Proverbios 2 - Bible in Tzotzil de Chenalhó with Deuterocanon

Sc'oplal c'usi ta jtatic yu'un li bijubtasele

¹ Jnich'on, me chavich' ta muc' li c'usi chcale, me chachabi ta avo'nton li jmantaltaque,

² me chavac' lec achiquin ta sventa li bijubtasele, me chavac' lec ta avo'nton li tojobtasele,

³ me xavocolet ta sc'anel li abijile, me xa'avet ta sc'anel li lequil chanubtasele,

⁴ me xajotet ta sa'el jech chac c'u cha'al chasa' saquil taq'uine, me avac'ojbe yipal sa'el jech chac c'u cha'al chasa' c'ulejalile,

⁵ chlic ana' c'u x'elan ta ich'el ta muc' li Muc'ul Diose, chlic avotquin batel c'usi tsc'an li Diose.

⁶ Yu'un li Muc'ul Diose ja' chijyac'butic li jbijiltique; ja' chloc' tal ta ye stuc li bijubtasel xchi'uc li c'usi tsc'an ta xcotquintic batele.

⁷ Ja' chac'be lequil bijubtasel li boch'otic tuc' c'usi tspasique; ja' chchabi li boch'otic tuc' yo'ntonique.

⁸ Ja' sventainojbe sbe li boch'otic yich'oj sjam smelolique; ja' ta xchabibe sbe xanebic li boch'otic tuc' yo'ntonique.

⁹ Jech noxtoc chlic ana' c'usi lec, c'usi tuc', c'usi melel, jech chana' scotol c'usi lec ta pasel.

¹⁰ C'alal chabijub leque; chava'ay lec c'u yutsil li bijubele.

¹¹ Li tojobtasele te oy o sat ta atojol; li bijubtasele ja' chaxchabiot.

¹² Ja' chaspajesot jech mu xabat ta chopol be. Mu xac' batan ta stojol li boch'otic chopol c'usitic chalique,

¹³ ti scomtsanojic li tuq'uil bee, ti chanovic ta sbelal ic'al osile,

¹⁴ ti xcuxet no'ox yo'nton tspasic c'usi chopole, ti stsobetic no'ox ta spasel li xchopol talelique,

¹⁵ ti ja' stamojic li be ti lucul-c'amale, ti ja' xa yictaojic comel li tuq'uil bee.

¹⁶ Jech noxtoc ja' ta scoltaot ta sventa li jmulavil antse, ti ja' no'ox chlo'lavan ta sventa c'usi chale,

¹⁷ ti ja' sbajoj li smalal ta squeremal stsebalic to'oxe, ti ch'ayem xa ta yo'nton li c'usi xchapanoj ta stojol Diose.

¹⁸ Li snae oy xa ta sventa ch'ayel; li sbee ja' xa sbe li boch'otic chamenique.

¹⁹ Scotol li boch'otic te chbatic ta stojol li antse, mu xa sutic o tal; mu xa xtal stamic yan velta li sbelal cuxlejale.

²⁰ Jnich'on, te me xaxanov o ta lequil bee; ja' xatambe o batel sbeic li boch'otic tuc' yo'ntonique.

²¹ Yu'un li boch'otic tuc' yo'ntonique te chnaquiic o ta banamil; li boch'otic lequique j'ech'el te oyic o.

²² Yan li boch'otic chopolique ta xich'ic nutsel loq'uel; li jtoybaetique ta xich'ic bulel loq'uel.