Proverbios 17 - Bible in Tzotzil de Chenalhó with Deuterocanon

¹ Ac'o me jxox no'ox taqui pan ta jve'tic, ja' no'ox venta me jun no'ox co'ntontique; ac'o me noj ta ve'lil sna me puru sa' c'op no'ox tspase, altic.

² Li bijil mozoe ja' chlic sventain ec li querem ti mu'yuc lec sc'oplale; li c'usi oy yu'une ta xich'be noxtoc jech chac c'u cha'al ta xich'ic li xchi'iltac ta voq'uele.

³ Li c'anal taq'uin xchi'uc saquil taq'uine ta c'oc' chich' q'uelel me ja' ta melel, pero li yo'nton cristianoe ja' tsq'uel stuc li Muc'ul Diose.

⁴ Li boch'o chopole ja' xa te ts'e'el xchiquin ta ya'yel li bol lo'ile; li j'epalc'ope ja' xa toj lec cha'ay li chopol lo'ile.

⁵ Li boch'o tslaban me'one ta soquesbe yo'nton li Boch'o ipasat yu'une; me xcuxet xa yo'nton ti oy svocol chile, ta persa tstabe stojol.

⁶ Li moletique ja' scoronaic c'otem li smomnich'nabique; li nich'naletique ja' stsatsal yo'ntonic li stot sme'ique.

⁷ Li boch'o bole mu snupin me chlo'ilaj ta lequil lo'il; li boch'o tsots yabtele toj chopol ta a'yel me chlo'lavane.

⁸ Li matanale ja' slequilal chc'ot li boch'o chaq'ue; lec jun yo'nton buyuc no'ox chbat.

⁹ Li boch'o mu sventauc c'usi chopol chile ta sta boch'o lec chil sba xchi'uc; yan li boch'o tspuc batele tsvoc' sba batel li boch'o co'ol to'ox yo'nton xchi'uque.

¹⁰ Li boch'o bije ta jbel no'ox utel xu' cha'ibe smelol; yan li boch'o bole ac'o me chich' vo'vinic (100) ta moj nucul, mu ono'ox xbijub.

¹¹ Li jbajmantale puru sa' c'op no'ox tsc'an, jech ja' ta xtacbat batel li boch'o lec simarone.

¹² Ja' xu' to jutuc me jnuptic ta be jcot me' oso ti liquem sc'ac'al yo'nton ta scoj ti pojbil yole; ja' toj vocol me ja' ta jnuptic li boch'o bol ti soquem sjole.

¹³ Li boch'o chopol spacol chac'be li c'usi lec tspasbate; mu xu' chnamaj o li c'usi chopol te ta snae.

¹⁴ Li boch'o ta sliques c'ope ja' jech chac c'u cha'al nojelal uc'um; ja' lec mu jtic' jbatic, yu'un jech mu jtabetic xchuculal.

¹⁵ Me ja' colem chcom li boch'o oy smule, me ja' oy smul chcom li boch'o mu'yuc smule, xchibal chopol chil li Muc'ul Diose.

¹⁶ ¿C'usi stu taq'uin oy ta sc'ob bol cristiano sventa tsman sbijil ti me mu'yuc ono'ox ta yo'nton tsc'an li sbijile?

¹⁷ Li boch'o lec jc'opan jba jchi'uctique lec ono'ox sc'anojutic; ja' jchi'iltic ta voq'uel chc'ot ti c'alal oy jvocoltique.

¹⁸ Li boch'o mu bijuque chac' prentail ta sventa tsventainbe yil li xchi'ile; ja' xa va'al chcom ta piarol yu'un li xchi'ile.

¹⁹ Li boch'o lec cha'ay sa' c'ope yu'un ja' jbajmantal; li boch'o toj muc' no'ox yac'oj sbae ta sa' svocol stuc.

²⁰ Li boch'o chopol yo'ntone mu sta o c'usi lec; li boch'o mu meleluc xc'opoje ta ono'ox sta svocol.

²¹ Li boch'o bol chloc' xnich'one ja' no'ox sventa chat o yo'nton; li boch'o mu'yuc sbijil chloc' xnich'one mu'yuc bu xcuxet yo'nton.

²² Me xcuxet no'ox co'ntontique ja' lequilal sventa jbec'taltic; yan li at-o'ntone chlaj jtsatsaltic yu'un.

²³ Li boch'o chopole ta xch'am taq'uin ta mucul; ja' xa ta soques o li tuq'uil chapanele.

²⁴ Li boch'o bije ja' no'ox oy ta yo'nton o sa'el li sbijile; yan li boch'o bole mu t'ujbiluc no'ox li c'usi tsc'an yo'ntone.

²⁵ Li bol quereme toj ep chac'be svocol li stote; toj abul sba cha'ay yu'un li sme'e, yu'un jeche' no'ox laj yac' svocol ta svoq'uesel.

²⁶ Mu xu' chich' c'anbel taq'uin li boch'o mu'yuc smule; mu xu' chich' ac'bel nucul li boch'o tuc' c'usi tspase.

²⁷ Li boch'o bije tspajes sba ta lo'il; li boch'o oy lec srazone sna' spajesel sba.

²⁸ Me sna' spajesel sba li bol vinique xu' chcuyat ta bijil vinic; me mu xlo'ilaje xu' chcuyat ta razón vinic.