Oseas 6 - Bible in Tzotzil de Chenalhó with Deuterocanon

Tsc'an Oseas ti tsutic ta stojol Muc'ul Dios li israeletique

¹ La'ic acotolic, sutcutic batel ta stojol li Muc'ul Diose. Ja' laj yac' jvocoltic, ja' chixpoxtautic noxtoc; ja' la syayijesutic, ja' chixpixbutic noxtoc.

² Ta jun chib no'ox c'ac'al xu' chijtsatsub yu'un; ta yoxibal c'ac'ale chiscuxesutic lec, jech lec cuxul chijcom ta stojol.

³ Cac'tic persa yotquinel batel li Muc'ul Diose. Ta ono'ox xtal ta jtojoltic, jech chac c'u cha'al sac osil ti chtal ono'oxe. Ta ono'ox xtal ta jtojoltic, jech chac c'u cha'al vo' ti sob chyal, xchi'uc ti ts'acal chyale.

Sc'oplal c'usi laj yal li Muc'ul Diose

⁴ Jech chal li Muc'ul Diose: “¿C'usi xu' ta jpasbot Efraín? ¿C'usi xu' ta jpasbot Judá? Li c'anel avac'ojbicune ta sacch'ay batel jech chac c'u cha'al lumal toc ta jujun sob; ta x'ul batel jech chac c'u cha'al job osil ta jujun sob.

⁵ Ja' yu'un biq'uitic la jlilinoxuc ya'yel ta sventa c'usi laj yal li j'alc'opetic cu'une, la jmiloxuc ta sventa li c'usi laj cale. Li chapanel cu'une xleblej no'ox tal ta atojolic jech chac c'u cha'al sacsevul.

⁶ Yu'un ja' ta jc'an ti j'ech'el chac'anicune; mu ja'uc no'ox ta jc'an ti chamilbicun jmotone. Ja' tsots sc'oplal chca'ay ti chavotquinicun vu'un li Diosune; mu ja'uc no'ox tsots sc'oplal ti chachic'bicun jmotone.

⁷ “Li cu'untaque ja' co'olic jech chac c'u cha'al li Adane; la soquesic li c'usi jchapanoje jech la sta smulic ta jtojol.

⁸ Li Galaade ja' lum ti toj chopol c'usi tspasique; solel bonolic o ta ch'ich'.

⁹ Li paleetique ja' jechic jech chac c'u cha'al jtsob j'eleq'uetic ti oy boch'o tsmalaic ta bee. Ja' jech chmilvanic te ta sbelal Siquem li paleetique, ja' yu'un la spasic o li c'usi toj chopol ta pasele.

¹⁰ Li smomnich'nabtac Israele toj ep xchopolilic laj quil. Li Efraine mulivajem ta jtojol; li Israele sbolibtasoj sba o.

¹¹ Li vo'ote Judá, chapal xa cu'un c'usi ora chavich' tuch'el loq'uel. “C'alal ta jc'an ta jcolta loq'uel tal ta yan banamil li jteclumale,