Proverbios 16 - Bible in Tzotzil de Chenalhó with Deuterocanon

Bic'tal lequil chanubtasel sventa c'u x'elan xu' chijcuxi xchi'uc sventa c'usi lec ta jpastic

¹ Li cristianoetique ja' tsnopic li c'usi tsc'an tspasique; pero ja' Muc'ul Dios chal me xu' chc'ot ta pasel.

² Li cristianoetique tsnopic ti lec scotol li c'usitic tspasique, pero ja' Muc'ul Dios chal me lec, me mu lecuc.

³ Ac'bo sventain Muc'ul Dios scotol li c'usitic chapase, jech lec chbat li c'usitic chanope.

⁴ Scotol li c'usitic spasoj Muc'ul Diose oy slajeb, jech ec li boch'otic chopolique ja' slajebic ti chbat stoj smulique.

⁵ Li Muc'ul Diose toj chopol chil li jtoybaetique; ta ono'ox sta yorail tstoj smulic.

⁶ Ta sventa c'uxubinel xchi'uc smuc'ul o'ntonal ta xch'ay li mulile; ta sventa yich'el ta muc' Muc'ul Dios ta xcom yu'un c'usi chopol li cristianoetique.

⁷ C'alal me lec chil Muc'ul Dios c'usitic tspas li cristianoe, c'alal ta yajcontra xu' tslecubtasbe yo'nton.

⁸ Ja' toj lec me tuc' c'usi ta jpastique, ac'o me mu'yuc c'usi ep ta jtatic; ja' altic no'ox me ep c'usi oy cu'untic, me ta scoj chopol c'usi ta jpastique.

⁹ Li cristianoetique ja' no'ox tsnopic li c'usi tspasique; ja' Muc'ul Dios tstuq'uibtas batel.

¹⁰ Li ajvalile ta sventa Dios ta xc'opoj, jech sc'oplal lec tuc' ta xchapanvan.

¹¹ C'usiuc no'ox sbisubil ti lec ts'acalique ja' ta sventa Muc'ul Dios, yu'un ja' stuc spasoj li sbisubiltaque.

¹² Li ajvaliletique chopol chil li boch'o chopol c'usi tspasique, yu'un li yabtel ac'bilique ja' sventa lequil abtel.

¹³ Li boch'o tuc' c'usitic chale xcuxet no'ox yo'nton yu'un li ajvaliletique; lec sc'anoj li boch'otic tuc' xc'opoje.

¹⁴ Li sc'ac'al yo'nton ajvalile ja' sventa lajel chc'ot; yan li boch'o bije xu' yu'un tslames.

¹⁵ Me xcuxet yo'nton li ajvalile ja' sventa jcuxlejaltic chc'ot; li slequil yo'ntone ja' jech chac c'u cha'al toc ti oy ya'lele.

¹⁶ Ja' toj tsots sc'oplal li jbijiltique, ja' mu tsotsuc sc'oplal li c'anal taq'uine; ja' xloc' venta me jamal jba jsatique, ja' jutuc sc'oplal li saquil taq'uine.

¹⁷ Li boch'o tuc' yo'ntonique oy ta yo'nton tsvoc' sbaic ta sventa li c'usi chopole; li boch'o tsq'uel lec c'usi tspasique ja' tsq'uel sba stuc chc'ot.

¹⁸ Li toybaile ja' chac'utic ta vocol; me muc' no'ox chcac' jbatique ja' chisyalesutic ta lum.

¹⁹ Ja' lec me biq'uit chcac' jba jchi'uctic li boch'o abul no'ox sbaique; ja' chopol me ta jtsob jc'ulejal jchi'uctic li boch'o muc' yac'oj sbaique.

²⁰ Li boch'o cha'ay lec chanubtasele lec chbat; li boch'o ja' spatoj o yo'nton ta stojol Muc'ul Diose xcuxet no'ox yo'nton.

²¹ Li boch'o tsnop lec c'usi tspase “lec bij”, xi sc'oplal; ta sventa lec c'usi chal oy ep boch'o chch'unic.

²² Li boch'o bije ja' jech chac c'u cha'al nio' sventa cuxlejal li sbijil staoje; yan li bijubtasel chich' li boch'o bolique ja' no'ox sbolil yo'nton chc'ot.

²³ Li boch'o bije ta snop lec ba'yuc li c'usi chloc' ta yee, jech oy boch'o chc'ot ta yo'ntonic li sc'ope.

²⁴ Li c'unil c'ope ja' jech xchi'il jech chac c'u cha'al spom muc'ta pom; toj lec chi' chca'itic, xchi'uc ja' poxil chca'itic.

²⁵ Oy be ti tuc' ta tamel yilele, pero ti bu chc'ote ja' sventa lajel.

²⁶ Li boch'o oy c'usi chac stun tslajes ya'ye ja' tsujat ta abtel yu'un; li c'usi chac ta yeuc ya'ye ja' chtacat batel ta abtel yu'un.

²⁷ Li boch'o chopole ja' yac'oj o yo'nton ta sa'el li c'usi chopole; xco'laj xchi'uc yat c'oc' chloc' ta ye.

²⁸ Li boch'o nopen xa xa'ay c'usi chopole ja' no'ox ta sliques c'op; li boch'o puru lo'il no'ox tspas batele ja' no'ox ta sa' yajcontratac.

²⁹ Li chopol vinique ja' no'ox ta xpich'ajesbe yo'nton li xchi'ile; te ta xac' xanovuc batel ta chopol be.

³⁰ Ta smuts' sat ta snopel li c'usi chopole; ts'acal chlic bac'uc yanal ye ta sventa li c'usi chopol snope.

³¹ Li boch'o tuc' yo'ntone jal chcuxi; c'alal sac xa sjol yu'un smalubele ja' scorona c'otem.

³² Ja' lec me oy smuc'ul co'ntontique, ja' altic no'ox me toj ech'em xu' cu'untic c'ope; ja' lec me jna' spajesel jba jtuctique, ja' mu'yuc stu me ta jtsaltic ep lumetique.

³³ Li cristianoetique ja' ta spasic canal tajimol, pero ja' stuc Muc'ul Dios tsnop c'usi xu' chc'ot ta pasel.