Números 26 - Bible in Tzotzil de Chenalhó with Deuterocanon

Li israeletique la spasic yan ach' tsactsacvun te ta Moab

¹ C'alal ech'em xa'ox li tsatsal chamel yu'unique, li Muc'ul Diose la sc'opan li Moisés xchi'uc Eleazare, ja' li xnich'on pale Aarone. Jech laj yalbe:

² “Liquesic tsactsacvun, ta jujuchop sbiic xatsaquic ta vun scotol li israeletic ti yich'ojic xa jtob (20) jabil c'alal ta moletic ti xu' xa yu'unic pleitoe”, xut.

³ Jech li Moisés xchi'uc Eleazare lic yalbeic mantal scotol israeletic ti c'alal ja'o te oyic ta stenlejaltic ta yosilal Moab te ta nopol ti' uc'um Jordán ta stuq'uil lum Jericoe.

⁴ Yu'un ac'o yac' ta tsaquel sbiic scotol li boch'otic yich'ojic xa jtob (20) jabil xchi'uc c'alal ta moletic, jech chac c'u cha'al i'albat yu'un Muc'ul Dios li Moisese. Ja' jech yepal ta scotol li israeletic ti iloq'uic tal ta Egiptoe:

^5-6 Li xnich'nab Rubén, ja' li banquilal xnich'on Israele, ja' Enoc, Falú, Hezrón, xchi'uc Carmi. Le'e ja' te ilic li smomnich'nab Rubén ta jujuchop sbiique.

⁷ Ti c'u yepal iloc' ta scotol li smomnich'nab Rubene, ja' oxib yoxvinic ta mil xchi'uc vucub ciento xchi'uc lajuneb xcha'vinic (43,730) ta scotol li viniquetique.

⁸ Li Falue inich'naj, ja' xnich'on li Eliabe.

⁹ Li Eliabe inich'naj, ja' Nemuel, Datán, xchi'uc Abiram. Li Datán xchi'uc Abirame ja' li boch'otic co'ol la xchi'inic Coré c'alal la stoy sbaic ta stojol Muc'ul Diose, xchi'uc ti la scontrainic li Moisés xchi'uc Aarone.

¹⁰ Pero ijav li banamile; te ibic'atic ochel li chibique xchi'uc li Coree. Ti c'u yepal jmoj la stsob sbaique, ichamic scotolic. Ja' o'lol yoxibal ciento (250) ti ichamic ta c'oq'ue. Le'e ja' itun ta sventa c'u cha'al mu xch'ay ta yo'ntonic o li yantique.

¹¹ Yan li xnich'nab Coree muc xchamic.

¹² Li xnich'nab Simeón ti bu ilic sts'unubal ta jujuchop sbiic smomnich'nabe ja' Nemuel, Jamín, Jaquín,

¹³ Sera, xchi'uc Saúl.

¹⁴ Ti c'u yepal iloc' ta scotol li smomnich'nab Simeone ja' chib xcha'vinic (22,200) ta mil xchi'uc chib ciento li viniquetique.

¹⁵ Li xnich'nab Gad ti bu ilic sts'unubal ta jujuchop sbiic smomnich'nabtaque ja' Zefón, Hagui, Suni,

¹⁶ Ozni, Eri,

¹⁷ Arod, xchi'uc Areli.

¹⁸ Ti c'u yepal iloc' ta scotol li smomnich'nab Gade ja' cha'vinic ta mil xchi'uc vo'ob ciento (40,500) ta scotol li viniquetique.

¹⁹ Li xnich'nab Judae ja' Er xchi'uc Onán, te ichamic comel ta Canaán banamil.

²⁰ Ja' yu'un li xnich'on Judá bu ilic ta jujuchop sbiic li smomnich'nabtaque ja' Sela, Fares, xchi'uc Zara.

²¹ Ti bu ilic smomnich'nab Fares ta jujuchop sbiique ja' ta Hezrón xchi'uc Hamul.

²² Ti c'u yepal iloc' ta scotol li smomnich'nab Judae ja' vaclajuneb xchanvinic ta mil xchi'uc vo'ob ciento (76,500) ta scotol li viniquetique.

