Proverbios 21 - Bible in Tzotzil de Chenalhó with Deuterocanon

¹ Li Muc'ul Diose ja' tspasbe ta mantal yo'nton li ajvalile jech chac c'u cha'al tsbeiltas batel ta sbe li uc'umetique; ti c'u x'elan tsc'an yo'nton stuc li Muc'ul Diose ja' jech tspas.

² Li cristianoetique tsnop ti lec scotol c'usi tspasique, pero ja' stuc Muc'ul Dios chal me lec, me mu lecuc.

³ Me ja' ta jpastic c'usi lec c'usi tuq'ue, ja' toj lec chil li Muc'ul Diose; ja' mu sta jech slequil chil li smoton chich' milbele.

⁴ Li jtoyba satile, li jtoyba o'ntonale, li boch'o chopol yo'ntonique ja' mulil.

⁵ Li c'usi chich' chapanel ti lec nopbile lec chbat; yan me vovil pasbil no'ox ta anile mu'yuc stu chc'ot.

⁶ Li jc'ulejaltic ta jtatic ta sventa lo'lavaneje ta anil no'ox ta sac ch'ay jech chac c'u cha'al ch'ayil, ja' no'ox c'u cha'al jsa' jlajel jchameltic o.

⁷ Li boch'o chopolique ja' no'ox te chajvalinic o li xchopolilique, yu'un ja' mu sc'an spasic li c'usitic tuq'ue.

⁸ Li c'usi tspasic boch'o chopolique mu'yuc stuq'uil, mu'yuc smelol; yan li boch'o tuc' yo'ntonique tuc' c'usitic tspasic.

⁹ Ja' xloc' venta me mu'yuc jnatic bu nacalutique; ja' altic toj lec jnatic me jsa'c'op ants quic'ojtique.

¹⁰ Li boch'o chopolique ja' no'ox tsc'an tspasic o li c'usi chopole; me jutuc mu'yuc c'ux ta yo'nton xchi'ilic.

¹¹ C'alal chich' ac'bel stoj smul li jtoybae, te chlic bijubuc li boch'o mu'yuc sbijile; c'alal chich' taq'uiel li boch'o bije, oy c'usi lec chlic xchan.

¹² Li Dios ti tuc' yo'ntone tsq'uel c'usitic tspasic ta snailalic li boch'otic chopolique; j'ech'el chac' soquicuc o batel ta scoj xchopolilic.

¹³ Li boch'o mu stuc'ulanbe sc'op me'one ja' no'ox jech mu xtuc'ulanbat sc'op ec ti c'alal tsc'an vocole.

¹⁴ Li matanale xu' chlecub o'ntonal yu'un; li c'usi chich' q'uelanele xu' tspajes sc'ac'al o'ntonal.

¹⁵ C'alal oy lec chapanele, ja' sventa xcuxet no'ox yo'nton li boch'o tuc' yo'ntone; yan li boch'o chopol c'usi tspase ja' no'ox sventa xi'el cha'ay.

¹⁶ Li boch'o ta scomtsan spasel c'usi leque ja' xchi'il chc'ot li boch'otic chamenique.

¹⁷ Li boch'o chbat yo'nton yu'un c'usiuc no'ox lec chile mu xtoy o; li boch'o puru uch' pox, puru smanel muil poxil batem ta yo'ntone tspas ta me'on.

¹⁸ Li boch'o tuc' yo'ntone mu'yuc chich' vocol, yu'un ja' xq'uexol chc'ot li boch'o chopole; li boch'o lec c'usi tspase ja' xq'uexol chc'ot li boch'o chopol c'usi tspase.

¹⁹ Ja' xu' no'ox me jtuctic nacalutic ta xocol banamile; ja' vocol me jsa'c'op, me simarón ants quic'ojtique.

²⁰ Li boch'o bije oy ep c'usitic oy yu'un, xchi'uc oy ep sc'ulejal ta sna; yan li boch'o mu bijuque jech no'ox tsvontol lajes scotol li c'usi oy yu'une.

²¹ Li boch'o tspasilan o c'usi lec xchi'uc chc'uxubinvan oe lec chbat, tsta xcuxetel yo'nton, xchi'uc tsta ich'el ta muc'.

²² Li boch'o bije sna' c'usi chut li lum ti lec chabibile, jech mu'yuc xa stsatsal chcom o ti lec to'ox spatoj yo'ntonic yu'une.

²³ Li boch'o tspajes yee ja' sventa chc'uxubin sba, jech mu sta svocol.

²⁴ Li boch'o muc' no'ox yac'oj sba, ti jeloven no'oxe, ti ja' no'ox tspas li c'usi oy ta yo'nton stuque, “jtoyba”, xi sbi.

²⁵ Li ch'aje te chmilat yu'un li c'usi tsc'an yo'ntone, yu'un mu xchi cha'ay abtel,

²⁶ jech scotol no'ox c'ac'al te xpich'et o yo'nton; pero li boch'o tuc' yo'ntone mu xlaj cha'ay chac' li c'usi oy yu'une.

²⁷ Li smoton Dios tsmilic boch'o chopol yo'ntonique mu'yuc stu chil li Muc'ul Diose; ¡c'u to x'elan chopol chil li boch'o ta xchopolil yo'nton chaq'uique!

²⁸ Li j'epalc'op testigoe mu'yuc stu ch-ilat; yan li boch'o cha'ibe lec smelole oy stu li c'usi chale.

²⁹ Li boch'o tuc' yo'ntone ta melel lec tsnop li c'usi tspase; yan li boch'o chopole ja' no'ox chac' ta ilel ti lec jun yo'nton yilele.

³⁰ Ta stojol Muc'ul Diose mu'yuc stu li jbijiltique, li c'usi lec jna'tique, xchi'uc ti lec jna' xijlo'ilaje.

³¹ Li ca'e lec chich' chapanel batel sventa chbat ta pasc'op, pero ja' stuc Muc'ul Dios chac' li boch'o xu' tspas canale.