Oseas 4 - Bible in Tzotzil de Chenalhó with Deuterocanon

Smul israeletic xchi'uc paleetic

¹ Israeletic, a'yo ava'yic c'usi chal li Muc'ul Diose. Chalbe ta jamal smul li jnaclumetic li' ta avosilalique, yu'un mu'yuc xa c'usi melel, mu'yuc xa c'uxubinel; mu'yuc xa boch'o xotquin Dios li' ta avosilalic.

² Ja' no'ox epajem li epalc'ope, li lo'lavaneje, li milvaneje, li eleq'ue, li mulivajele, xchi'uc li sa' c'ope. Isoc xa o ta j'ech'el, puru milbail xa no'ox.

³ Ja' yu'un ta xlic yat yo'nton li banamile; ta xyavinicajic li boch'otic te nacalique. Li chonbolometic ta te'tique, li mutetic ta vinajele, xchi'uc li choyetic ta nabe ta xchamic.

⁴ “Paleetic, mu me xatsac ta c'op achi'ilic mu me boch'o xavutic, yu'un mu'yuc lec chava'yic ec me jech chaspasboxuc achi'iltaquique.

⁵ Ta c'ac'altic lec chavich' li vo'oxuque; ta ac'ubaltic chich' ec li j'alc'opetique, ta jtu'pbe o sc'oplal li ats'unubalique.

⁶ Li jteclumale laj yich'ic ulesel, yu'un muc sna'ic spasel c'usi lec. Ta sventa ti laj ajip comel li abijile, jech ta jipot loq'uel ta paleal ec. Ta sventa ti lach'ay ta avo'nton mantaletic cu'un, vu'un li Diosun avu'une, jech ta jch'ay ta co'nton ec li amomnich'nabtaque.

⁷ “C'alal i'epajic li paleetique, i'epaj noxtoc li smulic ta jtojole, jech ta jc'atajesbeic ta xq'uexlalic ec li yich'elic ta muq'ue.

⁸ Ja' xa te xve' o cha'yic ta smul li jteclumale, toj jun xa yo'ntonic ti c'alal tspasic c'usi chopole.

⁹ Li jteclumale co'ol ta jpasbeic xchi'uc li paleetique; ta xcac'be stojic li c'usi la spasique.

¹⁰ Ta sventa ti la scomtsanbeic yabtel li Diose, ac'o me ta xve'ic, pero mu xnoj xch'utic; ta xmulivajic, pero mu x'epajic o.

Ja' laj yich'ic o ta muc' sloc'obal yantic diosetic li israeletique

¹¹ “Li mulivajele, li yuch'el pasem ya'lel ts'usube ja' chch'ayes li c'usi lec ta nopele, li c'usi lec ta pasele.

¹² Li jteclumale ja' tsc'anbeic coltael li te' yich'ojic ta muq'ue; ta jbej te' tsjaq'uic li c'usi chc'ot ta pasele. Yu'un lo'labilic o yu'un mulil jech chac c'u cha'al jmulavil ants. Ja' stamojic o li chopol bee; ja' la scomtsanic o Dios ta scoj ti puru mulil tspasique.

¹³ Chaq'uic milbil matanal ta jol vitsetic, xchi'uc la xchiq'uic pom ta bic'tal vitsetic, ta yolon tulantic, ta álamo te'tic, xchi'uc ta yolon c'antulantic ti bu lec pimic yanale. Ja' yu'un te imulivajic o li tsebetic yu'unique; la sc'opanic yan viniquetic li yalibique.

¹⁴ Pero mu'yuc ta xcac'be stoj smulic li tsebetic avu'unic ti chmulivajique; mu'yuc ta xcac'be stoj smulic li avalibic ti tsc'opanic yan vinique. Yu'un vo'oxuc atuquic ba'yuc chabatic ta stojol li jmulavil antsetique, xchi'uc co'ol chavaq'uic milbil matanal achi'uquic li chopol antse. Ja' yu'un sjunul jteclum ta xyalic o ta lum, yu'un mu'yuc sbijilic.

¹⁵ “Me chamulivaj li vo'ote, Israel, jechuc, pero mu me sa' smul ec li Judae. Mu me xabatic ta Gilgal xchi'uc ta Bet-avén; mu me xloc' ta aveic jbi: ‘Yiloj Dios’, mu me xachiic.

¹⁶ Yu'un li vo'ote, Israel, laj avoc' aba ta jtojol jech chac c'u cha'al tsebal vacax ti toj simarone. Mu'yuc xa ta jsa'bot ave'el jech chac c'u cha'al unin chijetic ti chich' sa'bel lec sve'ele.

¹⁷ Li Efraine laj xa yac' sba o ta stojol li sloc'obaltac sdiosique. ¡Jechuc! Ac'o spas c'usi tsc'an yo'nton stuc.

¹⁸ Batem yo'nton o ta yacubel; muc x'ech' yo'ntonic o ta mulivajel. Li banquilaletic yu'unique ja' la sc'anic o li c'usi chac' q'uexlale.

¹⁹ Ja' yu'un ta xcuchatic batel yu'un jun muc'ta ic'; te ta xyalic o ta q'uexlal, yu'un altic ti laj yac'beic smoton li sdiosique.