Proverbios 11 - Bible in Tzotzil de Chenalhó with Deuterocanon

¹ Li Muc'ul Diose toj chopol chil li c'usi mu'yuc ts'acal sbisubile; ja' lec chil ti bu lec ts'acale.

² Li boch'o chlic stoy sbae chlic socuc sc'oplal; li boch'o biq'uit chac' sbae chlic bijubuc.

³ Li boch'o tuc' yo'ntonique ja' chtojobtasatic batel yu'un li stuq'uil yo'ntonique; yan li boch'otic chopol yo'ntonique ta xmilatic yu'un li xchopolilique.

⁴ Li c'ulejalile mu'yuc c'usi chtun o ti c'alal yorail chich' chapanel scotol cristianoe; yan li stuq'uil co'ntontique ja' chiscoltautic ta chamel ta lajel.

⁵ Li boch'o tuc' yo'ntonique ta xjambat batel sbeic yu'un li stuq'uil yo'ntonique; yan li boch'o chopolique ta xjipatic ta lum yu'un li xchopolilique.

⁶ Li boch'o tuc' yo'ntonique ja' spojobbailic chc'ot li stuq'uil yo'ntonique; yan li jpasmuliletique te chucbil chc'otic o ta scoj li smulique.

⁷ C'alal chcham li boch'o chopol yo'ntone, te chlaj sc'oplal o li c'usi tsmalae; te chlaj sc'oplal o li c'usi tsc'an tstae.

⁸ Li Diose tscolta loq'uel ta sventa vocol li boch'o tuc' yo'ntone; yan li boch'o chopole ja' te chac' batel.

⁹ Li boch'o chopole ta scoj no'ox ye chac'be svocol li xchi'ile; yan li boch'o bije ja' chcoltaat yu'un li sbijile.

¹⁰ C'alal toj lec chbat yu'un li boch'o tuc' yo'ntonique, toj xcuxet no'ox yo'nton li slumale; c'alal chcham li boch'o chopolique, xcuxet no'ox yo'ntonic.

¹¹ Ta sventa li bendición staojic boch'o tuc' yo'ntonique, lec chbat sc'oplal li slumalique; ta sventa sc'opic li boch'otic chopolique ta soc sc'oplal o.

¹² Li boch'o mu'yuc sbijile chopol chc'opoj ta stojol li xchi'ile; yan li boch'o bije mu'yuc c'usi chalbe li xchi'ile.

¹³ Li boch'o mu xmac ye ta lo'ile ta xal batel li c'usi mu stac' xvinaje; yan li boch'o lec c'usi tsnope mu xal batel li c'usi mucule.

¹⁴ Ti bu mu'yuc bij jpasmantale, ta xch'ay ta be li lume; yan ti bu oy ep jtojobtasvanejetique, jun no'ox yo'ntonic.

¹⁵ Ta sta ep svocol li boch'o tsva'an sba ta piarol yu'un li boch'o mu xotquine; yan li boch'o mu stic' sba ta piarole jun yo'nton.

¹⁶ Li lequil antse tsta ich'el ta muc', li boch'o tsots xu' yu'unique tsta sc'ulejalic.

¹⁷ Li boch'o chc'uxubinvane ta xc'uxubin sba stuc chc'ot; yan li boch'o toj simarone ta xuts'inta sba stuc.

¹⁸ Li boch'o chopole chopol stojol chich'; yan li boch'o lec c'usi tsts'une toj lec smoton chich'.

¹⁹ Me ja' ta jpastic li c'usi tuq'ue ja' sventa cuxlejal; yan me ja' ta jpastic c'usi chopole ja' sventa lajel.

²⁰ Li muc'ul Diose toj chopol chil li boch'otic chopol yo'ntonique; yan li boch'o tuc' yo'ntonique toj lec chil.

²¹ Ta jbel sc'oplal ta ono'ox stoj smul li boch'o chopolique; yan li boch'o tuc' yo'ntonique colem ta xcomic.

²² Li jun c'ac'al ants ti mu'yuc c'usi sna'e ja' jech chac c'u cha'al xotxot c'anal taq'uin xojol ta sni' jcot chitom.

²³ Li boch'o tuc' yo'ntonique ja' no'ox oy ta yo'nton tsc'anic li c'usi leque; yan li boch'o chopolique ja' no'ox tsmalic li stojol smulique.

²⁴ Li boch'o chac' c'usi oy yu'une ta stabe ep xq'uexol; yan li boch'o toj t'ut'e ta spas ta me'on.

²⁵ Li boch'o toj lec yo'ntone lec chbat yu'un scotol; li boch'o ep chaq'ue ep ta xich' ec.

²⁶ Li boch'o te no'ox tsnac' strigoe chopol sc'oplal yu'un xchi'iltac; yan li boch'o ta xchone lec ch-ilat.

²⁷ Li boch'o ja' tspas batel c'usitic leque lec chbat yu'un; yan li boch'o ja' tspas o c'usi chopole tsoc batel o.

²⁸ Li boch'o ja' spatoj yo'nton yu'un sc'ulejale chch'ay batel; yan li boch'o tuc' yo'ntonique lec yoxic o jech chac c'u cha'al chq'uexin yanal te'.

²⁹ Li boch'o tsoquesbe yo'nton xchi'iltac te ta snae mu'yuc c'usi tsta o; li boch'o bole ja' chich' mozoinel yu'un li boch'o bije.

³⁰ Li yabtel boch'o tuc' yo'ntone ja' chac' cuxlejal; li boch'o ch-ic'van ta lequil bee ja' bij.

³¹ Me ta ono'ox xich'ic vocol li' ta banamil li boch'otic tuc' yo'ntonique, buuc xa li boch'o chopol yo'ntonique xchi'uc li jmulaviletique, toj tsots chich' svocolic.