Proverbios 20 - Bible in Tzotzil de Chenalhó with Deuterocanon

¹ Li poxe chac' jtoy jbatic; li c'usi tsotsic ta uch'ele chvovij joltic yu'un; li boch'o batem yo'nton yu'un poxe muc bijuc.

² C'alal ch-ilin li ajvalile ja' jech chac c'u cha'al jcot ch'ium león ti xlaquet no'oxe; li boch'o tsa'be sc'ac'al yo'ntone ja' chac' sba ta vocol stuc.

³ Li boch'o tscomtsan sa' c'ope ja' sventa yich'el ta muc'; li bol cristianoetique ja' no'ox oy ta yo'ntonic li sa' c'ope.

⁴ Li boch'o ch'aje mu'yuc ta yo'nton yabtel ti c'alal yorail abtele, pero c'alal yorail c'aoje, xlaj xa yu'un xc'aoj ec, pero mu'yuc c'usi sc'aj.

⁵ Li c'usi tsnop ta yo'nton cristianoe ja' jech chac c'u cha'al natil vo' ti mu xquilbetic xchaque, pero li boch'o bije sna' sjots'ol jaq'uel.

⁶ Ep boch'otic chalic ti lec yo'ntonique, pero ¿me oy bu ta jtatic ti bats'i tuc' ta melele?

⁷ Li boch'o tuc' yo'ntone ja' tspas li c'usi tuq'ue, jech toj lec chbat ta ts'acal li xnich'nabe.

⁸ C'alal chchoti ta xchotleb li lequil ajvalile, ta sventa no'ox c'u x'elan tsq'uel osil ta xi' loq'uel yu'un li c'usi chopole.

⁹ ¿Me oy boch'o xu' chal: “Vu'une tuq'uiben xa co'nton, me jutuc mu'yuc xa jmul”, ti xie?

¹⁰ C'usiuc no'ox chich' bisel ti mu ts'acaluque, chopol chil li Muc'ul Diose.

¹¹ Li jun quereme xu' chich' otquinel ta sventa c'usitic tspas, me lec me mu lecuc stalel.

¹² Li jchiquintic sventa chca'itic c'ope xchi'uc li jsatic sventa chquiltic o osile ja' la spas stuc li Muc'ul Diose.

¹³ Mu me puru vayeluc no'ox xapas, me mo'oje chapas ta me'on; vic'o lec asat, jech chata ave'el.

¹⁴ “Chopol, mu'yuc lec”, xi li jmanulajele, pero c'alal chloc' batele, xcuxet xa yo'nton yu'un toj lec li c'usi la sta batele.

¹⁵ Ja' toj lec li boch'o ta sventa sbijil chc'opoje; ja' mu sta jech slequil li c'anal taq'uin xchi'uc li tonetic ti lec c'upilic sbae.

¹⁶ Li boch'o ta stic' sba ta piarol yu'un yan cristianoe pojbo sc'u'; ja' ac'o comuc o ta prentail.

¹⁷ Li cristianoe xco'laj xa xchi'uc lequil ve'lil cha'ay li c'usi tsta ta sventa lo'lavaneje, pero ta ts'acal xco'laj xchi'uc xixib ton chc'ot ta ye.

¹⁸ Li c'usi ta jnoptique ta xc'ot ta pasel ti me lec nopbile; li pleitoe xu' cu'untic ti me lec chapanbile.

¹⁹ Li boch'o toj ech'em xlo'ilaje mu sna' snaq'uel li c'usi chapanbil ta mucule; ja' lec mu me xachi'in li boch'o xpuquet no'ox ta lo'ile.

²⁰ Li boch'o ta xchopolc'opta stot sme'e ta xcham jech chac c'u cha'al chtu'p luz ta ic' osil.

²¹ Me ta anil no'ox ta jtatic c'usi oy cu'untique, ts'acal chvinaj ti mu'yuc yich'oj bendicione.

²² Mu me xaval ti vo'ot chapac ac'oplal atuque; malao c'u x'elan chascoltaot stuc li Muc'ul Diose.

²³ Li Muc'ul Diose chopol chil li sbisol ti mu'yuc ts'acale; mu'yuc lec chil noxtoc li kilo ti mu'yuc ts'acale.

²⁴ Li Muc'ul Diose ja' oy ta sventa jujujet yacan chanov li cristianoetique; ¿me oy boch'o xu' tsna' stuc li c'usi chc'ot ta pasel ta stojole?

²⁵ Toj xi'bal sba li boch'o ta anil no'ox oy c'usi chal ta stojol Diose, yu'un xu' ts'acal chlic snop ti manchuc la spas jeche.

²⁶ Li ajvalil ti lec bije ta sloq'ues ta stojol li boch'o chopolique, ta snet' lec comel ta yacan.

²⁷ Li sbijil jol co'ntontique ja' sluz Muc'ul Dios yac'ojbutic, ja' sventa chac' jna'tic li c'usi oy ta yut co'ntontique.

²⁸ Me ja' oy ta yo'nton c'uxubinvanej xchi'uc c'usi melel li ajvalile, lec jun yo'nton te chotol o ta xchotleb.

²⁹ Li stoyobbail queremetique ja' li stsatsalique; li yich'el ta muc' moletique ja' li saquil sjolique.

³⁰ Li nucule ja' xpoxil li c'usi chopole; li majele ja' chistuq'uibtasbutic co'ntontic.