Oseas 2 - Bible in Tzotzil de Chenalhó with Deuterocanon

¹ Ja' yu'un jech xavalbeic li abanquil avits'inique: “Steclumal Dios”, utic. Jech xavalbeic li avix avixlalique: “Lec c'uxubinbiloxuc”, utic.

Mu'yuc tuc' yo'ntonic ta stojol Dios li israeletique

² Li Diose jech chayalboxuc: “¡Albeic ta sat smul li ame'ique, albeic ta jamal, yu'un mu xa ja'uc cajnil; muc xa vu'cun smalalun! Ac'o scomtsan yaq'uel ta ilel ta sat ti ja' jmulavil antse, ac'o sjip ta yo'nton li sc'upil vinictaque.

³ Yu'un naca me jloc'be sc'u' spoc', naca me t'anal jcomtsan jech chac c'u cha'al t'anal ono'ox ivoq'ue, naca me jcomtsan jech chac c'u cha'al xocol banamil, naca me puru taqui banamil chcom cu'un, jech xu' te ta xlaj o ta taqui-o'nal.

⁴ Mu'yuc ta jc'uxubinbe li yalabtaque, yu'un ja' yalab jmulavil.

⁵ Yu'un li ame'ique puru mulivajel la spas; li boch'o la svoq'uesoxuque la soques sc'oplal ti c'alal jech laj yale: ‘Ja' te chbat jchi'in li jc'upiltaque, yu'un ja' chiyac'bun jve'el xchi'uc ca'al; ja' chiyac'bicun jtsots, lino no, caceite, xchi'uc c'usitic chcuch'’, xi.

⁶ “Ja' yu'un ta jmacbe ta ch'ixetic li sbee; ta jmac ta coral, jech mu xa bu xjelov o.

⁷ Ta st'un batel li sc'upil vinictaque, pero mu sta; ta sa', pero mu sna' bu oy. Jech chlic yal: ‘Chisut batel, chbat jta li sba jmalale, yu'un ja' jun to'ox co'nton jchi'uc; yan li' ta orae mu junuc co'nton’, xi.

⁸ “Mu svules ta sjol ti vu'un laj cac'be li strigo, li ya'lel ts'usub, xchi'uc li yaceitee, xchi'uc ti vu'un laj quepajesbe li saquil taq'uin, li c'anal taq'uin laj yac' ta stojol Baale.

⁹ Ja' yu'un ta xquich'be sutel li jtrigo ti c'alal yorail chloq'ue, xchi'uc li ya'lel jts'usub ti c'alal yorail chyijube, xchi'uc ta jpojbe sutel li stsots, li slino no cac'ojbe sventa tsmac sba oe.

¹⁰ Ja' yu'un ta sat yajmultac ta xcac' ta ilel ti t'anale, mu'yuc boch'o xu' tscolta loq'uel ta jc'ob.

¹¹ Ta jlajesbe sc'oplal o li xcuxetel yo'ntone, li q'uinetic yu'une, li q'uin c'alal ch-uninaj ue, xchi'uc li sc'ac'alil chcux yo'ntone, xchi'uc scotol li muc'tic q'uinetic yu'une.

¹² Ta xculesbe o li ts'usubtic, xchi'uc li higotic yu'un ti jech laj yal ta sventae: ‘Li'i ja' laj yac'bicun li jc'upil vinictaque’, ti xie. Ta jc'atajesbe ta ch'ixtic, ja' chtal slo'ic li chonbolometic ta te'tique.

¹³ Ta xcac'be stoj ti jayib c'ac'al la xchic' pom ta stojol baaletique, xchi'uc ta sventa ti la sc'ac'ubtas sba lec ta staq'uinal xchiquin, ta snats' ti c'alal bat sta yajmultaque, yu'un la ch'ayun o ta yo'nton li vu'une”, xi li Muc'ul Diose.

Li Diose c'ux ta yo'nton steclumal, ja' li Israele

¹⁴ “Ja' yu'un vu'un jtuc ta xlic jcha'c'an; ta xquic' batel ta xocol banamil, te ta jtijbe yo'nton.

¹⁵ Te ta xlic cac'be sutel li ts'usubtic yu'une; li soplejaltic Acore, ja' ta xc'ot ta smuc'ul yo'ntonic. Ja' te ta stac'bun li ca'yej jech chac c'u cha'al ta stsebal to'oxe; jech chac c'u cha'al la xch'un ti iloc' tal ta Egiptoe.

¹⁶ Me la sta li sc'ac'alil le'e jech chlic yalbun: ‘Jmalal’, xiyutun. Chlaj sc'oplal ti ‘Baal cu'un’, xiyutune”, xi li Muc'ul Diose.

¹⁷ Ta jch'aybe o ta ye sbi li baaletique, jech mu xa xloc' o ta ye.

¹⁸ “Ta yorail le'e oy c'usi lec ta jchapan ac'o spasic li chonbolometic ta te'tique, xchi'uc li mutetique, xchi'uc li quiletel chonetique, pero ja' sventa alequilalic. Jech noxtoc ta jloq'ues batel ta avosilalic li flechae, li espadae, jech mu'yuc c'op chava'yic, jun no'ox avo'ntonic.

¹⁹ J'ech'el chaquic'ot o sbatel osil; bats'i jnup jchi'il jbatic o jech chac c'u cha'al chal li leye, yu'un scotol co'nton jc'anojot.

²⁰ Ta sjunul co'nton chquic'ot, jech chavotquinun ti vu'un Muc'ul Diosune.

²¹ Jech chcal vu'un li Muc'ul Diosune: Ta sc'ac'alil le'e ta jtac'be sc'op li vinajele; li vinajele ta stac'be sc'op ec li banamile.

²² Li banamile ta stac'be sc'op ec li trigo; li ya'lel ts'usub xchi'uc li aceitee jech ta stac'beic sc'op ec li Jezreele.

²³ Ta jts'un lec ta banamil, ja' cu'untac chc'otic o; ta xlic jc'uxubin li Lo-ruhamae. Li Lo-ammie jech chlic calbe: ‘Vo'ot jteclumalot’, xcut. Jech chiyalbun ec: ‘Vo'ot Diosot cu'un’, xiyutun”, xi li Muc'ul Diose.