Proverbios 12 - Bible in Tzotzil de Chenalhó with Deuterocanon

¹ Li boch'o tsc'an lec chanubtasele yu'un tsc'an chbijub; yan li boch'o mu sc'an taq'uiele yu'un tsc'an te no'ox bol o.

² Li boch'o leque ta sta coltael yu'un li Muc'ul Diose; yan li boch'o chopol yo'ntone ja' no'ox ta sta chapanbel smul.

³ Li cristianoe mu sta jun yo'nton o ta sventa li c'usi chopole; yan li boch'o tuc' yo'ntone nat chyal yisim ta banamil, jech mu stac bulel.

⁴ Li baxbol antse ja' scoronail sjol smalal c'otem; yan li chopol antse ja' xchamel sbaquil smalal chc'ot.

⁵ Li boch'o tuc' yo'ntonique puru lec c'usi tsnopic; yan li boch'o chopolique puru lo'lavanej no'ox oy ta yo'ntonic.

⁶ Li boch'otic chopol yo'ntonique ja' no'ox oy ta yeic o ti tsmalic ch'ich'e; yan li sc'op boch'o tuc' yo'ntonique ja' sventa coltael.

⁷ Li Diose tsyales ta lum li boch'o chopolique jech chlaj sc'oplalic o; yan li boch'o tuc' yo'ntonique lec tsots va'ajtic chcomic o.

⁸ Li boch'o bije ich'bil ta muc' chc'ot, ja' ti c'u yepal sbijil oye; yan li boch'o bol yo'ntone mu'yuc stu ch-ilat.

⁹ Ja' xu' to jutuc li boch'o mu'yuc ich'bil ta muc' ti oy svinic ta abtele; ja' vocol me ja' mu'yuc lec sve'el li boch'o toj muc' no'ox yac'oj sbae.

¹⁰ Li boch'o tuc' yo'ntone oy ta yo'nton chc'uxubin li sts'unub yovole, yan li boch'o chopol yo'ntone chuts'inta li c'usitic oye.

¹¹ Li boch'o lec x'abtej ta yosile oy lec sve'el; yan li boch'o mu'yuc sbijile ja' no'ox te tsa' abtel ti bu mu'yuc c'usi tstae.

¹² Li c'usi chopol tsc'an yo'nton li boch'otic chopolique ja' syacubilic chc'ot; yan li boch'o tuc' yo'ntonique jun yo'nton chac' lec yisimic.

¹³ Li boch'o chopol yo'ntone te chucbil chc'ot ta scoj yepalc'op; yan li boch'o tuc' yo'ntone mu sta svocol.

¹⁴ Jujun cristiano ta stulbe sat li c'usi chale, xchi'uc ta xich'be stojol li c'usi tspase.

¹⁵ Li boch'o bole tsnop ti toj lec scotol li c'usi tspas batele; yan li boch'o bije cha'ibe smelol ti c'alal chtojobtasate.

¹⁶ Li boch'o bole ta ora no'ox chac' ta ilel li sc'ac'al yo'ntone; yan li boch'o bije mu xac' ta sventa li c'usi chopol ch-albate.

¹⁷ Boch'o lequil testigoe melel c'usi chal; yan li j'epalc'op testigoe ja' no'ox chlo'lavan.

¹⁸ Oy boch'o tojtoj tuch'el xa chc'ot yu'un ya'yel li c'usi chalique, pero li boch'o tuc' yo'ntonique xco'laj xchi'uc poxil li sc'opique.

¹⁹ Li boch'o melel c'usi chale mu xlaj o sbatel osil; yan li boch'o mu meleluc c'usi chale jliquel no'ox chjelov.

²⁰ Li c'usi chchapan boch'o chopol c'usi tsnope oy lo'lael te; yan li tojobtasel chac' boch'o lec c'usi tsnope xcuxet no'ox o'ntonal te.

²¹ Li boch'o tuc' yo'ntone mu sta svocol; yan li boch'o chopole puru chopol c'usi chtal ta stojol.

²² Li boch'o puru epalc'op tspase toj chopol ch-ilat yu'un Muc'ul Dios; yan li boch'o melelic c'usi chale lec ch-ilat yu'un.

²³ Li boch'o sna'be smelole mu xal ta anil li c'usi sna'e, yan li boch'o muc bijuque tsvontol puc no'ox batel li sbol razone.

²⁴ Li boch'o lec sna' x'abteje chc'ot ta jpasmantal; yan li boch'o ch'aje chich' pasel ta mantal.

²⁵ Li at-o'ntonale ta slajesbutic stsatsal co'ntontic; yan li lequil a'yeje ta xac' xcuxetel co'ntontic.

²⁶ Li boch'o tuc' yo'ntone ja' lequil be chc'ot ta stojol li xchi'iltaque; yan li boch'o chopole ja' no'ox chch'ayvan batel ta be.

²⁷ Li boch'o ch'aje mu'yuc c'usi tsta stun; yan li boch'o tsots ch-abteje tsta sc'ulejal.

²⁸ Li sbelal c'usitic tuc' ta pasele ja' sventa cuxlejal; ja' lequil be, jech mu'yuc chamel lajel te.