Proverbios 10 - Bible in Tzotzil de Chenalhó with Deuterocanon

Sc'oplal c'usi tsta li boch'o lec xchi'uc boch'o chopole

¹ Li bic'tal lequil chanubtaseletic laj yal Salomone ja' li'i: Li bijil ol-nich'onile toj xcuxet no'ox yo'nton yu'un li stot sme'e; yan li bol ol-nich'onile chac'be svocol li stot sme'e.

² Me ta chopol c'u x'elan ta jtatic jc'ulejaltique, mu'yuc stu chc'ot; yan me ta lec c'u x'elan ta jtatique, jun co'ntontic.

³ Li Muc'ul Diose mu xac' lajuc ta vi'nal li boch'otic tuc' yo'ntonique; yan li boch'otic chopol yo'ntonique mu xac' nojuc xch'utic.

⁴ Li boch'o mu x'abteje me'on no'ox; li boch'o lec x'abteje lec jc'ulej.

⁵ Li boch'o tstsob c'usi chloc' yu'un ta yorail c'aoje ja' bijil vinic, yu'un lec sna' snopel; yan li boch'o ta xvay ta yorail c'aoje ta xac' sba ta q'uexlal.

⁶ Li boch'o tuc' yo'ntone tsta ep bendición; yan li boch'o chopole xu' chmacbat ye ta sventa li vocol tstae.

⁷ Li lequil vinique mu xlaj ta na'el o; yan li chopol vinique chch'ay ta o'ntonal o.

⁸ Li boch'o bije chich' ta muc' li mantal ch-albate; yan li boch'o bol xlo'ilaje ta sta ep svocol.

⁹ Li boch'o stamoj batel tuq'uil bee jun no'ox yo'nton; yan li boch'o yan be stamoj batele ta soc o sc'oplal.

¹⁰ Li boch'o chquem-sativane ta xlic c'op yu'un; li boch'o toj bol xlo'ilaje ta soques sc'oplal stuc.

¹¹ Li boch'o tuc' yo'ntone ja' jech chac c'u cha'al nio' sventa cuxlejal li c'usi chloc' ta yee; yan li boch'o chopol yo'ntone chmac ye o ta scoj li vocol tstae.

¹² Li c'ac'al o'ntonale ta xlic c'op yu'un; yan li c'anvaneje chch'ayes ta co'ntontic li c'usi chopol chc'ot ta pasele.

¹³ Li sc'op boch'o bije te ta jta o jbijiltic; yan li boch'o bole ja' no'ox tsta vach'te'.

¹⁴ Li boch'o bije ta to x'epaj li sbijile; yan li boch'o bol xlo'ilaje jeche' no'ox chac' svocol.

¹⁵ Li spojobbail jc'ulejetique ja' li sc'ulejalique; li slajel xchamel me'onetique ja' li sme'onalique.

¹⁶ Li stojol chich' boch'o tuc' yo'ntone ja' li cuxlejale; li c'usi tsc'aj jun chopol vinique ja' li smule.

¹⁷ Li boch'o chch'un chanubtasele ja' chanov batel ta sbelal cuxlejal; yan li boch'o mu sc'an chanubtasele ch'ayem ta be.

¹⁸ Li boch'o xti'et yo'nton ta mucule xco'laj xchi'uc epalc'op tspas; li boch'o tspucbe sc'oplal xchi'ile ja' bol cristiano.

¹⁹ Li boch'o toj ep chlo'ilaje ep tsta smul; yan li boch'o tspajes yee ja' bij.

²⁰ Li boch'o tuc' yo'ntone ja' jech chac c'u cha'al lequil c'anal taq'uin li yoq'ue; yan li boch'o chopole mu'yuc c'usi stu o li yo'ntone.

²¹ Li sc'op boch'o tuc' yo'ntone ep boch'otic chbijub yu'un; yan li boch'o bole te chcham o ta scoj li sbolile.

²² Li bendición yu'un Muc'ul Diose ja' jc'ulejaltic chc'ot; mu jta jvocoltic yu'un.

²³ Li boch'o bole xcuxet no'ox yo'nton tspas li c'usi chopole; yan li boch'o tuc' yo'ntone ja' xcuxet yo'nton yu'un li sbijile.

²⁴ Li boch'o chopole ja' chtal ta stojol li c'usi chi' yu'une; yan li boch'o tuc' yo'ntone ja' tsta li c'usi tsc'ane.

²⁵ Li boch'o chopole ja' jech chch'ay batel jech chac c'u cha'al li c'usi chcuch batel sutub iq'ue; yan li boch'o tuc' yo'ntone te oy o sbatel osil.

²⁶ Me chavac'be yabtel jun ch'ajil vinique ja' jech chc'ot jech chac c'u cha'al tstsic' stanal ave yu'un li c'usi toj poje; ja' jech chc'ot jech chac c'u cha'al c'alal ch-och ch'ayil ta asat.

²⁷ Li yich'el ta muc' Muc'ul Diose ja' chijcuxi yu'un; yan li boch'o chopole ta xtuch' no'ox yorail.

²⁸ Li c'usi smalaojic li boch'o tuc' yo'ntonique ja' sventa xcuxet yo'ntonic; yan li c'usi smalaojic boch'otic chopolique ja' li lajebale.

²⁹ Li Muc'ul Diose chchabi li boch'otic lec c'usi tspasique; yan li boch'otic chopol c'usi tspasique ta xules.

³⁰ Li boch'otic tuc' yo'ntonique mu xloc' o ti bu tsta yavilique; yan li boch'otic chopol yo'ntonique mu xnaquiic o te ta banamil.

³¹ Li sc'op boch'o tuc' yo'ntone chijbijub yu'un; yan li boch'o chopole chlic yich' macbel ye.

³² Li boch'o tuc' yo'ntone puru lec c'usi chloc' ta ye; yan li boch'o chopol yo'ntone puru chopol c'usi chal.