Proverbios 14 - Bible in Tzotzil de Chenalhó with Deuterocanon

¹ Li bijil antse ta sq'uel lec c'u x'elan chbat te ta sna; yan li bol antse ja' no'ox ta soques li snae.

² Li boch'o tuc' c'usi tspase ta xich' ta muc' li Muc'ul Diose; yan li boch'o mu'yuc tuc' c'usi tspase mu xich' ta muc'.

³ Li toybail chloc' ta ye boch'o bole te tsta majel o xchi'uc; yan li c'usi chloc' ta ye boch'o tuc' yo'ntone ja' scoltael chc'ot.

⁴ Me mu'yuc ch-abtej vacaxe, mu'yuc c'usi chloc', yu'un ja' ta sventa yabtel vacax ti oy ep c'usi chloq'ue.

⁵ Li lequil testigoe mu x'epalc'opoj; yan li chopol testigoe puru epalc'op tspas.

⁶ Li jlabanvaneje ta sa' bijubtasel yaloj, pero mu sta; yan li boch'o tuc' yo'ntone mu vocoluc tsta.

⁷ Voc'o aba ta stojol li bol vinique, yu'un mu xata o abijil te.

⁸ Li boch'o bije ja' ch-ac'bat sna' yu'un sbijil me lec li c'usi tspase; yan li boch'o bole te no'ox lo'labil o yu'un li sbolile.

⁹ Li boch'o bolique ta slabanic no'ox li perdón yu'un mulile; yan li boch'o tuc' yo'ntonique oy ono'ox ts'icumal yu'unic.

¹⁰ Li co'ntontique sna'oj stuc li c'usi svocole, xchi'uc ti c'alal xcuxet no'ox cha'ye, mu xac' ta yan.

¹¹ Li boch'o chopol yo'ntonique ta xlaj sc'oplalic o; yan li boch'o tuc' yo'ntonique mu xlaj sc'oplalic o.

¹² Oy beetic ti toj tuc' yilele, pero ja' sbelal lajebal.

¹³ Ac'o me ep chijtse'in, pero oy ono'ox svocol li co'ntontique; ac'o me xcuxet co'ntontic, pero ta ono'ox xtal jvocoltic.

¹⁴ Li boch'o chopol yo'ntonique ta ono'ox xa'ay svocol yu'un li c'usi tspasique; yan li boch'o lec c'usi tspase ta ono'ox xil lequilal yu'un li yabtelique.

¹⁵ Li boch'o mu'yuc sbijile ta svontolch'un no'ox li c'usi ch-albate; yan li boch'o bije tsnop lec ti bu chbate.

¹⁶ Li boch'o bije ta xi', jech ta svoc' sba ta sventa li c'usi chopole; yan li boch'o bole c'usiuc no'ox spas batel.

¹⁷ Li boch'o ta ora no'ox ch-iline ta anil no'ox tsvontol pas c'usi tsc'an; yan li boch'o tsnop ba'yuc c'usi chopol tspase ja' ech'em chopol ch-ilat.

¹⁸ Li boch'o mu'yuc bijique ja' smotonic o li sbolil yo'ntonique; yan li boch'o tuc' yo'ntonique ja' smotonic o li bijubtasele.

¹⁹ Li boch'o chopolique ta to squejan sbaic ta stojol li boch'o tuc' yo'ntonique; li jpasmuliletique ta to xlic sc'anic vocol ta stojol li boch'otic lequique.

²⁰ Li me'one mu'yuc c'anbil lec yu'un yuts' yalal; yan li jc'uleje toj ep boch'otic lec sc'opan sba xchi'uc.

²¹ Li boch'o mu'yuc stu chil xchi'ile ta sta smul; yan li boch'o c'ux ta yo'nton me'onetique xcuxet no'ox yo'nton.

²² Li boch'o puru chopol c'usi tsnopique te chch'ayic o ta be; yan li boch'o ja' tsnopic o c'usitic leque tstaic c'uxubinel xchi'uc c'anel.

²³ Ta scotol li c'usitic ta jpastique oy c'usi ta jtatic te; yan me ja' no'ox c'usitic ta jbol alilantique mu'yuc c'usi chloc' o.

²⁴ Li sc'ulejal boch'o bije ja' scorona chc'ot; li xchopolil boch'o chopolique ja' sbolilic chc'ot o.

²⁵ Li lequil testigoe chcoltavan; yan li chopol testigoe puru epalc'op tspas.

²⁶ Me chquich'tic ta muc' li Muc'ul Diose ja' stsatsal co'ntontic chc'ot o, jech jun yo'ntonic o ec li calab jnich'nabtique.

²⁷ Me chquich'tic ta muc' li Muc'ul Diose ja' jech chac c'u cha'al jun nio' sventa cuxlejal, jech mu xistautic snucul xch'ojon li lajele.

²⁸ Me ep svinictac li ajvalile lec tsots yo'nton; me mu'yuc ep svinictac li jpasmantale mu'yuc c'usi xu' yu'un.

²⁹ Li boch'o mu xlic sc'ac'al yo'nton ta orae ja' svinajeb ti lec sna'be smelole; yan li boch'o mu sts'ic yu'une ja' svinajeb ti toj bole, ti mu sna'be smelole.

³⁰ Me muc' no'ox co'ntontique ja' slequilal li jbec'taltique; yan li yit'ixal co'ntontique ja' xchamel jbaquiltic chc'ot.

³¹ Li boch'o chac'be svocol me'one ja' chac' ta q'uexlal li Jpasvanej yu'une; yan li boch'o chc'uxubin me'one ja' yich'oj ta muc' chc'ot li Yajvale.

³² Li boch'o chopole chich' ulesel o ta scoj li xchopolile; yan li boch'o leque jun no'ox yo'nton ti c'alal chchame.

³³ Li boch'o xa'ibeic lec smelole te chnaqui o ta yo'ntonic li bijubtasele; yan li boch'o bolique mu xu' chotquinic o c'u x'elan.

³⁴ Li tuq'uil chapanele ja' sventa lec sc'oplal li jun lume; yan me puru mulil oye ja' xq'uexlal chc'ot li lumetique.

³⁵ Me lec bij li j'abtel yu'un ajvalile, lec xcuxet yo'nton ta stojol; yan li boch'o ch-ac'van ta q'uexlale ta xilinta.