Nehemías 12 - Bible in Tzotzil de Chenalhó with Deuterocanon

Sc'oplal paleetic xchi'uc levietic

¹ Li paleetic xchi'uc levietic ti jmoj isutic tal xchi'uc Zorobabel xnich'on Salatiel xchi'uc Jesuae ja' li'i: Li paleetique ja' Seraías, Jeremías, Esdras,

² Amarías, Maluc, Hatús,

³ Secanías, Rehum, Meremot,

⁴ Iddo, Gineto, Abías,

⁵ Mijamín, Maadías, Bilga,

⁶ Semaías, Joiarib, Jedaías,

⁷ Salú, Amoc, Hilquías, xchi'uc Jedaías. Le'e ja' banquilaletic yu'un paleetic xchi'uc yuts' yalaltaquic c'alal cuxul to'ox li Jesuae.

⁸ Li levietique ja' li'i: Jesúa, Binúi, Cadmiel, Serebías, Judá, xchi'uc Matanías. Le'e ja' yabtel tsq'uejintabeic slequilal Dios xchi'uc yuts' yalaltaquic.

⁹ Yan li Bacbuquías xchi'uc Uni xchi'uc yuts' yalaltaquique ja' te chq'uejinic ta jot ch'ulna ec.

¹⁰ Li Jesuae inich'naj, Joiacim sbi; li Joiacime inich'naj, Eliasib sbi; li Eliasibe inich'naj, Joiada sbi;

¹¹ li Joiadae inich'naj, Jonatán sbi; li Jonatane inich'naj, Jadúa sbi.

¹² C'alal yorail cuxul li Joiacime, ja' jech sbiic li banquilal yu'unic ta jujuchop sbiic paleetique: Ta sventa smomnich'nab Seraiase ja' Meraías; ta sventa smomnich'nab Jeremiase ja' Ananías;

¹³ ta sventa smomnich'nab Esdrase ja' Mesulam; ta sventa smomnich'nab Amariase ja' Johanán;

¹⁴ ta sventa smomnich'nab Melicue ja' Jonatán; ta sventa smomnich'nab Sebaniase ja' José;

¹⁵ ta sventa smomnich'nab Harime ja' Adna; ta sventa smomnich'nab Meraiote ja' Helcai;

¹⁶ ta sventa smomnich'nab Iddoe ja' Zacarías; ta sventa smomnich'nab Ginetone ja' Mesulam;

¹⁷ ta sventa smomnich'nab Abiase ja' Zicri; ta sventa smomnich'nab Miniamín, xchi'uc ta sventa smomnich'nab Moadiase ja' Piltai;

¹⁸ ta sventa smomnich'nab Bilgae ja' Samúa; ta sventa smomnich'nab Semaiase ja' Jonatán;

¹⁹ ta sventa smomnich'nab Joiaribe ja' Matenai; ta sventa smomnich'nab Jedaiase ja' Uzi;

²⁰ ta sventa smomnich'nab Salaie ja' Calai; ta sventa smomnich'nab Amoque ja' Eber;

²¹ ta sventa smomnich'nab Hilciase ja' Hasabías; ta sventa smomnich'nab Jedaiase ja' Natanael.

²² C'alal yorail cuxul li Eliasib, Joiada, Johanán, xchi'uc Jaduae, ja' laj yich'ic tsacbel ta vun sbiic sventa banquilaletic ta jujuchop li levietic xchi'uc paleetique, ja' to ti c'alal i'och ta ajvalilal ta Persia li Darioe.

²³ Li smomnich'nab Levie, ja' li banquilaletic ic'otic ta jujuchop sbiique, ja' laj yich'ic tsacbel sbiic ta svunal c'usitic c'otem ta pasel c'alal to ta yorail li Johanán smomnich'on Eliasibe.

²⁴ Li banquilaletic yu'un levietique ja' Hasabías, Serebías, Jesúa xnich'on Cadmiel, xchi'uc yuts' yalalic. Ja' jnitvanej yu'unic sventa chich'ic ta muc' Dios xchi'uc c'alal tstojbeic ta vocol. Ja' jech yabtelic ti c'alal ja'o c'otem ta sventaic li abtele, yu'un tsjelilan sbaic ta abtel jech chac c'u cha'al yaloj ono'ox li David, yajtunel Diose.

²⁵ Li Matanías, Bacbuquías, Obadías, Mesulam, Talmón, xchi'uc Acube ja' jchabi ti'naetic sventa ochebal.

²⁶ Scotolic le'e ja'o te ch-abtejic ti c'alal yorail cuxul li Joiacim xnich'on Jesúa, smomnich'on Josadaque, ja'o ti c'alal ochemun ta ajvalil vu'un li Nehemiasune, xchi'uc ti c'alal ochem ta paleal li Esdrase, ja' li jchanubtasvaneje.

Laj yaq'uic ta sc'ob Dios li coraltone

²⁷ C'alal laj cac'cutic ta sc'ob Dios li coralton yu'un Jerusalene, la jt'uncutic scotol li levietic ti butic nacalic batele, yu'un chquic'cutic tal ta Jerusalén sventa chaq'uic ta sc'ob Dios li coraltone. La jpascutic lec q'uin ta q'ueojetic, ta arpaetic, ta sepsep taq'uinetic, xchi'uc ta yantic arpaetic.

²⁸ Laj yich'ic tsobel tal scotol li jq'uejimoletic ti te nacalic ta spat xocon Jerusalene xchi'uc ta tsobtsobnaetic ta Netofa,

²⁹ ta Bet-Gilgal, ta yosilal Geba, xchi'uc ta Azmavete. Yu'un li jq'uejimoletique ta jujutsob inaquiic batel ta spat xocon Jerusalén.

