Números 7 - Bible in Tzotzil de Chenalhó with Deuterocanon

Smoton Dios sventa c'alal laj yaq'uic ta sc'ob Dios ch'ulna pasbil ta nucul

¹ Li c'usi c'ac'alil ivu' yu'un spasel ch'ulna pasbil ta nucul li Moisese, la xjax ta aceite li ch'ulnae, xchi'uc scotol li c'usitic te chtune, xchi'uc li c'usitic te chtun ta scajleb smoton Diose, jech voc'bil icom o.

² Jech li banquilaletic yu'un jujuchop israeletique, ja' li boch'otic icoltavanic ta stsaquel li biiletique,

³ ibatic ta ch'ulna ec. Yich'ojbeic batel ep smoton Muc'ul Dios: vaquib caretaetic lec macajtic, xchi'uc lajcha'cot tot vacaxetic. Xu' chcaltic ti laj yaq'uic jujun careta ta chabchab li banquilaletique, xchi'uc laj yaq'uic jujucot vacax jujunic. Scotol le'e te c'ot yaq'uic ta yeloval ti'na pasbil ta nucul.

⁴ Li Muc'ul Diose jech laj yalbe li Moisese:

⁵ “Ich'o li caretaetique xchi'uc li vacaxetique. Ac'bo ta sc'ob li levietique. Ac'o tunuc yu'unic ta sventa yabtelic te ta ch'ulna pasbil ta nucul, ja' li c'usi yabtel sc'oplal tspasic jujunique”, xut.

⁶ Jech li Moisese laj yich' li caretaetique xchi'uc li vacaxetique. La spucbe li levietique.

⁷ Li smomnich'nabtac Gersone laj yac'be chib caretaetic xchi'uc chancot vacaxetic, yu'un ja' jech chtun yu'unic ta sventa li yabtelique.

⁸ Li smomnich'nabtac Merarie laj yac'be chancot caretaetic xchi'uc vaxaccot vacaxetic, yu'un ja' jech chtun yu'unic ta sventa li yabtelic ti ch-ac'bat spasic yu'un Itamare, ja' li xnich'on pale Aarone.

⁹ Yan li smomnich'nabtac Coate mu'yuc laj yich'ic li caretaetique xchi'uc li vacaxetique, yu'un li c'usi tsotsic sc'oplal ti oy ta sventaic chich'ic batele, ta snecubic no'ox tsc'an chq'uechic batel.

¹⁰ C'alal la xjax ta aceite noxtoc li scajleb smoton Dios sventa voc'bil chcom o ta stojole, li banquilaletic yu'un jujuchop israeletique laj yich'anic tal li yan smoton Dios yu'unic sventa chac'beic ta sc'ob Dios li scajleb smotone. Te vul yaq'uic ta stuq'uil scajleb smoton Dios.

¹¹ Li Muc'ul Diose jech laj yalbe li Moisese: “C'alal chtal yac'bicun jmoton ta jujun c'ac'al li jujun banquilaletic yu'un jujuchop achi'iltac sventa chavac'bicun ta jc'ob li scajleb jmotone, ac'o sjelilan sbaic”, xi.

¹² Ta sba c'ac'ale ja' laj yich' batel smoton Dios li Naasón, xnich'on Aminadab ti liquem ta jchop yu'un Judae.

¹³ Li matanal laj yich' batele ja' jun muc'ta plato pasbil ta saquil taq'uin. Ja' jmil xchi'uc chanib ciento xchi'uc lajuneb xcha'vinic (1,430) gramo yalal. Xchi'uc laj yich' batel jun muc'ta taza pasbil ta saquil taq'uin noxtoc. Ja' vucub ciento xchi'uc lajuneb xchanvinic (770) gramo yalal (ja' jech yalal laj yich' batel jech chac c'u cha'al chapanbil te ta ch'ulnae). Li muc'ta plato xchi'uc muc'ta tazae nojemic batel ta arina ti bu ven lequique, ti vots'bil o ta aceitee; le'e ja' itun ta sventa smoton Dios.