²³ Li xnich'nab Isacar bu ilic ta jujuchop sbiic smomnich'nabe ja' Tola, Fúa,

²⁴ Jasub, xchi'uc Simrón.

²⁵ Ti c'u yepal iloc' ta scotol li smomnich'nab Isacare ja' chanib xchanvinic ta mil xchi'uc oxib ciento (64,300) ta scotol li viniquetique.

²⁶ Li xnich'nab Zabulón ti bu ilic ta jujuchop sbiic li smomnich'nabe ja' ta Sered, Elón, xchi'uc Jahleel.

²⁷ Ti c'u yepal iloc' ta scotol li smomnich'nab Zabulone ja' oxvinic ta mil xchi'uc vo'ob ciento (60,500) ta scotol li viniquetique.

²⁸ Li xnich'nab José ti bu ilic ta jujuchop sbiic smomnich'nabe ja' ta Manasés xchi'uc ta Efraín.

²⁹ Li xnich'on Manasese, ja' li Maquire; ja' te ilic li maquiretique. Li Maquire inich'naj, ja' li Galaade; ja' te ilic li galaadetique.

^30-32 Li xnich'nabtac Galaade ja' Jezer, Helec, Asriel, Siquem, Semida, xchi'uc Hefer sbiic. Ti jayibic le'e ta jujuchop sbiic ibatic; ja' xnich'nab li Galaade.

³³ Li xnich'on Hefere ja' Zelofehad. Li Zelofehade mu'yuc squeremetic, ja' no'ox puru stsebetic. Ja' Maala, Noa, Hogla, Milca, xchi'uc Tirsa sbiic.

³⁴ Ti c'u yepal iloc' ta scotol c'alal laj yich' tsacbel sbi li smomnich'nabtac Manasese ja' lajchab yoxvinic ta mil xchi'uc vucub ciento (52,700) ta scotol li viniquetique.

³⁵ Li xnich'nab Efraín ti bu ilic ta jujuchop sbiic smomnich'nabtaque ja' Sutela, Bequer, xchi'uc Tahán.

³⁶ Li smomnich'nabtac Sutelae ja'ic li jchop eranetique.

³⁷ Ti c'u yepal iloc' ta scotol smomnich'nabtac Efraine, ja' lajchab xcha'vinic ta mil xchi'uc vo'ob ciento (32,500) ta scotol. Le'e ja' scotol sts'unubal José ta jujuchop sbiic ibatic.

³⁸ Li xnich'nab Benjamín ti bu ilic ta jujuchop sbiic smomnich'nabe ja' Bela, Asbel, Ahiram

³⁹ Sefufam, xchi'uc Hufam.

⁴⁰ Li xnich'nab Bela ti bu ilic ta jujuchop sbiic smomnich'nabe ja' Ard xchi'uc Naamán.

⁴¹ Ti c'u yepal iloc' ta scotol smomnich'nab li Benjamine ja' vo'ob yoxvinic ta mil xchi'uc vaquib ciento (45,600) ta scotol li viniquetique.

⁴² Li smomnich'nabtac Dane ja' li jchop ilic ta Suhame.

⁴³ Ti c'u yepal iloc' ta scotol li smomnich'nabtac Suhame ja' chanib xchanvinic ta mil xchi'uc chanib ciento (64,400) ta scotol li viniquetique.

⁴⁴ Li xnich'nab Aser ti bu ilic ta jujuchop sbi smomnich'nabtaque ja' Imna, Isúi, xchi'uc Bería.

⁴⁵ Li xnich'nab Bería ti bu ilic ta jujuchop sbiic smomnich'nabe ja' Heber xchi'uc Malquiel.

⁴⁶ Li Asere oy jun stseb noxtoc; ja' Sera sbi.

⁴⁷ Ti c'u yepal iloc' ta scotol smomnich'nab li Asere ja' oxlajuneb yoxvinic ta mil xchi'uc chanib ciento (53,400) ta scotol li viniquetique.