³⁰ Laj yac' sbaic ta ts'u'iltasel li paleetic xchi'uc levietique, xchi'uc la sts'u'iltasic ec li jchi'iltactique, xchi'uc li ti'coraltonetique, xchi'uc li coraltone.

³¹ Li banquilaletic ta Judae laj calbeic ti ac'o muyicuc ta ba coraltone, xchi'uc la jchapan jq'uejimoletic; ep yic'anoj sbaic ta jujutsob. Li jtsobe te ixanovic ta ba coralton ta stuq'uil bats'ic'ob. Te ibatic ta stuq'uil ti'coralton ti Ch'ayum c'a'ep sbie.

³² Li Osaiase ja' te nabal ibat ta spat li jq'uejimoletique; ja' xchi'uc batel j'o'lol li banquilaletic ta Judae,

³³ ja' li Azarías, Esdras, Mesulam,

³⁴ Judá, Benjamín, Semaías, xchi'uc Jeremiase.

³⁵ Li paleetic yich'oj batel yoq'uesique, ja' Zacarías xnich'on Jonatán, ja' smoltotac li Semaías, Matanías, Micaías, Zacur, xchi'uc Asafe.

³⁶ Li Zacariase te xchi'uc li yuts' yalaltaque, ja' li Semaías, Azarael, Milalai, Gilalai, Maai, Natanael, Judá, xchi'uc Hananie. Ja' yich'anojic li sonetic laj yac' ta pasel David, yajtunel Diose. Ja' ba'yucbe yu'unic li jchanubtasvanej Esdrase.

³⁷ C'alal ic'otic ta yac'ol ti' Nio' sbie, te imuyic batel yo' bu xmuy li coralton ta nopol tec'ubal yu'un Lum yu'un Davide. Te ijelovic batel ta nopol sna David c'alal to ta ti' Vo'etic sbi ta stuq'uil sloq'ueb c'ac'al.

³⁸ Li xcha'tsobal jq'uejimoletique te ibatic ta stuq'uil ts'etc'ob ta ba coralton. Li vu'une xchi'uc li yan j'o'lol banquilaletique te nabal libatcutic ta spatic li jq'uejimoletique. Te liliccutic batel ta toyol q'uelub osil Hornoetic sbi, c'alal to ta pimil coralton.

³⁹ Te lijelovcutic batel ta sba ti'coralton Efraín, Jesana, xchi'uc ta ti'coralton Choyetic sbi, xchi'uc ta toyol q'uelub osil Hananeel, xchi'uc ta toyol q'uelub osil Hamea, c'alal to ta ti'coralton Chijetic sbi. Te lipajcutic ta sba ti'coralton Chuquinab sbi.

⁴⁰ Li xcha'tsobal jq'uejimoletique te ic'otic ta ch'ulna yu'un Dios. Li vu'une te lic'ot jchi'uc ec li j'o'lol banquilaletic xchi'inojicun batele.

⁴¹ Li paleetic ti tsjupanic oq'uese ja': Eliacim, Maaseías, Miniamín, Micaías, Elioenai, Zacarías, Hananías,

⁴² Maasías, Semaías, Eleazar, Uzi, Johanán, Malquías, Elam, xchi'uc Ezer. Li jq'uejimoletique lec tsots iq'uejinic; ja' ventainbilic yu'un li Izrahíase.

⁴³ C'alal yorail jech la jpascutique, toj ep laj yaq'uic sts'unub yovolic ta smoton Dios sventa chich' milel. Bats'i xcuxet no'ox yo'ntonic xchi'uc yajnil xnich'nabic, yu'un toj ep i'ac'bat xcuxetel yo'ntonic yu'un li Diose. Nom to xvinaj ti xivochetcutic no'ox te ta Jerusalene.

Sc'oplal c'usitic chich'ic paleetic xchi'uc levietic

⁴⁴ C'alal jech ic'ot ta pasele, ja'o yorail la jt'ujcutic boch'o tsventainic li yavil taq'uinetique, li yavil matanaletique, li yavil sba sat c'usitic chloc' cu'uncutique, xchi'uc li jujun ta lajlajunebe. Yu'un ja' te chich' tsobel li c'usitic chaq'uic ta smoton Dios ta jujun slumalic jech chac c'u cha'al chal li mantaletique, ti ja' sventa chich' li paleetic xchi'uc levietique. Yu'un li judaetique toj xcuxet no'ox yo'ntonic ta sventa li paleetic li levietic te ch-abtejique,

⁴⁵ xchi'uc ta sventa li jq'uejimoletique xchi'uc li jchabi ti'naetique, yu'un ja' tspasic li abtel sventa chich' ich'el ta muc' Diose xchi'uc li c'usitic chich' ts'u'iltasel jech chac c'u cha'al yaloj ono'ox David xchi'uc Salomone, ja' li xnich'one.

⁴⁶ Yu'un ta vo'one c'alal cuxul to'ox li David xchi'uc Asafe oy ono'ox banquilaletic yu'un li jq'uejimoletic sventa tsq'uejintabeic slequilal Diose xchi'uc ta sventa c'usitic stojbeic ta vocole.

⁴⁷ Ja' yu'un c'alal yorail cuxul li Zorobabel xchi'uc vu'un li Nehemiasune, scotol li jchi'iltactic ta israelale laj yac'beic c'usitic chtun yu'unic jujun c'ac'al li jq'uejimoletique xchi'uc li jchabi ti'naetique. Ja' xa laj yac'beic ec li levietique; jech ec li levietique ja' xa laj yac'beic ec li smomnich'nabtac Aarone.