Oseas 8 - Bible in Tzotzil de Chenalhó with Deuterocanon

I'ilin Dios ta scoj ti ja' chich'ic ta muc' sloc'obal diosetic li israeletique

¹ Jech chal li Diose: “Jupano li oq'uese, yu'un ac'o yaluc tal stojol mulil ta stojol li cu'untaque; ja' jech chyal tal jech chac c'u cha'al xic. Yu'un muc xich'ic ta muc' li c'usi jchapanoje; la stacchiquintaic li mantaletic cu'une.

² Ta to x'avanic ta jtojol li israeletique: ‘Dios cu'un, jna'ojcutic ti vo'ot Diosot cu'uncutique’, xiic.

³ Pero li Israele la sbaj li c'usi leque, ja' yu'un ac'o nutsatuc yu'un li yajcontrae.

⁴ “Li ajvaliletic yu'unic la sva'anique muc t'ujbiluc cu'un; c'alal la st'ujic li banquilaletic yu'unique, muc xca'ay. La spasic loc'ometic ta saquil taq'uin, ta c'anal taquin sventa chich'ic ta muc', pero ja' no'ox sventa chich'ic ulesel o.

⁵ Samaria, toj chopol chquil li sloc'obal ch'ium vacax laj avich' ta muq'ue. Bats'i ilinemun ta sventa, yu'un mu xalecubic yu'un.

⁶ Li sloc'obal ch'ium vacax ta Samariae mu ja'uc Dios. Pasbil no'ox ta c'abal yu'un li boch'o lec sna' spasel te ta Israele, ja' yu'un ta xich' lilinel.

⁷ Yu'un puru chopol c'usi la sts'unic, jech puru vocol ta sc'ajic. Mu'yuc chac' sat li strigoique, jech mu'yuc tspasic o harina. Me oy bu iloc' jutuc yu'unique, yan cristianoetic ta sve'ic.

⁸ ¡Ta xich' tsalel o li Israele! Mu'yuc stu ch-ilat o te ta stojol yanlum cristianoetic jech c'u cha'al bin ti mu'yuc stue.

⁹ Yu'un ja' ibatic ta stojol li Asiriae, ja' jechic jech chac c'u cha'al te'tical buro ti toj simarone. Li Efraine la sman ta taq'uin li boch'otic tsc'an tsco'lajes yo'nton xchi'uque.

¹⁰ Ac'o me smanojic ta taq'uin li yantic banamile, pero vu'un ta jpuquic batel, yu'un ac'o ac'batuc svocolic yu'un li muc'ta ajvalil ta Asiriae.

¹¹ “Li Efraine la spas ep scajleb matanaletic sventa chch'ay smul, pero ja' no'ox itun ta sventa la sta smul o.

¹² Ac'o me la jts'ibabeic li lequil mantaletic cu'une, pero toj yan o ta a'yel laj ya'yic.

¹³ Lec xa'yic yaq'uel li milbil matanale xchi'uc sti'bel li sbec'tale, pero mu'yuc lec chquil li c'usi tspasique. Mu xch'ay ta co'nton li c'usi chopol tspasique. Ta xcac'be stoj li smulique, jech ta sutic batel ta Egipto banamil.

¹⁴ Li Israele la spas muc'tic pasubmantaletic; ich'ay ta yo'nton li Jpasvanej yu'une. Li Judae la spas ep lumetic setbilic lec ta coralton, pero vu'un ta xcac'be sc'ac'al li lumetic yu'une, jech ta xc'ac' o li spasubmantal ajvaliletique”, xi li Diose.