Números 20 - Bible in Tzotzil de Chenalhó with Deuterocanon

Iloc' vo' ta ch'en c'alal la smaj li Moisese

¹ Ta sliquebal jabil ic'otic te ta xocol banamil ta Zin scotol li israeletique. Te la spas scarpanaic jayibuc c'ac'al ta Cades. Te icham li Mariae; te laj yich' muquel.

² Ta sventa ti mu'yuc vo' yuch'ic scotol li israeletique, jech jmoj la stsob sbaic tal scotolic; tal scontrainic li Moisés xchi'uc Aarone.

³ Jech laj yalbeic li Moisese: —Ja' lec ti co'oluc chamcuncutic jchi'uc li yantic jchi'iltactic ti ichamic ta stojol Muc'ul Diose.

⁴ ¿C'u yu'un ti laj aviq'uic tal li' ta xocol banamil li xnich'nabtac Muc'ul Diose? ¿Me yu'un chac'anic ti co'ol li' chichamcutic jchi'uc li jts'unub covolcutique?

⁵ ¿C'u yu'un ti laj aloq'uesuncutic tal ta Egipto, ti laj avic'uncutic tal li' ta banamil ti toj chopole? Li'i solel mu'yuc c'usi xch'i o. Mu'yuc te'el higoetic, ts'usubetic xchi'uc caranatoetic; me ja'uc vo' sventa chcuch'cutic, solel mu'yuc o —xiic ta stojol li Moisese.

⁶ Li Moisés xchi'uc Aarone iloq'uic batel ta stojol li xchi'iltaquique. Ibatic ta ti'ch'ulna pasbil ta nucul; te c'ot spatan sbaic ta banamil. Te ivinaj xojobal Muc'ul Dios ta stojolic.

⁷ Jech i'albat yu'un Muc'ul Dios li Moisese:

⁸ —Ich'o batel li anamte'e. Tsobo batel scotol li achi'iltaque. Ac'o scoltaot li abanquil Aarone. Te ta sat scotol achi'iltac xavalbe mantal li ch'ene yu'un ac'o loc'uc tal vo', ja' ac'o yuch'ic li achi'iltaque xchi'uc li sts'unub yovolique —x'utat.

⁹ Laj yich' batel snamte' li Moisés ti te oy ta stojol Muc'ul Diose. Ja' la xch'un jech chac c'u cha'al i'albat yu'un Muc'ul Diose.

¹⁰ Li Moisés xchi'uc Aarone la stsobic batel scotol xchi'iltaquic ta nopol ch'en. Li Moisese jech lic yal: —A'yo ava'yic jbajmantaletic: ¿Me yu'un chac'anic ti vu'uncutic ta jloq'uescutic tal vo' li' ta ch'en sventa chcac'cutic avuch'ique? —xi.

¹¹ C'alal laj yal jeche, lic stoy sc'ob. La smaj ta snamte' chib velta li ch'ene, jech te iloc' tal ep vo'. Jech lic yuch'ic scotol li israeletique xchi'uc scotol li sca' xvacaxique.

¹² Pero li Muc'ul Diose jech laj yalbe li Moisés xchi'uc Aarone: —Ta sventa ti muc xach'unic c'usi laj calboxuque, xchi'uc ti muc xavaq'uicun ta ich'el ta muc' ta stojol scotol li achi'iltaquique, jech mu'yuc chcac' ochanic batel achi'uc achi'iltac te ta banamil ti bu caloj chacac'boxuque —xi.

¹³ Le'e ja' li vo' te ta Meriba yo' bu ep iliquic ta vulajetel ta stojol Muc'ul Dios li israeletique, ja' te laj yac' ta ilel li slequilale.

Li edometique muc xaq'uic jelovicuc batel li israeletique

¹⁴ C'alal te oyic ta Cadese, li Moisese la stac batel jayibuc j'almantaletic ta stojol li ajvalil yu'un edometique. Jech c'ot yalbeic: “Li yalab xnich'nab avits'in Israele, jech laj yalic tal ta atojol: ‘Li vo'ote lec xana' ti c'u x'elan jvocolcutique.

