Números 19 - Bible in Tzotzil de Chenalhó with Deuterocanon

Tsc'an chac' sbaic ta lecubtasel li boch'o oy c'usi tstaic ta piquele

¹ Li Muc'ul Diose la sc'opan yan velta li Moisés xchi'uc Aarone. Jech laj yalbe:

² “Vu'un Muc'ul Diosun ta xcal li mantal li'i: Albo achi'iltac ta israelal ti ac'o yich'bicun tal jcotuc me' vacax ti tsojtsojtic sba stsotsile, ti mu'yuc xchamele, ti lec oye, xchi'uc ti mu'yuc to chucbil arado sventa slocubil banamile.

³ Vo'oxuc chavac'beic ta sc'ob li pale Eleazare. Li Eleazare, ja' ac'o yic' loq'uel ta spat to yo' bu oy li acarpanaique. Ac'o yal mantal ti te ac'o yich' milel ta stojole.

⁴ Li pale Eleazare, ac'o sts'aj sbic'tal sc'ob ta xch'ich'al li vacaxe, ac'o svij batel vucubuc velta ta stuq'uil li ch'ulna pasbil ta nucule.

⁵ Ts'acal te sq'ueloj ac'o yich' chiq'uel li me' vacaxe. Ac'o yich' chiq'uel li snuculile, li sbec'tale, li xch'ich'ale, xchi'uc scotol li sbel xch'ut c'alal ta stso'e.

⁶ Li palee ac'o stsac jutebuc ch'ut te', xchi'uc jecuc sc'ob hisopo te', xchi'uc tsajal poc'. Ac'o xchic' scotol te yo' bu chcac' li me' vacaxe.

⁷ Ts'acal ac'o xchuc' lec sc'u'; ac'o atinuc lec, jech xu' ch-och batel ta yut ti bu oy acarpanaique ac'o me mu'yuc to lecuben o c'alal to ta mal c'ac'al.

⁸ Ja' no'ox jech ec li boch'o la xchic' li me' vacaxe ac'o xchuc' lec sc'u', ac'o atinuc lec, ac'o me mu'yuc lecuben o c'alal to ta mal c'ac'al.

⁹ Yan vinic ti lec oye, ja' ac'o sjopbe batel li stanil me' vacaxe. Ac'o bat yac' ta spat ti bu nacaloxuque. Ja' te ac'o yac' ti bu lec li banamile. Li tan le'e ja' ac'o stunesic achi'iltac ta israelal sventa tsmeltsanic o li ts'u'iltasbil vo'e. Scotol le'e ja' me milbil matanal ta sventa li mulile.

¹⁰ Li boch'o la stsob batel li tane, ac'o xchuc' lec sc'u', pero mu'yuc to lecuben chcom c'alal to ta bat c'ac'al. Li'i ja' jun mantal chcom o ta atojolic, vo'oxuc li israeloxuque, xchi'uc ta stojol li yanlum cristianoetic te nacal ta atojolique.

¹¹ “Scotol li boch'o tsta ta piquel sbec'tal jun animae, vucub c'ac'al chopol chcom.

¹² Ta yoxibal xchi'uc ta svucubal c'ac'al ac'o yac' sba ta lecubtasel ta sventa li ts'u'iltasbil vo'e. Ta svucubal c'ac'ale lec xa chcom o. Me mu'yuc chac' sba ta lecubtasel ta yoxibal c'ac'al xchi'uc ta svucubal c'ac'ale, mu'yuc lec chcom o.

¹³ Me oy boch'o la sta ta piquel sbec'tal anima ti mu'yuc chac' sba ta lecubtasele, tsocbe sc'oplal li ch'ulna yu'un Diose. Ac'o loc'uc o ta atojolic, yu'un muc xac' sba ta lecubtasel ta ts'u'iltasbil vo'. Jech te chcom o ta sba stuc ti mu'yuc lecubene.

¹⁴ “Li mantal ta sventa c'usi tsc'an chapasic c'alal me oy boch'o chcham te ta yut scarpanae, ja' li'i: Scotol li boch'otic te oyic ta yut li carpanae xchi'uc li boch'otic te ta x'ochic batele, vucub c'ac'al chopol chcomic o.

¹⁵ Scotol li binetic ti mu'yuc macbil sti'e, o me mu'yuc lec ac'bil smaque mu'yuc xa lec chcom o.

¹⁶ “Me oy boch'o la spicbe sbec'tal jun anima ta te'tic ti milbil ichame, o me jech no'ox icham stuque, o me sbaquil anima la sta ta piquel, o me muquinaltic, vucub c'ac'al mu'yuc lec chcom.

¹⁷ “Scotol li boch'otic jech soquemique, ac'o bat yich'ic tal c'uuc yepal li stanil me' vacax ti milbil ta sventa mulile. Ac'o yaq'uic ta jun jayil taq'uin. Ac'o yac'beic ya'lel, ja' li vo' ti lec chanov yoque.

¹⁸ Ac'o taluc junuc vinic ti lec oye. Ac'o stsac jecuc sc'ob hisopo te', ac'o sts'aj ta vo'. Ac'o svij ta sba li carpanae, xchi'uc scotol li sbele, xchi'uc li boch'otic te oyic ta yute. Xchi'uc ac'o svij noxtoc li boch'o la spic sbaquil anima, o me sbec'tal anima ti milbil ichame, o me ja' ti jech no'ox icham stuque, o me ja' la spic li muquinaltique.

¹⁹ Li vinic ti lec oye xu' ja' ac'o svij ta ya'lel stanil me' vacax ta yoxibal c'ac'al xchi'uc ta svucubal c'ac'al li boch'o soquem sc'oplale. C'alal me laj xa yich' lecubtasel ta svucubal c'ac'ale, ac'o xchuc' lec sc'u'. Ac'o atinuc lec; ta yic'ubel osil lecuben xa chcom.

²⁰ Me oy boch'o soquem ti mu xac' sba ta lecubtasele, ac'o loc'uc ta atojolic yu'un tsocbe sc'oplal li ch'ulna yu'un Muc'ul Diose, yu'un muc xac' sba o ta vijel ta vo' ti ja' sventa lecubtasele. Jech mu'yuc lecuben chcom o.

²¹ Li'i ja' jun mantal chcom o ta atojolic; mu xlaj sc'oplal o. Li boch'o ta svij ta ts'u'iltasbil vo' jun xchi'ile, tsc'an ac'o xchuc' lec sc'u' stuc ec. Li boch'o tspic li vo' sventa lecubtasele, soquem chcom o c'alal to ta mal c'ac'al.

²² Scotol c'usi tspic li boch'o mu'yuc leque, chopol chcom ec li c'usi chich' piquele. Me oy boch'o tspic li boch'o mu'yuc leque, soquem chcom o c'alal to ta mal c'ac'al”, xi li Muc'ul Diose.