Proverbios 18 - Bible in Tzotzil de Chenalhó with Deuterocanon

¹ Li boch'o t'ut'e ja' no'ox ta sa' c'usi tsc'an yo'nton; jech ta scontrain scotol li lequil taq'uiele.

² Li boch'o bole mu'yuc ta yo'nton chbijub batel; ja' xa no'ox oy ta yo'nton chac ta ilel li c'usi sna'oje.

³ Ta scoj jchopoliltic ta jtatic q'uexlal; ta scoj jtoyobbailtic ti mu'yuc lec jc'oplaltique.

⁴ Li sc'op chloc' ta ye boch'o bije ja' jech chac c'u cha'al nab ti nat xchaque; ja' jech chac c'u cha'al uc'um ti tsots chanov yoque; ja' jech chac c'u cha'al nio' sventa bijubtasel.

⁵ Li jchapanvanejetique mu lecuc me ja' tscoltaic li boch'o oy smule, xchi'uc me ja' mu xaq'uic c'opojuc li boch'o mu'yuc smule.

⁶ Li boch'o bolique puru sventa sa' c'op no'ox c'usi chalic, ta scoj no'ox yeic ta staic majel.

⁷ Li boch'o bole ja' no'ox ta soques sba stuc; ja' no'ox sventa ta xchuc snuc' ta lasu ta scoj li c'usi chloc' ta yee.

⁸ Li boch'o tspuc batel ep lo'ile ja' xa jech chac c'u cha'al c'unil ve'lil ya'yel li slo'ile; ch-och c'alal ta yut jol co'ntontic yu'un.

⁹ Li boch'o ch'aj ta abtele ja' co'ol xchi'uc li jsoquesvaneje.

¹⁰ Li Muc'ul Diose ja' jech chac c'u cha'al jun muc'ta ton va'al ti lec tsotse; ja' te chbat sa'ic coltael li boch'o tuc' yo'ntonique.

¹¹ Li jc'uleje ja' xa stsatsal yo'nton cha'ay li sc'ulejale; ja' xa jech c'otem cha'ay jech chac c'u cha'al jun lum ti lec setbil ta tsatsal coraltone.

¹² Li toybaile ja' chisyalesutic ta lum; yan me biq'uit chcac' jbatique, chquich'tic ich'el ta muc'.

¹³ Li boch'o tstac' no'ox ta anil lo'il c'alal muc to cha'ibe smelole ja' bol chc'ot, xchi'uc ja' no'ox chac' sba ta q'uexlal.

¹⁴ Li stsatsal co'ntontique chiscoltautic ti c'alal oy jchameltique, pero me mu'yuc stsatsal co'ntontique ¿boch'o xu' chijyac'butic?

¹⁵ Li boch'o sna'be smelole oy ta yo'nton chbijub; li boch'o bije ta to sa' bijubtasel.

¹⁶ Li boch'o oy c'usi tsq'uelane ta xjam lec sbe; xu' chc'ot c'alal to ta stojol li boch'o tsots yabtelique.

¹⁷ Li boch'o tspoj sbae melel xa ya'yel li c'usi chale; pero c'alal me ic'ot li yane chlic vinajuc me melel.

¹⁸ C'alal oy mu xchapaj c'ope, ja' to xu' chchapaj ta canal tajimol; ja' jech ta xpaj c'alal me oy boch'o tsots tscontrain sbaique.

¹⁹ Me oy boch'o chich' contrainel yu'un xchi'il ta voq'uele cha'cha' to stsatsub yo'nton jech chac c'u cha'al jun lum setbil lec ta coralton; li c'op chlic ta jchi'il no'ox jbatic ta voq'uele ja' jech chac c'u cha'al sbaj sti' coralton chc'ot.

²⁰ Li c'usi chloc' ta ye jun cristianoe ja' yu'un stuc; ja' chc'ot ta sba stuc li c'usi chale.

²¹ Li jlajel jchameltic xchi'uc jcuxlejaltique te ta jtatic ta sventa c'u x'elan chijlo'ilaj; li boch'o toj ep chlo'ilaje tstabe stojol.

²² Li boch'o sta yajnile ja' xa la sta li c'usi leque; ja' svinajeb ti c'uxubinbil yu'un Muc'ul Diose.

²³ Li me'one xvocolet ta sc'anel vocol; yan li jc'uleje xc'aq'uet no'ox chtac'ov.

²⁴ Oy boch'o lec co'ol co'nton jchi'uctic ti ta jliquel no'ox xu' ta jcontrain jbatic, pero oy ono'ox boch'o xjelov slequil yo'nton jech chac c'u cha'al li jchi'iltic ta voq'uele.