Oseas 14 - Bible in Tzotzil de Chenalhó with Deuterocanon

Sc'anel vocol ta stojol Israel yu'un ac'o sutuc ta stojol Dios

¹ Israel, sutan tal yan velta ta stojol li Dios avu'une, yu'un yalemot ta lum ta scoj li amule.

² Sutanic tal ta stojol li Muc'ul Diose; c'anbeic vocol ta stojol, jech xavalic: “Pasbuncutic perdón scotol li jmulcutique; tsacbuncutic li c'usi lec chacac'botcutique. Li xq'uexol amoton chcac'cutique ja'uc li c'usi chloc' ta quecutique.

³ Li Asiriae mu xiscoltauncutic; mu xicolcutic noxtoc ti c'alal chijatovcutic ta ca'etique. Mu xa xcalbecutic, ‘Vo'ot diosot cu'uncutic’, mu xa xcutcutic li c'usi pasbil ta jc'obcutique, yu'un vo'ot no'ox ta aventa xu' tstaic c'uxubinel li me'onetique”, utic.

Li Muc'ul Diose laj yal ti tscolta yan velta li israeletique

⁴ Li Diose jech chal: “Vu'un ta jpoxtabe li yo'ntonic ti xtal xbat no'oxe; ta yutsil co'nton jtuc ta jc'anic, yu'un ilecub xa co'nton ta stojolic.

⁵ Ja' jech chic'ot yu'unic jech chac c'u cha'al job osil; xojobanic no'ox ta nich liquel jech chac c'u cha'al lirio nichim. Ta sts'un sba lec yibelic jech chac c'u cha'al te'etic ta Líbano.

⁶ Ta slim sba lec li sc'obc'obe. Ja' jech slequil chbatic jech chac c'u cha'al oliva te'; ja' jech smuil yic' chbatic jech chac c'u cha'al smuil yic' te'etic ta Líbano.

⁷ Li Israele ta xtal nacluc yan velta ta jyaxinal, jech lec ta xch'i jech chac c'u cha'al trigo. Lec ta xnichinic jech chac c'u cha'al ts'usub; ta xpuc lec sc'oplalic jech chac c'u cha'al ya'lel ts'usub chloc' ta Líbano.

⁸ Jech chlic yal li Efraine: ‘¿C'usi xa stu cu'un chquich' ta muc' li c'usitic cuybil ta diosetique?’, xi. Yu'un vu'un ta xca'ibe li sc'opique, vu'un ta jq'uelic. Ja' jech chic'ot yu'unic jech chac c'u cha'al jpets c'uc'toj ti lec yox oe; vu'un ta jventa xu' tsatinic lec”, xi li muc'ul Diose.

Slajeb c'op

⁹ Li boch'o bij ti xa'ibe lec smelole ac'o ya'ibe lec smelol li c'op li'i: Li be yu'un Muc'ul Diose lec tuc'. Li boch'otic tuc' yo'ntonique ja' te chanovic batel; yan li boch'otic chopolique te tsbosi yacanic.