Nehemías 9 - Bible in Tzotzil de Chenalhó with Deuterocanon

Laj yalic ta jamal ta stojol Dios c'usi smulic li israeletique

¹ Ta chanib xcha'vinic (24) c'ac'al yochel li svucubal ue, la stsob sba scotol li israeletique; laj yictaic ixim; la slapic c'u'il sventa at-o'nton, xchi'uc laj yac' ts'u'ilum ta sjolic.

² Slecoj laj yac' sbaic xchi'uc li yanlumetique. Iva'iic, te lic yalic ta jamal smulic xchi'uc smul stot sme'ic.

³ C'alal te va'alique, oxib ora laj yich'ic aptabel c'usi chal li smantal Muc'ul Dios cu'untique. Jech oxib ora ijalij noxtoc ti c'alal laj yal ta jamal smulique xchi'uc ti laj yich'ic ta muc' li Muc'ul Diose.

⁴ Li Jesúa, Bani, Cadmiel, Sebanías, Bani, Serebías, Bani, xchi'uc Quenanie, ja' li levietique, iva'iic ta luchlebal, tsots lic c'opojicuc ta stojol li Muc'ul Diose.

⁵ Li Jesúa, Cadmiel, Bani, Hasabnías, Serebías, Hodías, Sebanías xchi'uc Petaías, ja' li levietique, jech laj yalic: “Va'lanic, albeic slequilal sbatel osil li Muc'ul Dios cu'untique. Ich'biluc ta muc', toybiluc cu'untic ta q'uejintael, ta yalbel slequilal li xch'ul bie”, xiic.

⁶ Jech lic yalic: “Muc'ul Dios, vo'ot no'ox atuc Diosot, mu'yuc boch'o yan. Vo'ot laj apas li vinajel xchi'uc li jayc'ol ta ven toyol oye, xchi'uc li c'usitic te oye. Vo'ot laj apas li banamile xchi'uc scotol li c'usitic te oye. Vo'ot laj apas li nabetique xchi'uc scotol c'usitic te oye. Vo'ot laj avac' ayinuc scotol li c'usitic oye. Scotol li c'usitic oy ta vinajele chayich'icot ta muc'.

⁷ “Muc'ul Dios, vo'ot Diosot ti laj at'uj li Abrame, ti laj avic' loq'uel ta Ur ta yosilal caldeaetique, xchi'uc ti Abraham xa ic'ot sbi avu'une,

⁸ laj avil ti lec jun yo'nton ta atojole; laj achapan achi'uc ti chavac'be li banamil te ta yosilal cananetic, hetetic, amorretic, ferezetic, jebusetic, xchi'uc gergesetique yu'un ja' chich' comel li smomnich'nabtaque. Ic'ot ta pasel li c'usi laj avale, yu'un toj tuc' avo'nton.

⁹ Laj avil ti toj ep svocolic te ta Egipto li jmoltot jyame'cutic ta vo'one, xchi'uc laj ava'ibe li yoq'uel yavanelic c'alal te oyic ta Tsajal Nabe.

¹⁰ Laj avac' ta ilel muc'tic sq'uelubil atsatsal ta stojol li Faraone xchi'uc li xchi'iltac ta abtele xchi'uc scotol li egiptoetique, yu'un laj avil ti toj abul sbaic ta uts'intael yu'unic li israeletique. Ja' jech laj avac' muq'uibuc batel ac'oplal jech chac c'u cha'al li' ta orae.

¹¹ Laj ach'ac ta o'lol li nabe, jech ta taqui banamil xa ijelovic tal avu'un. Li jnutsvanejetique laj amuc ochel ta chac nab jech chac c'u cha'al ton ti ta chac nab to mucule.

¹² Ta c'ac'altique ta toc laj abeiltas tal. Yan ta ac'ubaltique ta c'oc' laj abeiltas tal, yu'un jech ac'o yil sbeic ti bu chbatique.

¹³ “Ts'acal layal tal ta vits Sinaí, laj ac'opan yalel tal c'alal ta vinajel li jmoltotaccutique. Laj avac'be tuq'uil tojobtasel xchi'uc mantaletic ti puru melelique, xchi'uc lequil chanubtasel, xchi'uc yantic c'usitic ac'o spasic.

¹⁴ Laj avalbe noxtoc ti oy jun c'ac'al xcuxubil co'ntoncutique, ti ja' jun c'ac'al voc'bil o ta atojole, xchi'uc ti ja' ta sventa Moisés laj avac' comel li mantaletic, li chanubtaseletic, xchi'uc li c'usitic yantic laj avale.

