Proverbios 19 - Bible in Tzotzil de Chenalhó with Deuterocanon

¹ Ja' lec me me'onutique ja' no'ox venta me tuc' co'ntontique; ja' chopol li boch'o bol ti c'usiuc no'ox svontol ale.

² Mu lecuc li boch'o vontol epal abtel no'ox tspas ti me muc nopbiluc lec yu'une; jech noxtoc li boch'o tsuj no'ox sba c'usi tspase chch'ay ta be.

³ Li cristianoe ta scoj sbolil yo'nton ta soquesat ta be; ts'acal ja' chlic yac'be ta smul li Muc'ul Diose.

⁴ Li c'ulejalile chic' tal ep boch'o lec chisc'opanutic; yan li me'onale mu'yuc boch'o lec xisc'opanutic yu'un.

⁵ Li j'epalc'op testigoe ta ono'ox xich'be stojol, yu'un li boch'o puru epalc'op tspase mu xu' colem chcom.

⁶ Ep boch'otic tsa'ic coltael ta stojol li boch'o lec yo'ntone; tspas lec ta co'ol yo'nton xchi'uquic.

⁷ Me solel bajbil yu'un xchi'iltac ta voq'uel li boch'o me'one, ¡buuc xa li boch'o ja' no'ox lec sc'opan sbaic xchi'uque, solel mu'yuc xa stu chilic! Ac'o me xvocolet xchi'uc, mu xtuc'ulanbat.

⁸ Li boch'o tsc'an lec chbijube ja' ta xc'uxubin sba; li boch'o tscomtsan lec ta yo'nton li bijubtasele ja' sventa slequilal.

⁹ Li j'epalc'op testigoe ta ono'ox xich'be stojol; li boch'o jeche' no'ox tsnop c'usi chale ta ono'ox xch'ay.

¹⁰ Mu snupin me toj c'upil sba c'usi oy yu'un li bol vinique; jech noxtoc li boch'o mozoe mu snupin ch-och ta jpasmantal yu'unic li banquilaletique.

¹¹ Li sbijil cristianoe xu' tstsal o li sc'ac'al yo'ntone; li boch'o bije ta sventa smuc'ul yo'nton chcuch yu'un li ilbajinele.

¹² C'alal ch-ilin li ajvalile, ja' jech chac c'u cha'al jcot león ti xlaquet no'oxe; yan li slequil yo'ntone ja' jech chac c'u cha'al job ac'ubal chyal ta vomoletic.

¹³ Li bol nich'onile ja' no'ox chac'be svocol li stote; li ants ti ja' no'ox tsa' c'ope ja' jech chac c'u cha'al vo' ti te sts'ujts'un oe.

¹⁴ Li jnatic xchi'uc c'usi oy cu'untique, ta sventa jtot jme'tic ta jtatic; yan li bijil ants ta jtatic ta iq'uele ja' chijyac'butic li Muc'ul Diose.

¹⁵ Li ch'aje puru vayel no'ox chac'butic; li boch'o mu xchi cha'ay abtele ta xa'ay vi'nal.

¹⁶ Li boch'o lec chch'un mantale ta xc'uxubin sba stuc; yan li boch'o tsbaj c'usi tsc'an Diose ta xch'ay sba stuc.

¹⁷ Li boch'o chac'be xq'uex me'on c'usi oy yu'une ja' laj yac'be o chc'ot li Diose; jech noxtoc ja' stuc Muc'ul Dios chac'be stojol li c'usi lec tspase.

¹⁸ Taq'uio lec anich'on ti c'alal yorail to ta chanubtasele, pero mu me xamil ti c'alal chavac'be nucule.

¹⁹ Li boch'o toj ech'em x'iline ta xich'be stojol; me te no'ox coltabil chcome yantic ta soc batel.

²⁰ A'yo lec ava'ay li tojobtasele; ich'o ta muc' li taq'uiele, jech lec bij chabat o.

²¹ Li cristianoetique toj ep c'usi tsnop tspasic, pero ja' no'ox chc'ot ta pasel c'usitic snopoj stuc li Muc'ul Diose.

²² Li c'usi lec cha'ay cristianoetique ja' li c'usi melele; ja' xu' no'ox li boch'o me'one, ja' chopol li jun jlo'lavaneje.

²³ Me chquich'tic ta muc' li Muc'ul Diose ja' sventa jun co'ntontic chijcuxi; li boch'o chich' ta muq'ue xcuxet no'ox yo'nton, mu xc'ot ta stojol li vocol chtale.

²⁴ Li boch'o toj ven ch'aje ja' no'ox lec cha'ay stiq'uel sc'ob ta sets'; puru mac'linel tsc'an, solel tic'bel ta ye tsc'an.

²⁵ Me chich' ac'bel stoj smul li jlabanvaneje, ta xlic bijubuc li boch'o mu'yuc bije; me chich' lec taq'uiel li boch'o xa'ibe ono'ox smelole yantic ta xbijub batel.

²⁶ Li boch'o tspojbe c'usi oy yu'un stot xchi'uc me tsibtas loq'uel ta sna sme'e, le'e ja' jun nich'onil ti j'ac'vanej ta q'uexlale; chopol chbat jc'oplaltic yu'un.

²⁷ Jnich'on, me chacomtsan li chanubtasele, ta c'unc'un chch'ay ta avo'nton li abijile.

²⁸ Li j'epalc'op testigoe ja' ta slaban li tuq'uil chapanele; li boch'o chopole tsjop ta alel scotol li c'usi chopole.

²⁹ Chapanbil xa lec stojolic li jlabanvanejetique; chapal xa lec snuculal spatic li bol cristianoetique.