Oseas 7 - Bible in Tzotzil de Chenalhó with Deuterocanon

¹ c'alal ta jc'an ta jpoxta li Israele, ja' ta xlic vinajuc smul li Efraine; ta xlic vinajuc xchopolil li Samariae. Yu'un scotolic puru lo'lavanej tspasic. Ta x'och elec'ajicuc ta nanatic; ta xbat svilubtaic li cristianoetic ta xoraltique, yu'un tspojbeic c'usi oy yu'unic.

² Mu snopic ti jna'ojbe scotol li smulique. Setubil chc'otic yu'un li c'usi tspasique, yu'un scotol c'ac'al oy ta jsat.

Chopol yabtelic li ajvaliletique

³ “Li ajvalile xcuxet no'ox yo'nton yu'un li xchopolilic cu'untaque; li banquilaletique ja' xa lec cha'yic ti puru epalc'op tspasic li jteclumale.

⁴ Scotolic puru jpasmuliletic; ja' jechic jech chac c'u cha'al horno ti te tsanal o sc'ac'al ti muc persauc chchuch li jpaspan c'alal chlic svots' arinae xchi'uc ti c'alal to chpajube.

⁵ C'alal ja' sq'uinal li ajvalil yu'unique, li banquilaletique ibolibic ta pasem ya'lel ts'usub, c'alal ta ajvalil mu xa'ay ti co'ol tstsacbe sba sc'obic xchi'uc li jlabanvanejetic yu'une.

⁶ Ja' laj yac' yo'ntonic o spasel c'usi chopol jech chac c'u cha'al horno ti te tsanal oe. Ac'o me chvay sjunul ac'ubal li yajval hornoe, pero te tsanal o c'alal to tsacub osil.

⁷ Tsanajtic scotolic jech chac c'u cha'al horno, jech laj yulesic li jchapanvanejetic yu'unique. Iyalic ta lum scotol li ajvaliletique, me junuc mu'yuc xa boch'o ta sc'anbun vocol.

Li israeletique la svoc' sbaic ta stojol Dios

⁸ “Li Efraine capijem xa ta yantic lum. Li Efraine ja' jech chac c'u cha'al vaj ti jot no'ox ta'ajeme.

⁹ Mu sna' ti ja' ilajesbat stsatsal yu'un li yanlum cristianoetique, xchi'uc mu sna' ti sacuben xa sbejlijil sjole.

¹⁰ Li stoyobbail Israele ja' chlic sva'an sba ta scontra stuc. Pero mu ono'ox sut o ta stojol li Muc'ul Dios yu'une; mu'yuc bu chlic sa', mu'yuc bu chlic st'un.

¹¹ Li Efraine ja' jech chac c'u cha'al stsumut ti mu sna' c'usi tspase. Yu'un chbat sc'an coltael yu'un li Egiptoe; ts'acal te chbat ta stojol Asiria noxtoc.

¹² C'alal ta xbate, ta jlich'anbe jch'ojon ta sbeic; ta x'ochic ta yoquil jech chac c'u cha'al mutetic. C'alal chvinaj ti ep xviletic tale, ta xcac' bajicuc yalel, jech te ta jtsaquic o.

¹³ “¡Toj abul sbaic ti la snamajes sbaic ta jtojole! Ta xtal slajel xchamelic ta scoj ti stoyoj sbaic ta jtojole. Ta jc'an ox ta jcoltaic, pero ch-epalc'opojic ta jtojol.

¹⁴ Ac'o me x'avetic ta sc'anel vocol ta jtojol ta svayabic, pero muc ta scotoluc yo'nton chisc'opanicun. C'alal chisc'anbicun trigo xchi'uc ya'lel ts'usube, ta sbojilan sbec'talic, jech ta stoy sbaic ta jtojol.

¹⁵ Ac'o me vu'un la jbijubtasic, ac'o me vu'un laj cac'be stsatsal yoc sc'obic, pero chopol c'usi tsnopilanic ta jtojol.

¹⁶ Mu ja'uc li' italic ta jtojol, vu'un ti oyun ta toyole. Ja' jechic jech chac c'u cha'al st'ilesubil flecha ti mu xt'abe. Li banquilaletic yu'unique ta xmilatic ta espada ta scoj ti stoyoj sbaic xchi'uc yeique, jech chich'ic na'leel o yu'un li egiptoetique”, xi li Diose.