¹⁵ Jech noxtoc laj avac'be yalel tal sve'elic ta vinajel ti c'alal ivi'najique, xchi'uc laj aloq'ues vo' ta ch'en ti c'alal mu'yuc ya'alique. Ts'acal laj avalbe ti ac'o xa ochicuc batel ta banamil ti bu avalojbeic ono'ox ta jamal chavac'bee.

¹⁶ “Ja' xa stuquic lic stoy sbaic ta atojol, la spas ta tsots yo'ntonic; muc xich'ic ta muc' li mantaletic avu'une.

¹⁷ Muc stuc'ulanic, muc svules ta sjolic li atsatsal avu'el laj apas ta stojolique. Ja' no'ox la spas ta tsots yo'ntonic, ta stoyobbailic la sva'anic jun banquilal yu'unic sventa ch-ic'atic sutel yan velta ta Egipto ti bu ochemic to'ox ta mozoile. Pero vo'ot li Diosot ti oy perdón avu'une, ti vocol chlic sc'ac'al avo'ntone, ti ja' toj ep li c'uxubinel avu'une, jech muc xajip comel ta avo'nton.

¹⁸ Jech noxtoc c'alal la spasic sloc'obal ch'ium tot vacax ta unijesbil taq'uine, jech laj yalic: ‘Li'i ja' dios cu'untic ti la sloq'uesutic tal ta Egiptoe’, xiic. Bats'i toj ven chopol ta jyalel li c'usi la spasique.

¹⁹ Pero ta sventa ti toj ech'em xc'uxul avo'ntone, jech muc xavicta comel te ta xocol banamil. Muc xaloq'uesbe ta stojolic li jvol toc ti ja' ibeiltasatic o tal ta c'ac'altique xchi'uc ti ic'ataj ta c'oc' sventa tsbeiltasatic o tal ta ac'ubaltic yu'un jech chil sbeic bu chbatique.

²⁰ Vo'ot atuc tal achanubtas ta slequil avo'nton. Jech noxtoc mu'yuc laj aquechanbe yac'bel li manavaj sve'ique, xchi'uc laj ono'ox avac'be vo' yuch'ic ti c'alal taquin yo'ntonique.

²¹ C'alal te oyic ta xocol banamil cha'vinic (40) jabile, laj avac'be sve'elic; mu'yuc xlaj sc'u' spoq'uic, mu'yuc situb yacanic, xchi'uc mu'yuc c'usi yan sc'an laj ya'yic o.

²² “Laj avac'be ta sc'obic li ajvaliletique xchi'uc c'alal ta yosilalic. Ta jujuvoc' laj avac'be yich'ic. Ja' laj avac'be yich'ic li Hesbón, ja' li yosilal ajvalil Sehone, xchi'uc li Basán yosilal ajvalil Oge.

²³ Laj abolesbe yalab xnich'nabic jech chac c'u cha'al c'analetic ta vinajel, xchi'uc laj avic' batel ta banamil ti bu avalojbe ono'ox jmoltot jyame'cutic ta vo'one chavac'be yich'ique.

²⁴ Ja' xa alab nich'naletique ital yich'ic li banamile, laj abic'tajesbe ta stojolic li jnaclumetic tee, ja' li cananetique. Laj avac'be ta sc'obic c'alal ta ajvaliletic c'alal ta lumetic yu'unic, yu'un ac'o spasbeic li c'usi tsc'an yo'ntonique.

²⁵ Ja' i'och ta sc'obic li lumetic ti lec setbilic ta tsatsal coraltone xchi'uc li yaxal banamiletique. Xchi'uc laj yu'uninic ep naetic puru lequic c'usitic te oy, xchi'uc pozoetic, ts'usubtic, olivaetic, xchi'uc jsatinom te'etic. Ja' la slajesic scotol, lec noj xch'utic o, jech xcuxet no'ox yo'ntonic ta sventa li slequil avo'ntone.

²⁶ “Pero la sa'boxuc sc'ac'al avo'nton, la stoy sbaic ta atojol; la sva'lupatinic comel li amantaltaque. La smilic li avaj'alc'optac ti jamal i'albatic smulique, xchi'uc ti i'albatic ti ac'o suticuc tal ta atojole. Toj ven chopol li c'usi la spasique.

