Oseas 12 - Bible in Tzotzil de Chenalhó with Deuterocanon

¹ Li Efraine puru ic' no'ox ta sc'an; scotol ora ja' ta sa' li q'uixin ic' chtal ta sloq'uem c'ac'ale. Ch-epaj yu'un li puru epalc'ope xchi'uc li uts'intaele. Oy c'usi chchapanic xchi'uc li Asiriae, xchi'uc tstac batel aceite sventa smoton li Egiptoe”, xi li Diose.

² Li Muc'ul Diose chapal xa pleito yu'un ta sventa li Israele. Yu'un chac'be stoj c'usitic chopol spasoj li Jacobe; ja' jech chac'be stojol ti c'u x'elan yabtele.

³ C'alal tiq'uil to'ox ta yut xch'ut sme' li Jacobe la stsacbe ono'ox xchac yacan li sbanquile. Ts'acal to c'alal vinic xa'oxe, ta stsatsal la stsal sbaic xchi'uc yaj'almantal Dios.

⁴ C'alal la stsac sbaic xchi'uc yaj'almantal Diose, itsal yu'un. I'oc', la sc'an vocol, yu'un ac'o c'uxubinatuc. Te itaat ta Betel yu'un li Diose; te la sc'opan sbaic xchi'uc.

⁵ Ja' li Muc'ul Dios ti tspas ta mantal scotol te ta vinajele; Muc'ul Dios, xi li sbi ti otquinbil ta buyuc no'oxe.

⁶ Israel, sutan tal ta stojol li Dios avu'une; ja' xapas li c'usi leque, li c'usi tuq'ue, ja' no'ox ch'uno o ti chascoltaot li Dios avu'une.

⁷ Jech chal li Diose: “Li israeletique xco'laj xchi'uc jchonolajeletic ta Canaán. Mu'yuc ts'acal li skilo c'alal oy c'usi tsbise; ja' no'ox lec cha'ay li lo'lavaneje.

⁸ Li vo'ote, Efraín, jech chaval: ‘Jtaoj lec jc'ulejal, oy ep c'usitic oy cu'un. Mu'yuc boch'o c'usi xu' chal ta jtojol ta sventa li jcanale; mu'yuc boch'o xu' chalbun oy jmul ta sventa ti c'u x'elan la jtae’, xachi.

⁹ Pero vu'un li Muc'ul Diosun avu'un ti c'alal lic jloq'uesot tal ta Egiptoe, ta xlic cac' naclan ta carpana yan velta, jech chac c'u cha'al c'alal la jta jbatic te ta xocol banamile.

¹⁰ “Ep ta velta la jc'opanic li j'alc'opetique; ep c'usitic laj cac'be yilic, xchi'uc ep c'usitic loc'tabil ta lo'il laj cac'be yalic ta jventa.

¹¹ Ta Galaade puru chopol c'usi te oy; ja' yich'ojic ta muc' li c'usi cuybilic ta diose. Ta Gilgale puru vacaxetic ta smilic sventa smoton sdiosic, ja' yu'un li scajleb matanaletic yu'unique ta xc'ataj ta sbusleb tontic, ta sbusleb c'a'eptic”, xi li Diose.

¹² Li Jacobe ijatov batel ta Aram; li Israele tsots c'ot abtejuc te. I'och ta jchabichij sventa la stoj yajnil.

¹³ Li Muc'ul Diose ta sventa jun j'alc'op la sloq'ues batel ta Egipto li israeletique, xchi'uc ta sventa jun j'alc'op la xchabi batel noxtoc.

¹⁴ Li Efraine laj yac'be tsots svocol yo'nton Dios ta sventa ti toj chopol c'usi la spase. Ja' yu'un li Diose ta xac'be stoj ti c'u yepal la smal ch'ich'e; ta xac'be xcuch scotol li c'usi chopol spasoje.