¹⁵ Li jmoltot jyame'cutic ta vo'onee, ibatic ta Egipto. Ep jabil te inaquiic. Pero li egiptoetique laj yuts'intauncutic jech chac c'u cha'al la spasbeic li jmoltot jyame'cutic ta vo'onee.

¹⁶ Jech te lic jc'anbecutic vocol li Muc'ul Diose. Laj ya'ibun li jc'opcutique. Jech la stac tal yaj'almantal; tal sloq'uesuncutic ta Egipto. Li' ta orae li' xa oyuncutic ta nopol sts'aquil avosilal ta lum Cades.

¹⁷ Jech ta jc'ancutic vocol ta atojol ti ac'o avac' jelovcuncutic batel ta avosilale. Mu'yuc chi'ochcutic ta yut li c'usitic ats'unojique, me ja'uc ta ts'usubtic avu'unic. Xchi'uc mu'yuc ta xcuch'cutic li vo' ta joq'uetic avu'unique. Ja' no'ox ta jtamcutic batel li tuq'uil bee, ja' to c'alal chijelovcutic batel ta avosilale’, uto c'otel”, xi li Moisese.

¹⁸ Pero li ajvalil ta Edome jech laj yal: —Mu'yuc chcac' jelovanic batel ta cosilal. Me jech chapasique, ta xbat jmilotcutic jchi'uc cajsoldadotac —xi.

¹⁹ Li israeletique jech laj yalbeic noxtoc: —Ja' no'ox ta jtamcutic batel li tuq'uil bee. Me oy boch'o chuch' cu'uncutic li ava'alic ta apozoique, o me ja' chuch' li jca' jvacaxcutique, ta jtojcutic. Li c'usi ta jc'ancutique, ja' no'ox ti avac'uc jtec'cutic batel li avosilic sventa chijelovcutic batele —xutic.

²⁰ Li ajvalil yu'un edometique jech laj yal: —Mu'yuc bu chajelovic batel —xi. Jech iloq'uic tal xchi'uc yajsoldadotac, xchi'uc yabtejebic; tal staic li israeletique.

²¹ Jech muc xaq'uic jelovicuc o ta yosilalic li israeletique. Ja' yu'un li israeletique la stamic batel yan be.

Icham li Aarone

²² Scotol li israeletique iloq'uic batel ta Cades; ibatic ta stuq'uil vits Hor.

²³ C'alal te oyic ta sts'aquil yosil edometic ta vits Hore, li Diose la sc'opan li Moisés xchi'uc Aarone. Jech laj yalbe:

²⁴ “Li Aarone li' no'ox ta xcham. Mu'yuc ta x'och batel ta banamil ti bu cac'ojbeic li achi'iltaquic ta israelale. Yu'un li vo'oxuque, muc xach'unbicun c'usi laj calboxuc ti c'alal laj aloq'uesic vo' ta ch'en te ta Meribae.

²⁵ Li vo'ote Moisés, ic'o batel ta jolvits Hor li Aarone xchi'uc li xnich'on Eleazare.

²⁶ Te xc'ot aloc'be sc'u' li Aarón sventa paleale, ja' xavac'be slap li Eleazare. Li Aarone te no'ox ta xcham”, xi.

²⁷ Li Moisese la spas jech chac c'u cha'al i'albat yu'un li Muc'ul Diose. Te ta sat scotol xchi'iltaquic ta israelal imuyic ta vits Hor.

²⁸ Li Moisese te la sloc'be sc'u' li Aarón sventa paleale, ja' laj yac'be slap li Eleazare. Te no'ox ta jolvits icham li Aarone.

²⁹ C'alal laj yilic icham Aarón scotol li israeletique, laj yoc'taic lajuneb xcha'vinic (30) c'ac'al.