Números 31 - Bible in Tzotzil de Chenalhó with Deuterocanon

Li israeletique la smilic madianetic

¹ Li Muc'ul Diose la sc'opan yan velta li Moisese. Jech laj yalbe:

² “Bat pacbo li madianetic ta sventa ti la slo'la li achi'iltac ta israelale. C'alal me laj xa apas jeche, ja'o chacham”, x'utat.

³ Li Moisese lic yalbe ya'ay scotol li xchi'iltaque: —Chapano abaic jayibuc; ich'o avabtejebic; bat milic li madianetique; bat pacbeic sutel ta sventa Muc'ul Dios li c'usi la spasboxuque.

⁴ Ta jujuchopoxuc taquic batel jmil (1,000) viniquetic sventa pleito —xut.

⁵ Ja' yu'un li soldadoetique lic st'uj sbaic jmil (1,000) ta jujuchopic; ja' lajcha'mil (12,000) ta scotol sventa chbatic ta pleito.

⁶ Li Moisese la stac batel ta pleito. Ja' la xchi'inic batel li Finees, ja' li xnich'on pale Eleazare. Ja' yich'oj batel li vasoetic te ta ch'ulnae xchi'uc li oq'uesetic sventa c'u x'elan chlic pleitoe.

⁷ Jech lic spasic pleito xchi'uc li madianetique; la smilic comel scotol jech chac c'u cha'al i'albat yu'un Muc'ul Dios li Moisese.

⁸ La smilic comel noxtoc li Evie, li Requeme, li Zure, li Hure, xchi'uc li Rebae, ja' li vo'ob ajvaliletic ta Madiane. Xchi'uc la smilic comel ec li Balaame, ja' li xnich'on Beore.

⁹ Li israeletique la xchuquic batel scotol li madián antsetique xchi'uc li ololetique, xchi'uc laj yich'beic batel scotol li sts'unub yovolique xchi'uc li c'usitic oy yu'unic ti toyolic stojole.

¹⁰ Jech noxtoc la xchic'beic comel scotol li lumetic yu'unique xchi'uc scotol li scarpanaique.

¹¹ Scotol li c'usitic laj yich'ic batele, ja' li cristianoetique xchi'uc li sts'unub yovolique,

¹² laj yiq'uic batel ta stojol li Moisés, xchi'uc li pale Eleazare, xchi'uc ta stojol scotol li israeletique. Te ic'otic yo' bu scarpanaic ta stenlejal yu'un Moab ta nopol ti'ti' uc'um Jordán ta stuq'uil lum Jericó.

¹³ Li Moisés xchi'uc li pale Eleazare, xchi'uc li banquilaletic yu'un israeletique iloc' snupic ta be ta spat to ti bu spasoj scarpanaique.

¹⁴ Pero li Moisese i'ilin ta stojol li jujun banquilaletic ti ba'yucbe italic yu'un vo'vinic (100), yu'un jmil (1,000) soldadoetic ti i'ayic tal ta paspleitoe.

¹⁵ Jech laj yalbe: —¿C'u yu'un ti cuxul laj acomtsanic li antsetique?

¹⁶ Yu'un li antsetic le'e ja' la xch'unbeic c'usi laj yal li Balaame, jech la slo'laic batel li jchi'iltactique. Jech la sbajbeic o smantal li Muc'ul Diose yu'un ja' bat yich'ic ta muc' li Baal-peore. Ja' yu'un li Muc'ul Diose laj yac' tal tsots vocol; la stac tal jun tsatsal chamel ta stojol li jchi'iltactique.

¹⁷ Milic ta ora no'ox scotol li bic'tal queremetique xchi'uc li antsetic ti muc stsebalicuc toe.

¹⁸ Yan ti bu tsebetic toe, mu xamilic, te iq'uic comel.