⁴⁸ Li xnich'nab Neftalí ti bu ilic ta jujuchop sbiic smomnich'nabe ja' Jahzeel, Guni,

⁴⁹ Jezer, xchi'uc Silem.

⁵⁰ Ti c'u yepal iloc' ta scotol li smomnich'nabtac Neftalie ja' vo'ob yoxvinic ta mil xchi'uc chanib ciento (45,400) ta scotol li viniquetique.

⁵¹ Ti c'u yepal iloc' ta scotol li israeletique ja' vaquib ciento ta mil xchi'uc jmil, xchi'uc vucub ciento xchi'uc lajuneb xcha'vinic (601,730) ta scotol li viniquetique.

I'albatic mantal c'u x'elan tsvoc' yosilic

⁵² Li Muc'ul Diose la sc'opan li Moisese. Jech laj yalbe:

⁵³ “Ti c'u yepal i'och ta vun sbiic li viniquetique, ja' me jech chich' voc'bel li yosilique.

⁵⁴ Ti bu ep iloc' ta atele, ja' ep chich' li yosilique. Ti bu mu'yuc ep iloc' ta atele, ja' mu'yuc ep chich' li yosilique. Ti c'u yepal iloc' ta atel ta jujuchope, ja' jech yepal chich' li yosilique.

⁵⁵ C'alal chavoq'uic li osile, tsc'an chapasic canal tajimol, ja' ti bu xc'ot ta stojol jujunique. Ta jujuchop ac'o yich' yosilic ti bu liquem tal sts'unubal li stotique.

⁵⁶ C'alal chich' puquel li osile, ja' tsc'an chich' pasel canal tajimol. Tsc'an jech chich' pasel ta sventa ti bu epique, xchi'uc ti bu mu'yuc epique”, xut.

Laj yich' tsacbel sbiic scotol li levietique

⁵⁷ Li xnich'nabtac Leví ti bu ilic li jujuchop sbiic smomnich'nabtaque ja' Gersón, Coat, xchi'uc Merari. Ja' laj yich'ic atel.

⁵⁸ Li libnaetic, hebronetic, mahletic, musetic, xchi'uc li coreetique, le'e ja' smomnich'nabtac Leví ta jujuchop sbiic. Li Coate inich'naj, Amram sbi.

⁵⁹ Li Amrame laj yic' yajnil. Ja' laj yic'be stseb Leví, Jocabed sbi. Li Jocabede ja'o ivoc' ti c'alal te to'ox oy ta Egipto li Levie. Li Amram xchi'uc Jocabede ja' stot sme'ic li Aarón, Moisés, xchi'uc Mariae.

⁶⁰ Li xnich'nab Aarone ja' Nadab, Abiú, Eleazar, xchi'uc Itamar.

⁶¹ Li Nadab xchi'uc Abiue ja' ti ichamic c'alal la xchiq'uic pom ta stojol Muc'ul Dios ta smantal stuquique.

⁶² Ti c'u yepal ta scotol smomnich'nab Leví ti xlic ta jun u svoq'uel c'alal ta moletique ja' oxib xcha'vinic (23,000) ta mil ta scotol li viniquetique. Le'e mu'yuc te capal i'ochic ta vun xchi'uc scotol li yantic israeletique, yu'un mu'yuc xich'ic yosilic li stuquique.

⁶³ Ja' jech yepal iloc' ta scotol li israeletic ti c'alal la spas tsactsacvun li Moisés xchi'uc pale Eleazar te ta stenlejaltic yu'un Moab ta ti' uc'um Jordán ta stuq'uil lum Jericoe.

⁶⁴ Scotol li boch'otic te to'ox oyic c'alal la spasic tsactsacvun li Moisés xchi'uc Aarón ta xocol banamil Sinaie, me junuc mu'yuc xa te oyic li stuquique.

⁶⁵ Yu'un laj ono'ox yal Muc'ul Dios ti te chchamic scotolic ta xocol banamile. Ja' xa no'ox muc xcham li Caleb, xnich'on Jefone, xchi'uc li Josué, xnich'on Nune. Jech ja' xa no'ox te xchi'uquic li yantique.