Proverbios 1 - Bible in Tzotzil de Chenalhó with Deuterocanon

Sc'oplal bic'tal lo'iletic sventa chanubtasel

¹ Bic'tal lequil chanubtaseletic yu'un Salomón xnich'on David, ajvalil ta Israel,

² chtun ta sventa bijubtasel, xchi'uc ta sventa xchanel c'usitic lec, yu'un ja' chac' jna'tic lequil chanubtaseletic;

³ chac' jna'tic lequil tojobtasel, tuq'uibtasel, sventa chquich' lec jmelol jamtic.

⁴ Chtun ta sventa chbijubic li boch'otic mu sna'ic c'usitic lec ta pasele; xchi'uc ta sventa ta xjam lec satic li alab nich'nabetique.

⁵ Li boch'o bij ti xa'ibe lec smelole, ta to xbijub batel; ep to ta xchan batel c'usi lec ta pasel.

⁶ Jech chlic ya'ibe lec smelol c'u x'elan li chanubtasel xchi'uc tojobtasele; cha'ibe lec smelol c'usitic chalic li boch'otic bijique, xchi'uc li c'usitic vocol ta a'ibel smelole.

⁷ Li sliqueb c'u x'elan chijbijube ja' ti chquich'tic ta muc' li Muc'ul Diose; li boch'otic bolique ta sbajic li bijubtasel xchi'uc chanubtasele.

Bijubtasel ta sventa alab nich'nabetic

⁸ Jnich'on, a'yo me lec ava'ay c'u x'elan chaxchanubtasot li atote; mu me xabaj li bijubtasel chayac'bot ame'e.

⁹ Yu'un ja' scoronail ajol chc'ot ti lec c'upil sbae, xchi'uc ja' anats' chc'ot.

¹⁰ Jnich'on, me oy tsc'an chaslo'laot li jpasmuliletique, mu me xach'un.

¹¹ Me oy jech chayalboxuque: “La' chi'inuncutic; jq'ueltic c'u x'elan xu' ta jmiltic li boch'ouc no'ox chjelove; la' cac'betic li boch'o mu'yuc smule,

¹² cuxul la' jtsactic jech chac c'u cha'al boch'o chbalch'uj yalel ta xabe; scotlijil la' jmich'tic jech chac c'u cha'al boch'o ch-och ta ch'ene.

¹³ Jech ta jtatic ep ta chop jc'ulejaltic; xu' ta jnojes jnatic yu'un li c'usitic ta jpojtique.

¹⁴ La' me, la' naban aba ta jtojolcutic ec, jech co'ol cu'untic scotol li c'usitic ta jtatique”, me xayutique,

¹⁵ mu me xbat achi'in; mu me co'oluc xaxanov achi'uc, voc'o me aba.

¹⁶ Yu'un ja' stamojbeic sbelal li c'usi chopole; ja' no'ox oy ta yo'ntonic ti chbat milvanicuc ta orae.

¹⁷ Altic tspas syoquic ti me i'ilatic yu'un li mutetique.

¹⁸ Ja' no'ox ta xuts'inta sba stuquic; ja' no'ox ta smil sba stuquic.

¹⁹ Ja' jech tstaic li boch'otic ja' no'ox tsa' c'usi tsc'an yo'ntonic ta sventa uts'intavaneje, jech xu' chmilatic o yu'un li c'usi chich'ique.

Li bijubtasele xvulvun ch-ic'van

²⁰ Li bijubtasele te xvulvun ta xoraltic, x'avet no'ox ta ch'ivit.

²¹ Te chc'opoj ta yavil muc'tiquil tsobajel; te ta xal ta sti' yochebal lum li tojobtasel yu'une.

²² Jech ta xal li bijubtasele: “Vo'oxuc ti mu c'usi xana'ique, ¿me lec no'ox chava'yic ti jech oyoxuc oe? Vo'oxuc li jlabanvanejoxuque, ¿baq'uin to chacomtsanic li labanvaneje? Vo'oxuc ti boloxuque, ¿baq'uin to chacomtsanic sna'leel li chanubtasele?

²³ La' a'yo ava'yic li taq'uiel cu'une. Ta jbusanboxuc li sbijil jol co'ntone; ta xcac'boxuc ana'ic li c'usi oy ta co'ntone.

²⁴ Laj xa quic'oxuc pero mu xach'unic; la jbech li jc'obe, pero muc xavich'ic ta muc'.

²⁵ Ja' no'ox laj abajic li tojobtasel cu'une; mu'yuc stu laj ava'yic li taq'uiel cu'une.

²⁶ Li vu'une xitse'in no'ox ec ti c'alal chata avocolique; ta jlabanoxuc ec ti c'alal oy xi'el chava'yique.

²⁷ C'alal ta xa xasmiloxuc o chava'yic li xi'ele, xchi'uc c'alal toj tsots chtal avocolic jech chac c'u cha'al sutub iq'ue, xchi'uc c'alal toj tsots at-o'nton, toj abul xa aba chava'yique,

²⁸ ja'o te chlic c'opojanic ta jtojol, pero mu'yuc ta jtac'boxuc; chasa'icun pero mu xataicun,

²⁹ yu'un laj abajic li chanubtasele; muc xac'an xavich'ic ta muc' li Muc'ul Diose.

³⁰ Muc xach'unic li jmantale; muc xavich'ic ta muc' noxtoc li taq'uiel cu'une.

³¹ Te chalo'be sat atuquic li c'usi chats'unique; te chlic yac'boxuc avocolic li c'usi chopol chanopique.

³² Yu'un li stoyobbail boch'otic mu'yuc bijique te chmilatic o yu'un; li c'usi lec tsta scuyojic li boch'o bolique te chlaj o xchi'uquic.

³³ Yan li boch'o tspas c'usi chcale, jun no'ox yo'nton; mu xlo'ilaj yo'nton, mu xi' me oy c'usi xi'bal sba chtal ta stojole”, xi li bijubtasele.