²⁷ Jech lic avac' ochicuc ta sc'ob yajcontraic, te lic uts'intaaticuc. C'alal ja'o chich'ic ep vocole, la sc'anic coltael ta atojol, jech laj ava'ibe sc'opic c'alal ta vinajel. Lic at'uj boch'otic xu' chcoltaatic loq'uel ta sc'ob li yajcontraique, yu'un toj c'uxic ta avo'nton.

²⁸ “Pero c'alal jun xa yo'ntonic avu'une, lic stoy sbaic ta atojol yan velta. Jech lic avac' ochicuc ta sc'ob yajcontraic noxtoc, lic yich'ic uts'intael. Ts'acal lic sc'anic coltael ta atojol yan velta. Pero ta sventa ti toj ech'em smuc'ul avo'ntone, laj ava'ibe tal sc'opic c'alal ta vinajel, ep ta velta laj acolta.

²⁹ Laj ataq'ui, yu'un ac'o xch'unic yan velta li amantaltaque, pero muc xich'ic ta muc'. Ja' no'ox la stoy sbaic ta atojol. Jech te la sta smulic ta sventa li mantaletic avu'un ti sc'oplal tsta o xcuxlejal li boch'o chch'une. La spas ta tsots yo'ntonic; la stoy sbaic ta atojol, jech muc xich'ic o ta muc' li taq'uiel avu'une.

³⁰ Ep jabil laj ats'icbe; ta slequil avo'nton atuc laj ataq'ui ta sventa li avaj'alc'optaque, pero muc xich'ic ta muc'. Jech lic avac' ochicuc ta sc'ob yan lumetic ta banamil.

³¹ Pero ta sventa ti toj ech'em smuc'ul avo'ntone, muc xacomtsan, muc xavules o, yu'un vo'ot Diosot ti toj ep slequil avo'ntone; vo'ot li muc'ul jc'uxubinvanejote.

³² “Ja' yu'un, vo'ot li Diosot cu'uncutic ti ech'em amuc'ule, ti toj tsotsote, ti xi'bilote, ti mu xch'ay ta avo'nton li c'usi chapanbil avu'une xchi'uc li c'uxubinel avu'une, ana'oj ti toj tsots svocol laj yich'ic li ajvaliletic, li banquilaletic, li paleetic, li j'alc'opetic, li jmoltotaccutic, xchi'uc scotol li jchi'iltaccutic c'alal yorail cuxul li ajvaliletic yu'un asiriaetique xchi'uc ti ja' jech o c'alal to tanae.

³³ Pero li vo'ote tuc' c'usi chapas, mu chopoluc li c'usitic laj avac' taluc ta jtojolcutique. Yan li vu'uncutique toj chopol c'usitic la jpascutic.

³⁴ Li ajvaliletic, li banquilaletic, li paleetic cu'uncutique xchi'uc li jmoltotaccutique muc spasic, muc xich'ic ta muc' li mantaletic avu'une xchi'uc li chanubtaseletic avu'une xchi'uc li taq'uiel laj avac'beique.

³⁵ C'alal oy to'ox ajvalil yu'unique, ac'o me laj avac'be ep c'usitic oy yu'unic, ac'o me laj avac'be lec epal osil, lec yaxal banamil, pero mu'yuc ono'ox laj yich'icot ta muc'; muc scomtsanic li c'usitic chopol tspasique.

³⁶ “Q'uelavil li' ta orae, ochemuncutic ta mozoil li' ta banamil ti bu avac'ojbe li jmoltotaccutic sventa ac'o sve'ic li c'usitic chloc' li'i, xchi'uc li c'usitic yan xloc' x'ayin li'i.

³⁷ Scotol li c'usitic lequic chloc' li'i ja' chich'ic li ajvaliletic ti laj avac' spasuncutic ta mantal ta scoj jmulcutique. Ja' no'ox tspas c'usi tsc'an yo'nton ta jtojolcutic jchi'uc li jts'unub covolcutique. Ja' yu'un li' ta orae toj ep li jvocolcutique”, xi la sc'opanic Dios.

La xchap sc'opic scotol israeletic ti chch'unbeic smantal Diose

³⁸ Jech te lic calcutic ta jamal ti ta jch'unbecutic smantal li Diose. Te lic jts'ibacutic ta vun; laj yac' lec sfirmaic li banquilaletic, li paleetic cu'uncutique xchi'uc li levietique.