch'o ch'aje jech chal: “Mu xu' chiloc', yu'un te oy ta xoral jcot león chismilun”, xi.

¹⁴ Li slo'il jmulavil antse ja' jech chac c'u cha'al natil xab; ja' te chbaj ochel li boch'o chopol ilbil yu'un Muc'ul Diose.

¹⁵ Ja' stalel oy sbolil yo'ntonic li ololetique, pero me ta xich' tojobtasel ta nucule, ta xnamaj loq'uel li sbolil yo'ntonique.

¹⁶ Li boch'o chuts'inta me'on ta sventa chepajes c'usi oy yu'une, o me ta sventa tsq'uelanbe yan jc'uleje, ta jbel sc'oplal tspas o ta me'on.

Lajuneb xcha'vinic (30) bijubtaseletic

¹⁷ Ts'e'ano lec achiquin, a'yo lec c'usi chal li boch'o bijique; ac'o lec avo'nton ta ya'yel li bijubtasel chacalbote.

¹⁸ Yu'un toj jun yutsil me chachabi lec ta avo'ntone, jech chapalot sventa xu' chloq'uilan o ta ave.

¹⁹ Chacac'bot lec ana' li' ta ora, yu'un jech xu' chapat lec avo'nton ta stojol li Muc'ul Diose.

²⁰ Laj xa jts'ibabot lajuneb xcha'vinic (30) ta voc' lo'iletic, yich'oj lequil tojobtasel xchi'uc bijubtasel;

²¹ yu'un jech chlic ana' c'usi tuc', xchi'uc c'usi melel, xchi'uc jech lec xana' c'usi lec chatac' me oy c'usi chajac'bate.

-1-

²² Mu me xapojbe c'usi oy yu'un me'on ta sventa ti abul no'ox sba chavile; mu me xavuts'inta ta stojol jchapanvanejetic li boch'o mu xu' yu'un tspoj sbae.

²³ Yu'un ja' me stuc Muc'ul Diose ta spoj; ta me xac'be svocol ec li boch'o ch-uts'intavane.

-2-

²⁴ Mu me xachi'in li boch'o toj ech'em x'iline; mu me xapas ta co'ol avo'nton achi'uc li boch'o toj ech'em sa' c'ope.

²⁵ Naca me te achanbe stalel, jech te chucul chacom o yu'un.

-3-

²⁶ Mu me xava'an aba ta xq'uexel c'usi tsc'an yan cristianoetic,

²⁷ yu'un me muc xtoj avu'une xu' chaspojboxuc batel c'alal ta avayab.

-4-

²⁸ Mu me xabat'ajesic batel li sts'aquiltac avosilic ti yac'ojic ono'ox comel jmoltot jyame'tic ta vo'one.

-5-

²⁹ Li boch'o toj lec yabtele ja' ch-ic'at ta abtel yu'un li ajvaliletique; muc teuc no'ox ch-abtej ta stojol li boch'o tojol vinic no'oxe.