Números 27 - Bible in Tzotzil de Chenalhó with Deuterocanon

Oy laj yich' yosil jayibuc antsetic

¹ Li jchop sts'unubal Manasese oy vo'ob antsetic yu'unic ti jun stotique. Ja' jech sbiic li antsetique: Maala, Noa, Hogla, Milca, xchi'uc Tirsa. Ja' xnich'nab jun vinic Zelofehad. Ja' te ilic sts'unubalic ta Heber, Galaad, Maquir; ja' xnich'nab li Manasese; ja' totil yu'unic li Josee.

² Li vo'ob antsetic le'e ibatic ta ti'ch'ulna pasbil ta nucul; bat sc'opanic li Moisés, xchi'uc li pale Eleazare, xchi'uc li banquilaletic yu'un israeletique. Jech c'ot yalbeic:

³ “Li jtotcutique te icham comel ta xocol banamil. Pero mu ja'uc te nabal ta stojol li Coré xchi'uc xchi'iltac ti la stoy sbaic ta stojol Muc'ul Diose. Li jtotcutique icham ta scoj no'ox smul stuc, pero mu'yuc queremetic xnich'nab icom.

⁴ Mu smeloluc ti chch'ay o sbi ta stojol li jchop yuts' yalal jtotcutic ta sventa ti mu'yuc queremetic xnich'nab icome. Ja' lec ac'bun jpuculal osilcutic ec te ta yosil li yuts' yalaltac jtotcutique”, xutic.

⁵ Li Moisese bat yal ta stojol Muc'ul Dios li ya'yej antsetique.

⁶ Li Muc'ul Diose jech laj yal:

⁷ “Li stsebetic Zelofehade oy srazonic li c'usi chalique. Ac'bo yosilic te ta stojol li yuts' yalal anima stotique. Ja' yu'un li spuculal osil stotique ja' chcom ta sventaic.

⁸ Albo li achi'iltac ta israelale, me oy chcham junuc vinic ti mu'yuc queremetic xnich'nab chcome, ja' ac'o yich'be spuculal osil stot li tsebe.

⁹ Pero me mu junuc stsebetic noxtoque, ja' ac'o ich'batuc spuculal osil yu'un li xchi'iltac ta voq'uele.

¹⁰ Me mu'yuc xchi'iltac ta voq'uel noxtoque, ja' ac'o ich'batuc spuculal osil yu'un li sbanquil yits'in anima stote.

¹¹ Pero me oy chc'ot ta pasel ti mu'yuc xchi'iltac ta voq'uel noxtoc li anima stote, ja' ac'o ich'batuc spuculal osil yu'un li bats'i yuts' yalale. Li c'usi laj calbot li'i, ja' jun mantal ta xcom o yu'unic li achi'iltac ta israelale”, xut.

Li Josuee i'och ta xq'uexol Moisés

¹² Li Muc'ul Diose jech laj yalbe li Moisese: —Muyan le' ta vits Abarime; q'uelo batel avil li osil ti cac'ojbeic li achi'iltac ta israelale.

¹³ C'alal me laj xa avil c'u x'elane, ja'o chacham. Te chbat achi'in li amoltotac ta vo'one jech chac c'u cha'al li abanquil Aarone.

¹⁴ Yu'un achibalic laj abajbicun jmantal ti c'alal iliquic ta vulajetel ta jtojol li achi'iltaque. Muc xavich'icun ta muc' ta stojol achi'iltaquic ti c'alal laj ac'anbicun vo'e —xut. (Le'e ja' sc'oplal li nio' ta Meriba te ta Cades ta xocol banamil ta Zine.)

¹⁵ Li Moisese jech laj yalbe li Muc'ul Diose:

^16-17 —Muc'ul Dios, vo'ot ti avac'ojbe xcuxlejalic li cristianoetique, t'ujbo junuc banquilal yu'unic li jteclum avu'un li'i, yu'un ja' ac'o tojobtasaticuc batel ti buyuc no'ox chbatique. Yu'un jech mu stuquicuc no'ox chanovic batel jech chac c'u cha'al chij ti mu'yuc xchabiele —xut.

¹⁸ Li Muc'ul Diose jech la stac'be li Moisese: —Li Josué xnich'on Nune ja' jun vinic ti yich'ojbun lec jtsatsale. Ic'o, ac'o ac'ob ta sjol.

¹⁹ Ts'acal ic'o batel ta stojol li pale Eleazare xchi'uc ta stojol scotol li achi'iltaque; te ta satic xavac'be sventain comel li abtele.

²⁰ Ac'bo comel ta sba c'uuc yepal li avabtele, yu'un jech ac'o ch'unbatuc smantal yu'un scotol li achi'iltac ta israelale.

²¹ Li Josuee ac'o bat sva'an sba ta stojol li pale Eleazare. Li Eleazare ja' xa ac'o sjac'bun ta jtojol ta sventa st'unubil ti Urim, sbie. Li Josuee ja' me chcom ta sba chalbe scotol achi'iltac ta israelal li c'usitic tsc'an ac'o spasique —xut.

²² Jech li Moisese la spas jech chac c'u cha'al i'albat yu'un li Muc'ul Diose. Laj yic' li Josuee; bat sva'an ta stojol li pale Eleazare xchi'uc ta stojol scotol li israeletique.

²³ Laj yac' sc'ob ta sjol, jech laj yac'be yabtel jech chac c'u cha'al laj yal mantal Muc'ul Dios ta sventa li Moisese.