Números 25 - Bible in Tzotzil de Chenalhó with Deuterocanon

Imilatic scotol li boch'o laj yich'ic ta muc' dios yu'un moabetique

¹ C'alal te inaquiic ta Sitim li israeletique, te lic mulivajicuc xchi'uquic li tsebetic yu'un moabetique.

² Ja' yu'un li tsebetique te lic yiq'uic ta sti'el smoton diosetic yu'unic. Jech li israeletique te lic sti'ic, te lic yich'ic ta muc' ec li diosetic yu'un moabetique.

³ Jech te ilo'laatic o batel ta yich'el ta muc' li Baal-peore. Li Muc'ul Diose tsots i'ilin ta stojol li israeletique,

⁴ jech laj yalbe li Moisese: —Tsobo scotol li banquilaletic yu'un achi'iltaque, ja' li boch'o la sta smulique, milo ta jtojol te ta sat li achi'iltaque. Ja' to jech xu' ta xlaj sc'ac'al co'nton ta stojol li achi'iltaque —xut.

⁵ Jech li Moisese lic yalbe mantal li jchapanvanejetic yu'un xchi'iltaque: —Jujunoxuc milic li avinictaquic ta jujuchopoxuque, ja' li boch'otic laj yich'ic ta muc' li Baal-peore —xut.

⁶ Oy jun israel vinic laj yic' batel ta sna jun madián tseb. Te laj yic' jelovel ta stojol li Moisese xchi'uc ta stojol li israeletic c'alal ja'o te tsobol ch-oq'uic scotolic ta sti' li ch'ulna pasbil ta nucule.

⁷ Oy jun pale, Finees sbi. Ja' xnich'on li Eleazare; ja' smomnich'on li banquilal pale Aarone. Laj yil ti jech la spase, jech itots batel yo' bu oy li xchi'iltaque. La stsac batel jun slanza.

⁸ Te nabal ibat ta spat li vinique; ic'ot c'alal ta sna. La smil ta lanza xchibalic, toj jelovel no'ox ta xch'ut li vinique xchi'uc li antse. Ja' to jech i'ech' o li tsatsal chamel ti chchamic o li israeletique,

⁹ Pero ichamic xa'ox chanib xcha'vinic (24,000) ta mil ta scotol.

¹⁰ Li Muc'ul Diose la sc'opan li Moisese. Jech laj yalbe:

¹¹ —Li Fineese ja' la spas li c'usi sventa chlaj o sc'ac'al co'nton yu'une. Yu'un ja' jech yo'nton ec jech chac c'u cha'al vu'un ti toj chopol co'nton yu'un li achi'iltac ta sventa ti jech la spasique. Ja' yu'un muc j'ech'eluc te chopol icom o co'nton; muc xcules scotol li achi'iltaque.

¹² Albo ya'ay Finees ti ta jchapan jchi'uc ti tsta yorail chata jun avo'ntonique.

¹³ J'ech'el ta xcac'be o ta sc'obic xchi'uc smomnich'nab li abtel ta paleale yu'un toj it'ix ic'ot yo'nton ti c'alal muc vu'cun xiyich'icun ta muq'ue, xchi'uc ja' to jech la staic o perdón li achi'iltac ta israelale —xi.

¹⁴ Li israel vinic ti imilat ta lanza xchi'uc madián tsebe Zimri sbi. Ja' xnich'on li Salue, ja' li banquilal yu'unic jchop liquemic ta Simeone.

¹⁵ Li Madián tsebe Cozbi sbi. Ja' xnich'on Zur; ja' banquilal yu'un jchop sbiic ta Madián.

¹⁶ Li Muc'ul Diose la sc'opan yan velta li Moisese. Jech laj yalbe:

¹⁷ —Contrainic li madianetique; tsalic o ta j'ech'el.

¹⁸ Yu'un ja' la stsaloxuc ec li vo'oxuque, la slo'laoxuc batel ta yich'el ta muc' li Baal-peore, xchi'uc ta scoj li jun tseb Cozbi, ja' li xnich'on banquilal yu'un madianetic ti icham ta lanza c'alal ja'o jtacoj batel tsots chamel ta scoj ti laj yich'ic ta muc' li Baal-peore —x'utat li Moisese.