¹⁴ Xchi'uc laj yich' batel noxtoc jun muc'ta cuchara pasbil ta c'anal taq'uin, ja' lajuneb svacvinic (110) gramo yalal, nojem batel ta pom.

¹⁵ Xchi'uc laj yic' batel noxtoc jcot ch'ium tot vacax, xchi'uc jcot tot chij xchi'uc jcot ch'ium chij ti jun to jabil svoq'uele, ja' itun sventa chich' chiq'uel ta smoton Dios.

¹⁶ Xchi'uc laj yac' jcot tentsun sventa chich' milel ta smoton Dios ta sventa mulil.

¹⁷ Ta slajeb laj yic' batel cha'cot tot vacax, vo'cot tot chij, vo'cot tentsun xchi'uc vo'cot ch'ium chij ti jun to jabil svoq'uele. Le'e ja' smoton Dios sventa co'ol yo'ntonic xchi'uc Dios. Ja' jech li smoton Dios laj yich' batel Naasón, xnich'on Aminadabe.

¹⁸ Ta xchibal c'ac'ale ja' laj yich' batel smoton Dios li Natanael xnich'on Zuare, ja' li banquilal yu'unic li jchop liquemic ta Isacare.

^19-23 Li smoton Dios laj yaq'ue, co'ol jech chac c'u cha'al laj yac' li Naasone.

²⁴ Ta yoxibal c'ac'ale ja' laj yich' batel smoton Dios li Eliab, xnich'on Helone, ja' li banquilal yu'unic li jchop liquemic ta Zabulone.

^25-29 Li smoton Dios laj yaq'ue co'ol jech chac c'u cha'al laj yaq'uic li yantique.

³⁰ Ta xchanibal c'ac'ale ja' laj yich' batel smoton Dios li Elisur xnich'on Sedeure, ja' li banquilal yu'unic li jchop liquemic ta Rubene.

^31-35 Li smoton Dios laj yaq'ue co'ol jech chac c'u cha'al laj yaq'uic li yantique.

³⁶ Ta yo'obal c'ac'ale ja' laj yich' batel smoton Dios li Selumiel, xnich'on Zurisadai, ja' li banquilal yu'unic li jchop liquemic ta Simeone.

^37-41 Li smoton Dios laj yaq'ue co'ol jech chac c'u cha'al laj yaq'uic li yantique.

⁴² Ta svaquibal c'ac'ale ja' laj yich' batel smoton Dios li Eliasaf, xnich'on Reuel, ja' li banquilal yu'unic li jchop liquemic ta Gade.

^43-47 Li smoton Dios laj yaq'ue co'ol jech chac c'u cha'al laj yaq'uic li yantique.

⁴⁸ Ta svucubal c'ac'ale ja' laj yich' batel smoton Dios li Elisama, xnich'on Amiude, ja' li banquilal yu'unic li jchop liquemic ta Efraine.

^49-53 Li smoton Dios laj yaq'ue co'ol jech chac c'u cha'al laj yaq'uic li yantique.

⁵⁴ Ta xvaxquibal c'ac'ale ja' laj yich' batel smoton Dios li Gamaliel, xnich'on Pedasure, ja' li banquilal yu'unic li jchop liquemic ta Manasese.

^55-59 Li smoton Dios laj yaq'ue co'ol jech chac c'u cha'al laj yaq'uic li yantique.

⁶⁰ Ta sbalunebal c'ac'ale ja' laj yich' batel smoton Dios li Abidán, xnich'on Gedeonie, ja' li banquilal yu'unic li jchop liquemic ta Benjamine.

^61-65 Li smoton Dios laj yaq'ue co'ol jech chac c'u cha'al laj yaq'uic li yantique.

⁶⁶ Ta slajunebal c'ac'ale ja' laj yich' batel smoton Dios li Ahiezer, xnich'on Amisadaie, ja' li banquilal yu'unic li jchop liquemic ta Dane.

