Oseas 11 - Bible in Tzotzil de Chenalhó with Deuterocanon

Li Diose c'ux to ta yo'nton li jtoyba israeletique

¹ “C'alal biq'uit to'ox li Israele, toj lec jc'anoj. C'alal te oy ta Egipto li jnich'one, laj quic' loq'uel tal.

² C'alal te chquiq'uilanic oe, yantic to inamajic loq'uel ta jtojol. Ja' bat smilbeic smoton li baaletique; ja' bat xchiq'uic pom ta stojol li c'usi cuybil ta diosetique.

³ Vu'un la jnit li Efraine; la jchanubtas ta xanubal, pero muc sna' ti vu'un la jchabie.

⁴ Ta slequil co'nton laj quic' tal; ta yutsil co'nton la jnit tal ta jtojol. La jpatan tal ta sti' co'nton; la jcujan jba ta stojolic sventa laj cac'be sve'elic.

⁵ Pero muc sc'an xtalic ta jtojol, ja' yu'un ta sutic batel ta Egipto; ja' ajvalil ta xc'ot yu'unic li asiriaetique.

⁶ Ta xtal milel ta stojol li lumetic yu'unique; ta xlilij scotol li tsatsal coraltonetic yu'unique. Jech ta xchamic o ta scoj li c'usi chchapan stuquique.

⁷ Li jteclumale ja' no'ox oy ta yo'ntonic o ti chisva'lupatinicun comele. Ac'o me ch-avanic to batel ta jtojol vu'un ti te oyun ta toyole, pero mu'yuc ta jtotsic liquel.

⁸ “¿C'u x'elan xu' ta jcomtsanot, Efraín? ¿C'u x'elan xu' ta xquictaot, Israel? ¿Me xu' ta xculesot jech chac c'u cha'al laj cules li Admae? ¿Me xu' ta jinesot jech chac c'u cha'al la jines li Zeboime? Toj yan sba co'nton avu'unic, yu'un toj ep jc'anojoxuc.

⁹ Mu'yuc ta jpasboxuc li c'usi jnopoj ta jpas ta sc'ac'al co'ntone; mu'yuc ta xcules yan velta li Efraine, yu'un li vu'une Diosun, muc cristianoucun. Vu'un Ch'ul Diosun ti te oyun ta atojolique; mu'yuc chtal ochcun ta alumalic ta sc'ac'al co'nton”, xi li Diose.

¹⁰ Ja' xa chlic stambeic batel sbe li Muc'ul Diose. Li Muc'ul Diose xlaquet no'ox chlic spas jech chac c'u cha'al león. C'alal xlaquet tspase, li xnich'nabe chlic niquicuc tal ta xi'el c'alal ta smaleb c'ac'al.

¹¹ Jech chal noxtoc li Diose: “Xco'laj xchi'uc mutetic chi'ic loq'uel tal ta anil te ta Egipto; xco'laj xchi'uc stsumutetic chi'ic loq'uel tal ta anil te ta Asiria. Te chtal cac' naquiicuc yan velta ta snaic”, xi li Muc'ul Diose.

Toj chopol c'usi tspas li Israele

¹² “Li Efraine solel yepalc'optaojicun; li smomnich'nab Israele slo'laojicun. Yan li Judae te to oy o ta stojol Dios; staoj to yav o te oy ta stojol li Ch'ul Diose.