Oseas 5 - Bible in Tzotzil de Chenalhó with Deuterocanon

¹ “Paleetic, a'yo ava'yic; israeletic, ts'e'ano lec achiquinic; smomnich'nab ajvaliletic, tuc'ulano lec ava'yic. Yu'un ja' ta aventaic li stojol mulile, yu'un li vo'oxuque xco'laj xchi'uc jyacvanej lac'otic te ta Mizpa; vo'oxuc laj alich'anbeic yoc' ch'ojon te ta vits Tabor.

² Solel yolbaj laj anatubtasbeic xchac li joc' te ta soplejaltic Sitime, ja' yu'un ta xcac'boxuc atoj amul acotolic.

³ Li Efraine lec xcotquin; li Israele lec jna' c'u x'elan oy. Li Efraine xco'laj xchi'uc mulivajem ta jtojol; li Israele sbolibtasoj xa sba”, xi li Muc'ul Diose.

⁴ Mu xa x'aq'ue suticuc tal ta stojol Dios yu'unic ta scoj ti chopol c'usi tspasique, yu'un ja' ventainbilic o yu'un li stsatsal mulile, jech mu xa xotquinic o li Muc'ul Diose.

⁵ Li stoyobbail Israele ja' chlic joybijuc ta scontra stuc. Li Efraine te chlic sbosi yacan ta smul stuc; jech ec li Judae te nabal chyalic ta lum.

⁶ C'alal tsa'ic li Muc'ul Diose, chac'beic smotonin xchijic xvacaxic, pero mu staic, yu'un laj xa svoc' sba batel ta stojolic.

⁷ Yu'un mu junuc yo'ntonic ta stojol li Muc'ul Diose; i'ayin xnich'onic, pero yan o boch'o la stotin yu'unic. Ta sventa ti jech la spasique, ta anil no'ox chlajic; jech chbat o ta yan li yosil sbanamilique.

Ta stoj smul li Israel xchi'uc Judae

⁸ ¡Jupanic cachu te ta Gabaa; jupanic oq'ues te ta Ramá! ¡Avananic sventa pasc'op te ta Bet-avén! ¡Batan me ta pasc'op, Benjamín!

⁹ Li Efraine yavnaijem chcom o ti c'alal tsta yorail tstoj smule, yu'un chcac' ta ilel ta stojol scotol jaychop israeletic ti melel chc'ot ta pasel c'usi chcale.

¹⁰ Jech chal li Muc'ul Diose: “Li banquilaletic ta Judae ja' jechic jech chac c'u cha'al li boch'otic ta snet'ic jelovel sts'aquil osile. Ja' yu'un ta jmalbe tal ta sbaic jech chac c'u cha'al pulel ta vo' li sc'ac'al co'ntone.

¹¹ Li Efraine uts'intabil chcom; pech'bil ta teq'uel chcom ta scoj smul, yu'un ja' lec laj ya'ay laj yich' ta muc' li c'usi mu'yuc stue.

¹² Ja' yu'un li vu'une chicom jech chac c'u cha'al xjoch' ta stojol li Efraine; chicom jech chac c'u cha'al jc'uxte' ta stojol li Judae.

¹³ C'alal tsacbil ta chamel cha'ay li Efraine, c'alal chil ti chc'a' sbec'tal li Judae, li Efraine ta xbat sc'an coltael ta stojol li ajvalil ta Asiriae; ta stac batel j'almantal ta stojol li muc'ta ajvalile. Pero mu xu' yu'un chcoltavan; mu xpoxtaj yu'un li chamele.

¹⁴ Li vu'une xco'laj xchi'uc leonun chic'ot ta stojol li Efraine; xco'laj xchi'uc ch'ium león chic'ot ta stojol li Judae. Vu'un jtuc chbat jlilin, chbat jvoch'i; mu'yuc boch'o tscolta loq'uel ta jc'ob.

¹⁵ “Ta ora chisut batel yo' bu oyune, ja' to me laj yotquinic li smulique, ja' to me tal sa'icune. C'alal me oy svocolique, ja' to chisa'icun”, xi li Diose.