Nehemías 13 - Bible in Tzotzil de Chenalhó with Deuterocanon

La xcha'lecubtas scotol li Nehemiase

¹ Ja'o yorail laj yich' aptael ta stojol scotol jchi'iltactic li svun Moisese. Te ts'ibabil la staic ti j'ech'el mu xu' tstic' sbaic yo' bu tstsob sbaic steclumal Dios li amonetic xchi'uc moabetique.

² Yu'un li stuquique mu'yuc x'ay snupic ta be xchi'uc ve'lil xchi'uc vo' li israeletique; ja' no'ox la stojic ta taq'uin li Balaam sventa ac'o lajesbatuc stsatsalique. Pero li Diose la sc'atajes ta lec li c'usi chopol ta xa'ox spase.

³ C'alal laj ya'yic c'usi chal li mantale, la svoq'uic loq'uel ta stojol jchi'iltactic li yanlumetic te scapoj sbaique.

⁴ C'alal mu'yuc to'ox chc'ot ta pasel jeche, li pale Eliasibe ja' sventainoj li c'usitic oy ta ch'ulna yu'un Diose. Ja' co'ol yo'nton xchi'uc noxtoc li Tobiase.

⁵ Ja' yu'un li Eliasibe yac'ojbe sventain Tobías li jun muc'ta cuarto yo' bu snac'ubil to'ox li matanaletique, li pome, li c'usitic chtun ta ch'ulnae, li jujun ta lajlajuneb sventa trigo, ya'lel ts'usub, xchi'uc aceite ti sc'oplal ja' chich'ic li levietique, li jq'uejimoletique, xchi'uc li jchabi ti'naetique, xchi'uc li yantic matanaletic ti sc'oplal ja' chich'ic li paleetique.

⁶ C'alal jech la spase, ja'o mu'yuc te oyun ta Jerusalén. Yu'un c'alal iloc' lajchab xcha'vinic (32) jabil yochel ta ajvalilal te ta Babilonia li Artajerjese, lisut batel, bat jc'opan. C'alal i'ech' jayibuc c'ac'ale, la jc'anbe tal jc'ac'al yan velta li ajvalile,

⁷ yu'un chisut tal ta Jerusalén. Ja' to te laj ca'ay ti chopol c'usi la spas li Eliasib ta sventa ti lec sc'anoj sbaic xchi'uc li Tobiase, yu'un laj yac'be sventain jun cuarto te ta yamaq'uil ch'ulna yu'un Dios.

⁸ Toj chopol laj ca'ay, jech te lic jipan loq'uel scotol li c'usitic oy yu'un Tobías te ta yut cuartoe.

⁹ Te lic cal mantal ti ac'o sts'u'iltasic li cuartoe, xchi'uc te ac'o stiq'uic yan velta li c'usitic chtun ta ch'ulnae, xchi'uc li matanaletique, xchi'uc li pome.

¹⁰ Laj ca'ay noxtoc ti mu'yuc yac'ojbeic o c'usitic sc'oplal chich'ic li levietique. Ja' yu'un li levietic xchi'uc jq'uejimoletic ti ja' yich'oj yabtelic ta ch'ulnae sutemic xa batel ta yosilic jujunic.

¹¹ Jech te lic cutic li banquilaletic ta sventa ti mu'yuc xa yajval yu'unic li ch'ulna yu'un Diose. Ts'acal lic jtsob li paleetic xchi'uc levietique; laj cac'be spasic yan velta li yabtelic ono'oxe.

¹² Jech scotol li judaetique tal yaq'uic ta yavil li jujun ta lajlajuneb sventa strigoic, ya'lel sts'usubic, xchi'uc yaceiteique.

¹³ Ja' laj cac'be xchabiic li pale Selemías xchi'uc li jts'ibajom Sadoque xchi'uc jun leví vinic Pedaías sbi. Xchi'uc ja' laj cac'be ta yajcoltaubbailic li Hanán xnich'on Zacur, smomnich'on Mataniase, yu'un ja' tuc' yo'ntonic. Ja' icom ta sventaic spucbel c'usitic chich'ic li xchi'iltaquique.

¹⁴ Te la jc'opan Dios: “Dios cu'un, ich'o me ta venta; mu me xch'ay ta avo'nton li c'usitic lec la jpas li' ta ch'ulna avu'une, xchi'uc li c'usi la jpas ta sventa chavich' ich'el ta muq'ue”, xichi.

¹⁵ Ja'o yorail laj quil noxtoc ti oy boch'o te ta Judá ta spits' ya'lel sts'usub ta sc'ac'alil ta jcux co'ntoncutique, xchi'uc ta xcuch strigoic, ta xac'beic xcuch ya'lel sts'usub li sburoique, xchi'uc xchojiquil ts'usub xchi'uc higoetic xchi'uc c'usitic yan. Te laj yich'ic tal ta Jerusalén ta sc'ac'alil ta jcux co'ntoncutic. Jech te lic jtaq'uiic ta sventa li c'usitic ta xchonic ta sc'ac'alil ta jcux co'ntoncutique.