^67-71 Li smoton Dios laj yaq'ue co'ol jech chac c'u cha'al laj yaq'uic li yantique.

⁷² Ta xbuluchibal c'ac'ale ja' laj yich' batel smoton Dios li Pagiel, xnich'on Ocrane, ja' li banquilal yu'unic li jchop liquemic ta Asere.

^73-77 Li smoton Dios laj yaq'ue co'ol jech chac c'u cha'al laj yaq'uic li yantique.

⁷⁸ Ta xlajchabal c'ac'ale ja' laj yich' batel smoton Dios li Ahira, xnich'on Enane, ja' li banquilal yu'unic li jchop liquemic ta Neftalie.

^79-83 Li smoton Dios laj yaq'ue co'ol jech chac c'u cha'al laj yaq'uic li yantique.

⁸⁴ Li jujun banquilaletic yu'un jujuchop israeletique ja' jech yepal smoton Dios laj yaq'uic sventa chac'beic ta sc'ob Dios li scajleb smotone: lajchab (12) muc'tic platoetic pasbilic ta saquil taq'uin, xchi'uc lajchab (12) muc'tic tazaetic pasbilic ta saquil taq'uin noxtoc, xchi'uc lajchab (12) muc'tic cucharaetic pasbilic ta c'anal taq'uin.

⁸⁵ Li jujun muc'tic platoe ja' jmil xchi'uc chanib ciento xchi'uc lajuneb xcha'vinic (1,430) gramo yalal. Li muc'tic tazaetique ja' vucub ciento xchi'uc lajuneb xchanvinic (770) gramo yalal jujun. Ti c'u yalal oy ta scotol li saquil taq'uin ti pasbilic o li muc'tic platoetic xchi'uc li muc'tic tazaetique ja' vaquib xcha'vinic ta mil xchi'uc chanib ciento (26,400) gramo yalal ta scotol. Ja' jech yalal jech chac c'u cha'al chapanbil te ta ch'ulnae.

⁸⁶ Te oy noxtoc li lajchab (12) muc'tic cuchara pasbilic ta c'anal taq'uine, nojemic ta pom. Ja' lajuneb svacvinic (110) gramo yalal jujun jech chac c'u cha'al chapanbil te ta ch'ulnae. Ti c'u yalal ta scotol li c'anal taq'uin ti pasbilic o li muc'tic cucharaetique, ja' jmil xchi'uc oxib ciento xchi'uc jtob (1,320) gramo yalal ta scotol.

⁸⁷ Li smoton Dios laj yich' aq'uel ti chic'bil tsc'an scotole, ja' lajcha'cot ch'ium tot vacax, lajcha'cot tot chij, lajcha'cot ch'ium chij ti jun to jabil svoq'uelique, xchi'uc trigo xchi'uc li c'usitic yan ti co'oltic sba jech chac c'u cha'al trigo ti tsc'an ono'ox te capal chich' aq'uele, xchi'uc lajcha'cot tentsun chich' milel ta sventa mulil.

⁸⁸ Li matanal laj yich' aq'uel ti tsc'an chich' milel ta sventa smoton Dios yu'un jech co'ol yo'ntonic xchi'uc Diose ja' chanib xcha'vinic (24) ta cot ch'ium tot vacax, oxvinic (60) ta cot tot chij, oxvinic (60) ta cot tentsun xchi'uc oxvinic (60) ta cot ch'ium chij ti jun to jabil svoq'uelique. Scotol le'e ja' smoton Dios sventa laj yich' aq'uel ta sc'ob Dios li scajleb smotone, ja'o ti c'alal laj xa'ox yich' lecubtasel ta aceite ba'yuque.

⁸⁹ C'alal i'och ta ch'ulna pasbil ta nucul li Moisés sventa tsc'opan sbaic xchi'uc Diose, laj ya'ay ti laj yich' c'opanel yu'un Dios te ta jot spat xcaxail smantal Dios te ta o'lol yo' bu va'ajtic li sloc'obal querubinetique.