¹⁹ Ti jayiboxuc lamilvanique, o me laj apicbeic sbec'tal li animae, comanic vucubuc c'ac'al ta spat jcarpanatic. Tsc'an chavac' abaic ta lecubtasel ta yoxibal c'ac'al xchi'uc ta svucubal c'ac'al achi'uquic li boch'otic laj achuquic tale.

²⁰ Aq'uic ta lecubtasel noxtoc scotol li ac'u'ique, xchi'uc scotol li c'usitic pasbil ta nucul, pasbil ta tsotsil tentsun, o li c'usi pasbil ta te'e —xut.

²¹ Li pale Eleazare jech lic yalbe li soldadoetic ti i'ayic tal ta paspleitoe: —Li c'usitic chacalboxuc li'i ja' jun mantal ti i'albat yu'un Muc'ul Dios li Moisese:

²² Li c'usitic pasbil ta c'anal taq'uin, ta saquil taq'uin, ta bronce, ta tsatsal taq'uin, ta estanyo, o ta plomoe,

²³ ja' sc'oplal scotol li c'usitic xcuch yu'un c'oq'ue, tiq'uic ta c'oc' jech lecubtasbil ta xcom o. Xchi'uc poquic o ta vo' sventa lecubtasel. Yan li c'usitic mu xcuch yu'un c'oq'ue ja' no'ox xavaq'uic ta lecubtasel ta vo'.

²⁴ Ta svucubal c'ac'al ac'o xchuc' lec sc'u'ic, jech lecubtasbil xa chcomic o. Ts'acal ac'o ochicuc batel ti bu oy acarpanaique, xi yaloj li Muc'ul Diose —xut.

Laj yich' puquel li c'usitic la spojic tale

²⁵ Li Muc'ul Diose jech laj yalbe li Moisese:

²⁶ “Ato scotol li tsebetique xchi'uc li sts'unub yovolic ti laj avich'beic tal li madianetique. Ac'o scoltaot ta yatael li pale Eleazare xchi'uc li banquilaletic ta jujuchop sbiic achi'iltaque.

²⁷ Paso ta cha'voc'; lec co'ol yepal xapas. Jvoc' xavac'be li boch'otic i'ayic tal ta pleitoe. Li yan jvoq'ue ja' ac'o yich' li yantic achi'iltaque.

²⁸ Loq'uesbun comel sventa cu'un ec. Li c'usitic chich'ic li soldadoetique, ja' li tsebetique, li vacaxetique, li buroetique, li chijetique, jujun xaloq'ues ta vo'vo' ciento (500).

²⁹ Ja' xavac'be li pale Eleazare; ja' sventa apatanic chc'ot.

³⁰ Li yan jvoc' ti ja' xa ta sventaic li achi'iltac ta israelale, ja' li tsebetique, li vacaxetique, li buroetique, xchi'uc li chijetique, loq'ueso jujun ta lajuneb yoxvinic (50). Ja' xavac'be li levietique yu'un ja' sventainojic li cabtel te ta ch'ulna pasbil ta nucule”, xut.

³¹ Li Moisés xchi'uc Eleazare la spasic jech chac c'u cha'al i'albat yu'un Muc'ul Dios li Moisese.

³² Scotol li c'usitic la spojbeic yajcontraique lic yataic. Pero mu'yuc la stsaquic ta atel ti c'u yepal la slajesic li soldadoetique. Ja' oy vaquib ciento xchi'uc vo'lajuneb xchanvinic ta mil (675,000) li chijetique,

³³ lajchab xchanvinic ta mil (72,000) vacaxetic,

³⁴ jun xchanvinic ta mil (61,000) buroetic,

³⁵ lajchab xcha'vinic ta mil (32,000) tsebetic.

³⁶ Ja' yu'un li jvoc' laj yich' soldadoetique ja' oxib ciento xchi'uc vuclajuneb xcha'vinic ta mil xchi'uc vo'ob ciento (337,500) li chijetique.

³⁷ Ja' te la sloq'uesic li spatanic laj yaq'uic ta stojol Muc'ul Diose. Ja' vaquib ciento xchi'uc vo'lajuneb xchanvinic (675) ta cot laj yaq'uic.

