Nehemías 8 - Bible in Tzotzil de Chenalhó with Deuterocanon

¹ Scotol li israeletique te la stsob sbaic ta nopol ti'coralton Vo'etic sbi, yu'un ja' lec xocol te. Jun no'ox laj ya'ay sbaic ta scotolic. Te lic yalbeic jchanubtasvanej Esdras ti ac'o yich' loq'uel tal li mantaletic yu'un Moisés ti laj yac' Muc'ul Dios ta sventa Israele.

^2-3 Ta sba c'ac'al yochel li svucubal ue, li pale Esdrase laj yich' loq'uel tal li svunal mantal te ta stojol scotol israeletic c'alal te tsobolic ta nopol ti'coralton Vo'etic sbie, te tsobolic c'alal ta vinic ta antsetic, xchi'uc li boch'otic xa'ibeic xa jutuc smelole. Li Esdrase te lic yapta ta stojol scotol israeletic li svunal mantale. La sliques ta sob c'alal to ta o'lol c'ac'al. Scotol li israeletique jun yo'nton laj ya'yic c'alal laj yich' aptael li mantaletique.

⁴ Li jchanubtasvanej Esdrase te iva'i ta jun toyol luchlebal pasbil ta te', ja' pasbil sventa li tsobajele. Ja' te va'ajtic ta sbats'ic'ob li Matatías, Sema, Anías, Urías, Hilquías, xchi'uc Maasiase. Yan ta sts'ete, ja' te va'ajtic li Pedaías, Misael, Malquías, Hasum, Hasbadana, Zacarías, xchi'uc Mesulame.

⁵ Li Esdrase la sjam ta stojol scotol israeletic li vune, yu'un lec toyol luchul ta stojol li xchi'iltaque. Jech te lic sva'an sbaic scotol li israeletique.

⁶ Li Esdrase te lic yalbe slequilal Dios, ja' li Muc'ul Diose. Scotol li israeletique la stoy sc'obic, jech laj yalic: “¡Jechuc! ¡Jechuc!”, xiic. La squejan spatan sbaic ta banamil; laj yich'ic ta muc' li Muc'ul Diose.

^7-8 Li levietic, ja' li Jesúa, Bani, Serebías, Jamín, Acub, Sabetai, Hodías Maasías, Kelita, Azarías, Jozabed, Hanán, xchi'uc Pelaiae, la xcha'aptaic lec li mantaletique; laj yalbeic lec smelol, yu'un jech ac'o ya'ibeic lec smelol li israeletic te tsobolique.

⁹ Li Nehemías, ja' li ajvalile, xchi'uc li pale Esdras, ja' li jchanubtasvaneje, xchi'uc li levietic, ja' li boch'otic la xcha'albeic lec smelol mantaletic li xchi'iltaquique, jech laj yalbeic scotol li israeletique: “Mu xa'oq'uic; mu xavat avo'ntonic, yu'un li jun c'ac'al li'i ja' ch'ul c'ac'al yu'un li Muc'ul Dios cu'untique”, xutic. Yu'un lic oq'uicuc scotolic ti c'alal laj yich' aptael li smantal Diose.

¹⁰ Jech laj yalbeic noxtoc: “Batanic, bat ve'anic li c'usi toj lequic oy avu'unique; uch'anic li ya'lel ats'usubic ti lec to chi'e. Iq'uic ta ve'el ec li boch'otic mu'yuc smeltsanoj sve'elique, yu'un ja' jun ch'ul c'ac'al yu'un li Muc'ul Dios cu'untique. Mu xavat avo'ntonic, yu'un li xcuxetel co'ntontic chac' Muc'ul Diose ja' stsatsal co'ntontic”, xutic.

¹¹ Li levietique la spajesic scotol li jchi'iltaccutique jech laj yalbeic: “Mu xa'oq'uic, mu xavat avo'ntonic, yu'un ja' jun ch'ul c'ac'al yu'un li Muc'ul Diose”, xutic.

¹² Jech scotol li israeletique bat ve'icuc, bat yuch'ic vo', xchi'uc laj yac'beic sve'el ec li boch'otic mu'yuc sve'elique. Toj xcuxet no'ox yo'ntonic, yu'un ic'ot ta yo'ntonic ti c'u x'elan ichanubtasatique.

La spasic q'uin sventa ch-ochic ta yaxnaetic

¹³ Ta yoc'omal la stsob sbaic li banquilaletic ta jujuchop sbiique, xchi'uc li paleetique, li levietique, xchi'uc li Esdrase, ja' li jchanubtasvaneje, yu'un ta sq'uelic lec c'usitic chal li smantal Diose.

¹⁴ Te ts'ibabil la staic ti bu albil yu'un Muc'ul Dios li Moisés ti ac'o ochicuc ta yaxna, ti ac'o spasic jun q'uin ta svucubal ue.

¹⁵ Jech te lic spuquic mantal ta scotol slumalic, xchi'uc ta Jerusalén ti ac'o bat sa'ic tal c'ob olivaetic, te'tical olivaetic, arrayán te', xanetic xchi'uc yantic te'etic ti lec pimic yanale, yu'un ac'o spasic li yaxnaetic jech chac c'u cha'al chal ta mantale.

¹⁶ Jech scotol israeletic bat sa'ic tal, te vul spasic li yaxnaetic yu'unique. Oy boch'otic la spasic ta yamaq'uil sjol snaic, ta yamaq'uic, xchi'uc ta yamaq'uil ch'ulna te ta nopol yo' bu ti' Vo'etic sbie, xchi'uc ta nopol yo' bu ti' Efraín sbie.

¹⁷ Scotol li boch'otic isutic tal ta chuquel ta yan banamile la spasic li xyaxnaique. Toj xcuxet yo'ntonic, yu'un mu'yuc ono'ox baq'uin jech spasic q'uin; ja'o no'ox la spasic c'alal cuxul li Josué xnich'on Nune.

¹⁸ Vucub c'ac'al la spasic li q'uine. Yan ta xvaxquibal c'ac'ale la spasic ch'ul tsobajel jech chac c'u cha'al chal li svunal smantal Diose. Li Esdrase jujun c'ac'al laj yapta c'usi chal li mantaletic c'alal tspasic vucub c'ac'al q'uine.