Proverbios 13 - Bible in Tzotzil de Chenalhó with Deuterocanon

¹ Li bijil ol-nich'onile ta xich'be ta muc' smantal li stote; yan li jbajmantale mu xich' ta muc' li taq'uiele.

² Li boch'o lec c'usi chale ja' ta stulbe sat; yan li boch'o puru chopol c'usi tsnope jun ta vi'nal cha'yic li c'usi tsc'an tspasique.

³ Li boch'o tsq'uel sba xchi'uc yee ja' sventa chc'uxubin sba; yan li boch'o c'usiuc no'ox tsvontol ale ta sta svocol.

⁴ Li boch'o ch'aje oy c'usi tsc'an, pero mu sta; yan li boch'o sna' x'abteje mu'yuc c'usi sc'an cha'ay.

⁵ Li boch'o tuc' yo'ntone chopol chil li epalc'ope; yan li boch'o chopole chq'uexlaltasvan, xchi'uc chlabanvan.

⁶ Li c'usi tuq'ue ja' tstojobtas batel li boch'o tuc' c'usi tspase; yan li c'usi chopole ja' ta xch'ayes batel ta be li boch'o chopole.

⁷ Oy boch'o jc'ulej scuyoj sba, pero mu'yuc c'usi oy yu'un; oy boch'o me'on no'ox yilel, ja' oy ep sc'ulejal.

⁸ Li jc'uleje ja' spatoj yo'nton xu' tspoj sba o xchi'uc li sc'ulejale, yan li boch'o me'one te no'ox xnel yu'un me oy chtal uts'intaatuque.

⁹ Li boch'o tuc' yo'ntonique xco'laj xchi'uc luz c'otemic; yan li boch'o chopolique ja' jech chac c'u cha'al luz ti tubenique.

¹⁰ Li toybaile ja' no'ox xu' tsliques c'op; yan li bijubtasele ja' te oy ta stojol li boch'o chich' ta muc' tojobtasele.

¹¹ Li boch'o ta jech no'ox tsta sc'ulejal ta orae, ta ono'ox stsul yalel; yan li boch'o ta slubel ta xchiq'uinel tsta sc'ulejale yantic ta scajtsaj muyel.

¹² Me mu jtatic ta ora li c'usi ta jmalatique ta xlo'ilaj co'ntontic; pero me chc'ot ta pasel li c'usi ta jc'antique toj jun no'ox co'ntontic.

¹³ Li boch'o ta sbaj chanubtasele ta xch'ay batel; yan li boch'o ta xch'un c'usi ch-albate ta xich' smoton.

¹⁴ Li chanubtasel yu'un li boch'o bije ja' jech chc'ot jech chac c'u cha'al nio' sventa cuxlejal; ja' chcoltavan ta sventa snucul xch'ojon li lajele.

¹⁵ Me chquich'betic lec sjam smelole, lec jc'oplaltic; yan li boch'o mu xtojob c'usi tspasique ta vocol no'ox oyic.

¹⁶ Li boch'o oy sbijile ta sventa sbijil tspas li c'usi tspase; yan li boch'o bole ja' no'ox chac' ta ilel li sbolile.

¹⁷ Li chopol j'almantale ta sta svocol; yan li lequil j'almantale oy c'usi lec ta jtatic yu'un.

¹⁸ Li boch'o chopol cha'ay tojobtasele ta sta na'leel xchi'uc toj abul sba chbat; yan li boch'o lec cha'ay chanubtasele ta sta ich'el ta muc'.

¹⁹ Li stael c'usi ta jc'antique toj lec; pero li scomtsanel c'usi chopole mu xc'ot ta yo'ntonic li boch'o chopolique.

²⁰ Li boch'o ja' chchi'in li boch'otic oy sbijilique ta xbijub batel ec; yan li boch'o ja' chbat xchi'in li bol cristianoetique te chbolib o ec.

²¹ Li jpasmuliletique ja' nutsbilic o yu'un li c'usitic chopole; yan li boch'o tuc' yo'ntonique ja' smotonic chc'ot li c'usi leque.

²² Li lequil vinique chac'be comel c'usitic oy yu'un ec li smomnich'nabtaque; yan li sc'ulejal jpasmuliletique ja' chich'ic comel li boch'otic tuc' yo'ntonique.

²³ Li me'onetique lec chac' c'usitic tsts'un ta yosilic, pero me chtal li boch'o chopolique tspojic batel.

²⁴ Li boch'o mu xac'be nucul li xnich'one yu'un mu'yuc sc'anoj; yan li boch'o tstaq'ui leque yu'un lec sc'anoj.

²⁵ Li boch'o tuc' yo'ntone oy lec sve'elic, lec noj xch'utic; yan li boch'o chopolique cha'yic vi'nal.