Oseas 1 - Bible in Tzotzil de Chenalhó with Deuterocanon

Sc'oplal yajnil Oseas xchi'uc xnich'nab

¹ Li Oseas xnich'on Beerie ic'opanat yu'un Muc'ul Dios ti c'alal ja'o i'ochic ta ajvalilal ta Judá li Uzías, Jotam, Acaz, xchi'uc Ezequiase, xchi'uc ti c'alal ja'o ochem ta ajvalilal ta Israel li Jeroboam xnich'on Joase.

² Ja' jech la sliques ya'yej ta stojol Oseas li Muc'ul Diose, jech laj yalbe: “Bat ic'o jun jmulavil ants; ac'o ayinuc avalab anich'nabic achi'uc. Jech yalab jmulavil ants chc'otic. Yu'un li Israel banamile soquem o ta mulil yu'unic; svoc'oj sbaic o ta jtojol li israeletique, jech yalab jmulavil ants c'otemic”, x'utat.

³ Li Osease bat yic' li Gomer, stseb Diblaime, lic xchi'in yol; ivoc' jun squeremic.

⁴ Li Muc'ul Diose jech laj yalbe li Osease: “Jezreel xavac'be sbi li avunin quereme, yu'un jutuc xa sc'an xcac'be stoj smulic li smomnich'nabtac ajvalil Jehú ta scoj ti la smal ch'ich' te ta Jezreele. Jech chcac' lajuc o sc'oplal ti tspas mantal stuc li Israele.

⁵ Me la sta li sc'ac'alil le'e, vu'un ta jc'asbe li st'ilesubil sflecha Israel te ta soplejaltic Jezreele”, x'utat.

⁶ Li antse la xchi'in yol yan velta; tseb ivoc' yu'un. Li Muc'ul Diose jech laj yalbe li Osease: “Lo-ruhama xavac'be sbi li avunin tsebe, yu'un mu'yuc xa ta jc'uxubin o li smomnich'nab Israele; mu'yuc xa ta jts'icbe li smulique.

⁷ Yan li smomnich'nabtac Judae ja' c'ux ta co'nton. Vu'un jtuc ta jcolta, vu'un li Muc'ul Diosun yu'unique. Pero muc ta flechauc, muc ta espadauc, muc ta ca'eticuc sventa pasc'op, muc ta soldadoeticuc cajajtic ta ca' ta jcoltaic”, xi.

⁸ C'alal icom xchu' li Lo-ruhamae, lic xchi'in yol yan velta li antse; querem ivoc' yu'un.

⁹ Li Diose jech laj yalbe li Osease: “Lo-ammi xavac'be sbi li avunin quereme, yu'un li vo'oxuque muc xa jteclumalucoxuc, muc xa vu'cun Diosun avu'unic”, x'utat.

Tsta coltael yan velta lum Israel

¹⁰ Pero ta to sta sc'ac'alil, li israeletique ja' jech yepal chbatic jech chac c'u cha'al yi' ta ti'nab ti mu stac' atel, ti mu stac' bisele. Li xq'uexol ti jech to'ox laj yich'ic albele: “Li vo'oxuque muc xa jteclumalucoxuc”, ti x'utatique, jech chlic albaticuc: “Vo'oxuc xnich'naboxuc cuxul Dios”, x'utatic.

¹¹ Ja' yu'un li smomnich'nabtac Judá xchi'uc Israele ta xlic stsob sbaic yan velta; jun no'ox banquilal yu'unic ta xlic sva'anic. Buyuc no'ox banamilal oyic ta xtal stsob sbaic ta Jerusalén. Yu'un toj muc' sc'oplal li sc'ac'alil Jezreele.