³⁸ Li vaclajuneb xcha'vinic ta mil (36,000) vacaxetique ja' la sloq'uesic lajchab xchanvinic (72) ta cot sventa spatanic laj yaq'uic ta stojol Muc'ul Dios.

³⁹ Li lajuneb xcha'vinic ta mil xchi'uc vo'ob ciento (30,500) ta cot buroetique ja' la sloq'uesic jun xchanvinic (61) ta cot sventa spatanic laj yaq'uic ta stojol Muc'ul Dios.

⁴⁰ Li vaclajunmil (16,000) tsebetique ja' la sloq'uesic lajchab xcha'vinic (32) sventa spatanic laj yaq'uic ta stojol Muc'ul Dios.

⁴¹ Li Moisese ja' laj yac'be ta sc'ob Eleazar scotol li spatanic jech chac c'u cha'al yaloj Muc'ul Diose.

⁴² Li jvoc' scomelal yu'unic li boch'otic i'ayic ta paspleito ti la svoc' comel li Moisés sventa yan israeletique,

⁴³ ja' co'ol yepal ta jyalel jech chac c'u cha'al li yan jvoq'ue. Ja' oxib ciento xchi'uc vuclajuneb xcha'vinic ta mil xchi'uc vo'ob ciento (337,500) li chijetique.

⁴⁴ Ja' vaclajuneb xcha'vinic ta mil (36,000) vacaxetic,

⁴⁵ o'lol xbuluchibal xcha'vinic ta mil (30,500) buroetic,

⁴⁶ vaclajunmil (16,000) tsebetic.

⁴⁷ Li Moisese ja' te la sloq'ues li jujun ta lajuneb yoxvinique (50). Ja' jech la spas ta sventa li tsebetique xchi'uc li ts'unub ovolile. Ja' laj yac'be li levietic jech chac c'u cha'al yaloj li Muc'ul Diose, yu'un ja' te chtunic yu'un ta ch'ulna pasbil ta nucul.

⁴⁸ Li banquilaletic yu'un soldadoetic ti ba'yucbeic tal yu'un jmil (1,000) yu'un vo'vinic (100) soldadoetique bat sc'opanic li Moisese.

⁴⁹ Jech laj yalbeic: “Vu'uncutic, li avajtuneluncutique, laj xa jq'uelcutic li soldadoetic ti c'u yepal jventainojcutic batele, pero mu'yuc c'usi la spas junuc. Lec ivulic scotolic.

⁵⁰ Li' laj quich'cutic tal li c'usitic pasbilic ta c'anal taq'uin la staic tal jujunique: ja' xotajtic taq'uin sventa xoj ste'el sc'obic, xoj snuc' c'obiletic, anilloetic, taq'uinal chiquiniletic, xchi'uc li c'usitic yantic c'upilic sbae, yu'un ac'o cac'betic smotonin li Muc'ul Diose yu'un me junuc muc xijchamutic”, xutic.

⁵¹ Li Moisés xchi'uc Eleazare la stsaquic scotol li c'usitic pasbilic ta c'anal taq'uin i'ac'batique.

⁵² Li c'anal taq'uinetic laj yac'beic Muc'ul Dios li jujun banquilaletic ti la sventainic jmil (1,000), vo'vinic (100) soldadoetique ja' chanib slajunvinic (184) kilo ta scotol.

⁵³ Yu'un li jujun soldadoetique oy ono'ox c'usi laj yich'ic tal; ja' li c'usitic la spojbeic tal li yajcontraique.

⁵⁴ Jech li Moisés xchi'uc Eleazare laj yich'ic li c'anal taq'uin ti laj yich'ic batel li banquilaletic yu'un jujutsob soldadoetique; bat yaq'uic ta ch'ulna pasbil ta nucul sventa yu'un jech mu me xch'ay ta yo'nton israeletic li Muc'ul Diose.