¹⁶ Jech noxtoc te italic li boch'otic liquemic ta Tiroe; laj yich'ic tal choyetic ta sc'ac'alil ta jcux co'ntoncutic, xchi'uc oy c'usitic yan laj yich'ic tal, te tal xchonbeic li judaetic ta Jerusalene.

¹⁷ Te lic cut li banquilaletic ta Judae, jech laj calbeic: —Toj chopol c'usi chapasic, yu'un chasoquesic li sc'ac'alil xcuxubil co'ntontique.

¹⁸ ¿Me mu ja'uc ono'ox jech la spasic ec li jmoltot jyame'tic ta vo'onee? Ja' yu'un li Diose laj yac' taluc vocol ta jtojoltic xchi'uc ta stojol li jlumaltique. ¿Me yu'un chac'anic ac'o epajuc sc'ac'al yo'nton Dios ta jtojoltic ti chasoquesic li sc'ac'alil xcuxubil co'ntontique? —xcut.

¹⁹ C'alal yu'un xa'ox ch-och ac'ubale, ja' xa yorail ta xlic jcux co'ntoncutic, laj cal mantal ti ac'o yich' maquel lec li ti'coraltonetic yu'un Jerusalene, ja' to me i'ech' li sc'ac'alil cuxub o'ntonale. Xchi'uc la jtac batel jayibuc j'abteletic cu'un, yu'un ac'o sq'uelic lec ti mu me boch'o x'och tal xchi'uc yicatse.

²⁰ Li jbolomaletique oy jayibuc velta te icomic ta pat coralton yu'un Jerusalén, te i'ech' yu'unic ac'ubal.

²¹ Ts'acal tsots bat jc'opanic ta sventa ti te icomic ta pat coraltone, jech laj calbeic: —¿C'u yu'un jech chapasic ti li' no'ox chacomic ta pat coraltone? Me ta to xapasic jech yan veltae, ta me jtsacoxuc —xcut. Jech muc xtalic ta sc'ac'alil ta jcux co'ntoncutic.

²² Ts'acal lic calbe levietic ti ac'o sts'u'iltas sbaique, ti ac'o xchabiic lec li ti'coraltone, yu'un jech mu me soc li sc'ac'alil xcuxubil co'ntontique. Te la jc'opan Dios: “Dios cu'un, na'o me li c'usi la jpas li'i. Pasbun perdón yu'un jmul ta sventa ti toj ep xc'uxul avo'nton ta jtojolcutique”, xichi.

²³ Laj quil noxtoc ti oy judaetic yic'anojic antsetic liquemic ta Asdod, ta Amón, xchi'uc ta Moabe,

²⁴ xchi'uc oy j'o'lol xnich'nabic ti chc'opojic ta sc'op asdodetique, yu'un mu xa sna' xc'opojic ta sc'op judaetic, jech ta sc'op xa yanlum chc'opojic.

²⁵ Laj calbe ti te tstoj stuquic li c'usi tspasique. Oy jayibuc la jmajic, la jnitbe ta sjolic. Te la jsujic ti ac'o yalic ta jamal ta stojol Dios ti mu xa me xic'be sba squerem stsebic xchi'uc li yanlumetique, xchi'uc mu me xiq'uic yanlum ants ec li stuquique. Jech to laj calbeic:

²⁶ “Le'e ja' jech smul la sta ec li Salomone, ja' li ajvalil to'ox ta Israele. Ta melel mu'yuc boch'o yan jech ajvalil ta scotol li yantic lumetique, xchi'uc ti lec c'anbil yu'un Diose jech itic'at ta ajvalilal ta scotol Israel. Pero li yanlum antsetique ja' laj yac'beic sa' smul li Salomone.

²⁷ Ja' yu'un ja' jech toj tsots chata amulic ta stojol Dios cu'untic ec ti chaviq'uic li yanlum antsetique. Mu xu' chapasic jech”, xcutic.

²⁸ Oy jun xnich'on li Joiada xnich'on banquilal pale Eliasibe, ja' smuni'anoj li Sanbalat horón vinique, la jtac loq'uel te ta jtojol.

²⁹ Te la jc'opan Dios: “Dios cu'un, na'o me li boch'o la soques li abtel sventa paleale xchi'uc li c'usi achapanoj ta sventa paleetic xchi'uc levietique”, xichi.

³⁰ Te lic jloq'ues batel scotol li yanlumetique. La jchapan lec c'u x'elan tsjelilan sbaic ta abtel noxtoc li paleetic xchi'uc levietique, jech lic spasic li c'usi yabtel jujunique.

³¹ La jchapan noxtoc li c'usi c'ac'alil albil sc'oplal chaq'uic si'e, xchi'uc li sba sat c'usitic chloc' cu'uncutique. Te la jc'opan Dios: “Dios cu'un, c'uxubinun me ta sventa li c'usitic la jpase”, xcut.