Proverbios 15 - Bible in Tzotzil de Chenalhó with Deuterocanon

¹ Li c'unil tac'ovele ja' tspajes li c'ac'al o'ntonale; yan li tsots tac'ovele ja' tsliques c'ac'al o'ntonal.

² Li boch'otic bijique puru bijubtasel chloc' ta yeic; yan li boch'o bolique puru sbolilic no'ox chloc' ta yeic.

³ Li Muc'ul Diose chajal ta sba ta sat scotol; sq'ueloj li boch'otic lequique xchi'uc li boch'otic chopolique.

⁴ Li c'unil c'ope ja' jech chac c'u cha'al jpets te' sventa cuxlejal; yan li chopol lo'ile tsbolibtas co'ntontic.

⁵ Li boch'o bole mu'yuc stu cha'ay li taq'uiel ch-albat yu'un stote; yan li boch'o chch'un taq'uiele ja' bij chbat.

⁶ Li boch'o tuc' yo'ntone oy ep sc'ulejal ta sna; yan li boch'o chopole mu xil bu chbat ti c'u yepal tstae.

⁷ Li boch'o bijique puru sventa bijubtasel c'usi chloc' ta yeic; yan li boch'otic chopolique mu jechuc oy ta yo'ntonic.

⁸ Li milbil matanal chaq'uic li boch'o chopolique mu'yuc stu chil li Muc'ul Diose; yan ti c'alal tsc'opanic Dios li boch'o tuc' yo'ntonique xcuxet no'ox yo'nton tstsacbe sc'opic.

⁹ Li Muc'ul Diose toj chopol chil c'usi tspasic li boch'otic chopolique; yan li boch'otic tuc' c'usi tspasique lec sc'anoj.

¹⁰ Li boch'o ta scomtsan tuq'uil bee tsots taq'uiel ta xich'; yan li boch'o mu sc'an o taq'uiele te ta soc o.

¹¹ Li Muc'ul Diose ja' sventainoj li lajebale xchi'uc li yavil animaetique; buuc xa li c'usi tsnopic cristianoetique, lec sq'ueloj scotol.

¹² Li jlabanvaneje mu xich' ta muc' li boch'o chtaq'uiat yu'une, xchi'uc mu sc'an xchi'in li boch'o bijique.

¹³ Li xcuxetel o'ntonale stse'in no'ox jsatic yu'un, pero me oy svocol co'ntontique chcat no'ox co'ntontic yu'un.

¹⁴ Li boch'o lec sna' snopele ja' ta sa' li bijubtasele, yan li boch'o bole ja' xa yipanoj o li sbolile.

¹⁵ Li boch'o oy svocole jech ta vocol no'ox oy o scotol c'ac'al; yan li boch'o xcuxet no'ox yo'ntone puru q'uin no'ox cha'ay o scotol c'ac'al.

¹⁶ Ja' xu' no'ox me me'onutic, me chquich'tic ta muc' li Muc'ul Diose; ja' altic me jc'ulejutic, me puru at-o'nton no'ox chca'itique.

¹⁷ Ac'o me yu itaj no'ox ta jlo'tic ti me ja' lec jc'anoj jbatique; ja' altic me puru ti'bol ta jti'tic me puru c'ac'al o'ntonal no'ox te oye.

¹⁸ Li boch'o toj ech'em x'iline ta xlic c'op yu'un; yan li boch'o muc' no'ox yo'ntone chpaj c'op yu'un.

¹⁹ Li boch'o ch'aje xco'laj xchi'uc macal ta ch'ix li sbee; yan li boch'o baxbole ja' jech chac c'u cha'al lec jamal sbe cha'ay.

²⁰ Li bijil nich'onile xcuxet no'ox yo'nton yu'un li stot sme'e; yan li bol quereme mu'yuc stu chil li stot sme'e.

²¹ Li boch'o muc bijuque xcuxet no'ox yo'nton yu'un li sbolile; yan li boch'o bije ta sq'uel sba lec batel.

²² Me mu'yuc bu ta jac'tique xu' mu'yuc stu chc'ot li c'usi ta jnoptique; yan me oy ep boch'otic chtojobtasvanique, oy lec stu chc'ot li c'usi chich' nopele.

²³ Xcuxet no'ox co'ntontic me la jtabetic stac'ubil li ca'yejtique; pero ja' jun to yutsil me ta yorail no'ox la jtatique.

²⁴ Li sbelal cuxlejale tuc' xbat ta toyol, ja' te chbat li boch'o bije, jech mu xyal batel ta yavil animaetic.

²⁵ Li Muc'ul Diose ta slilinbe sna li jtoybaetique; yan li me'on antse ta xac' ti lec ac'o comuc o li c'usi oy yu'une.

²⁶ Li Muc'ul Diose mu'yuc stu chil c'usi tsnop li boch'otic chopole; yan li boch'o lequique toj lec chil li c'usi tsnopique.

²⁷ Li boch'o xpich'et no'ox yo'ntone ta sa' svocol xchi'uc li boch'otic oy yu'un ta snae; yan li boch'o mu sc'an xchon sba ta taq'uine jun yo'nton chcuxi.

²⁸ Li boch'o tuc' yo'ntone ta snop lec c'u x'elan chtac'ov; yan li boch'o chopol yo'ntone puru chopol c'usi ta sbusan ta alel.

²⁹ Li Muc'ul Diose nom oy ta stojolic li boch'otic chopolique; yan li boch'otic tuc' yo'ntonique cha'ibe sc'op ti c'alal chc'opanate.

³⁰ Me lec jsatic chijq'uelvane chac' xcuxetel o'ntonal; jech noxtoc, me oy lequil a'yej chca'itique ta stsatsub lec co'ntontic yu'un.

³¹ Li boch'o ta xchiquinta lec li taq'uiel ti ja' sventa cuxlejale xu' ta xchi'in li boch'otic lec bijique.

³² Li boch'o mu xich' ta muc' li taq'uiele mu xc'uxubin sba stuc; yan li boch'o lec cha'ay taq'uiele ta sta sbijil.

³³ Li boch'o chich' ta muc' Muc'ul Diose te chchan batel lec c'u x'elan chbijub; ti c'u x'elan xu' ta jtatic ich'el ta muq'ue tsc'an biq'uit chcac' jbatic ba'yuc.