Oseas 10 - Bible in Tzotzil de Chenalhó with Deuterocanon

Laj yich' jinesel o li scajleb matanaletic ta Israele

¹ Li Israele ja' jech chac c'u cha'al jtec' ts'usub ti pim yanal xchi'uc ti toj pim chac' sate. C'alal chpimaj sate, ch-epaj scajleb matanaletic sventa yan diosetic noxtoc. C'alal chlecub li yosilale, chlecub chich' pasel tonetic sventa chich'ic ta muc' noxtoc.

² Li Israele cha'jot smacoj, ja' yu'un ta xich'be stojol li smule. Li Diose ta slilinbe li scajleb matanaletic yu'une; ta xvoch'be o scotol li tonetic ti chich'ic ta muq'ue.

³ Jech chlic yalic: “Mu'yuc ajvalil cu'untic, yu'un muc xquich'tic ta muc' li Muc'ul Diose. Ac'o xa'ox me oy ajvalil cu'untic, ¿me xu' yu'un chiscoltautic ti jechuque?

⁴ Yu'un ja' no'ox chalilanic ti ep c'usi tspasique; ep c'usi chalic ta stojol li Diose. Ep c'usi chchapanic, pero mu xc'ot ta pasel yu'unic. Ja' yu'un li chapanel chtal ta stojolique xojoban no'ox ta nich jech chac c'u cha'al ch'ail vomol ti ch'iemic bu lec locbil li banamile”, xiic.

⁵ Li jnaclumetic ta Samariae ta xniquic ta xi'el ta scoj c'usi chc'ot ta pasel ta stojol li sloc'obal ch'ium tot vacax ta Bet-avene. Scotol jteclum xchi'uc paleetic ta xoc'taic, yu'un ich'ay xa o batel li slequilal yutsilale.

⁶ C'alal ta ch'ium tot vacax ta xich' ich'el batel ta Asiria sventa smoton li muc'ul ajvalile. Li Efraine ta sta q'uexlaltasel; li Israele yalem ta q'uexlal chcom ta scoj li c'usi xchapanoje.

⁷ Li ajvalil ta Samariae ta xch'ay o batel jech chac c'u cha'al basal te' ti chcuchat batel ta uc'ume.

⁸ Li toyol c'opojebaletic bu ta sa' smulic li israeletique ta xich' lilinel. Li scajleb matanaletic yu'unique ta xpix ta ch'ixetic. Jech chlic yalbeic li muc'tic vitsetique: “¡Nac'uncutic!”, xutic. Jech chalbeic li bic'tal vitsetique: “¡Loman tal ta sba cac'olcutic!”, xutic.

Ch-ac'bat stoj smul yu'un Dios li Israele

⁹ Jech chal li Diose: “Israel, ta Gabaa no'ox lic asa' tal li amulic. Yoquel abats'il spasel o c'alal to tana. Jech ta stsacatic ta pleito li boch'otic toj chopolic te ta Gabaae.

¹⁰ Ta xcac'be stojic ti c'usi ora tsc'an co'ntone. Ta stsob sba tal epal lumetic ta scontrainel c'alal me sta yorail chcac'be stojic xcha'cojal li tsatsal mulil la spasique.

¹¹ Li Efraine ja' jech chac c'u cha'al unin tsebal vacax ti lec pasbil ta manso, ti lec nopesbil ta steq'uel trigoe. Pero vu'un ta jchucbe yabtejeb ta snuc', ja' li snuc' ti toj c'upil sbae. Ja' ta xjoch careta li Efraine; ja' ta sloc banamil li Judae; li Jacobe ja' ta xvoch' li banamile.

¹² Ja' tsts'unic li c'usitic tuc' ta pasele, jech ja' chlic sc'ajic li c'uxubinele. Chapanic ach' osil sventa chlic ts'unubajanic ta ach', yu'un ja' xa yorail chlic asa'ic li Muc'ul Diose. Ja' to me ital ta atojolique, chlic slecubtas scotol.

¹³ Ja' to'ox lavabtelanic li c'usi chopole, jech ja' lac'ajic li c'usi chopole. Ja' lalo'beic sat li avepalc'opique. “Ta sventa ti ja' laj apat avo'nton yu'un li c'usi anopoj atuque, xchi'uc li epal soldadoetic oy avu'une,

¹⁴ ja' yu'un ta to xvinaj viquil ch'avaloxuc ta oq'uel ta scoj pleito li' ta alumalic. Li tsatsal coraltonetic avu'unique ta xich' lilinel scotol, ja' jech chac c'u cha'al la sjines Bet-arbel li ajvalil Salmán c'alal la spasic pleito, ti c'alal biq'uitic ibat xchi'uc yalabic li antsetique.

¹⁵ Ja' jech chavich' pasbel ec li vo'ote Betel ta scoj li yepal mulil apasoje. Li ajvalil ta Israele ta xcham ti c'alal ja' to chlic sacubuc tal osile.