Oseas 9 - Bible in Tzotzil de Chenalhó with Deuterocanon

Li Osease laj yal ti tstoj smul li Israele

¹ Israel, mu me xcuxetuc no'ox avo'nton; mu me xabitubajuc no'ox jech chac c'u cha'al li yantic lume, yu'un mulivajemot, laj xa acomtsan li Dios avu'une. Toj lec ava'ay xch'amel stojol ti lamulivaj te ta smajubiltac trigoe.

² Mu'yuc chloc' atrigoic xchi'uc ya'lel ats'usubic; mu'yuc chabalinic li ya'lel ats'usubique.

³ Muc teuc chanaquiic o ta sbanamil li Muc'ul Diose. Li Efraine persa tsut batel ta Egipto xchi'uc ta Asiria; te tsve'ic ve'liletic ti mu stac' chave'ique.

⁴ Mu'yuc xa bu chavaq'uic o ya'lel ts'usub ta stojol li Muc'ul Diose, xchi'uc mu'yuc xa stu cha'ilbatic li milbil matanal chavaq'uique. Ja' jech cha'ilbatic jech chac c'u cha'al ve'lil sventa at-o'nton, ti chopol chcom li boch'o tsve'e. Yu'un li ve'lil le'e ja' no'ox sventa chave' atuquic; mu xu' chavich'ic batel ta xch'ulna li Muc'ul Diose.

⁵ ¿C'usi chapasic ti c'alal tsta yorail muc'ta q'uin yu'un li Muc'ul Diose, xchi'uc ti c'alal tsta sc'ac'alil chapasic li yan q'uine?

⁶ Me lacolic to ta milele, ja' ta stsoboxuc batel li Egiptoe; te chavich'ic muquel ta Menfis. Li saquil taq'uin avu'unique ta xpix ta ch'ixetic; li anaique ta xmac ta chopol vomoletic.

⁷ ¡Ic'ot xa yorail chtal li vocole! ¡Ista xa sc'ac'alil chtal li stojol mulile! Israeletic, ta to xavilic ti ta melel ja' xa yoraile. Ac'o me jech chavalic li' ta orae: “Li j'alc'ope ja' jun bol cristiano. Li vinic ti chc'opanat yu'un Dios yaloje vovijem sjol”, xachiic. Ja' ta scoj ti toj chopoloxuque, ti toj chopol avo'ntonic cu'une.

⁸ Li Dios cu'une yac'ojun ta toyol q'uelub osil ta stojol li Efraine. Pero li vo'oxuque chac'an chayaquicun ti buyuc no'ox chibate; c'alal te oyun ta ch'ulna yu'un Diose, te chacontrainicun.

⁹ Vo'oxuc ech'em chopol labatic jech chac c'u cha'al ta yorail Gabaae. Pero li Diose mu xch'ay ta yo'nton li amulique; ta ono'ox xayac'boxuc atojic.

¹⁰ Jech chal li Diose: “C'alal la jta li Israel ta vo'onee, toj xcuxet no'ox co'nton, jech chac c'u cha'al boch'o tsta sat ts'usub ta xocol banamil. Li amoltotaquic ta vo'onee ja' jech laj quilic jech chac c'u cha'al sba sat higo ti ba'yuc chyijube. Pero c'alal ibatic ta stojol Baal-Peore, laj yac' sbaic o ta q'uexlal ta stojol li c'usi mu'yuc stue. Toj chopol laj quilic o, jech chac c'u cha'al li c'usitic laj yich'ic ta muq'ue.

¹¹ Li slequilal yutsilal Efraine chvil batel jech chac c'u cha'al mut. Jech mu'yuc xa chvoc' ololetic yu'unic; mu'yuc xa ch-ayin xch'ut antsetic; mu'yuc xa ta xchi'in yolic o.

¹² Ac'o me oy bu chch'i li squeremique, ta jpojbeic loq'uel ta stojolic. ¡Toj abul sbaic ec c'alal me ta jvoc' jba loq'uel ta stojolique!

¹³ Li Efraine ja' jech chquil jech chac c'u cha'al lum Tiro ti oy ta lequil banamile, pero tsta yorail persa tsloq'ues batel xnich'nab sventa chac' ta milel”, xi li Diose.

¹⁴ Muc'ul Dios, pasbo li c'usi anopoj chapasbee. Paso mantal ti ac'o yaluc yol xnich'onique; ac'o mats'uc o ya'lel xchu' li antsetic yu'unique.

¹⁵ Jech chal noxtoc li Diose: “Te ta Gilgal lic spasic scotol li c'usitic chopole, ja' te lic jbajic o tal. Ta scoj xchopol abtelic ta jloq'uesic o ta jna; mu'yuc xa bu ta jc'anic o. Scotol li banquilaletic yu'unique puru jbajmantaletic.

¹⁶ Li Efraine ochbajem xa ta be yu'un xtuch'emal taquin xa li yibele; mu xa xac' o sat. Ac'o me ch-alaj chnich'najic to, vu'un ta jmilbe”, xi li Diose.

¹⁷ Li cristianoetic le'e chbajatic o yu'un li Dios cu'une yu'un mu sc'an xich'beic ta muc' li sc'ope. Jech buyuc xa no'ox chch'ayic o batel ta yantic banamil.