Nehemías 11 - Bible in Tzotzil de Chenalhó with Deuterocanon

Jnaclumetic ta Jerusalén

¹ Li j'abteletic cu'uncutique te inaquiic ta Jerusalén. Li yantic jchi'iltactique la spasic canal tajimol ta sventa boch'o xu' chtal naquiicuc te ta Jerusalén jujun ta lajlajunbej na, ja' li ch'ul lum yu'un Diose. Li yan baluneb icomique te inaquiic ta yantic lumetic.

² Scotol li jchi'iltactique la sc'anbeic bendición li boch'otic yutsil yo'ntonic laj yalic stuquic te chnaquiic ta Jerusalene.

³ Li banquilaletic cu'uncutique te inaquiic o ta Jerusalén. Li yan jchi'iltactic ta israelale, li paleetique, li levietique, li j'abteletic ta ch'ulnae, xchi'uc li smomnich'nabtac j'abteletic yu'un Salomón ta vo'onee, te inaquiic ta lumetic ta yosilal Judá ti bu ono'ox yosil stuquique.

⁴ Jech noxtoc oy jayibuc jchi'iltactic liquemic ta Judá xchi'uc ta Benjamín te inaquiic ta Jerusalén. Li boch'otic liquemic ta Judae ja' Ataías xnich'on Uzías, smomnich'on Zacarías xnich'on Amarías, smomnich'on Mahalaleel, ja' smomnich'nabtac li Farese;

⁵ xchi'uc Maasías xnich'on Baruc, smomnich'on Colhoze xnich'on Hazarías, smomnich'on Adaías xnich'on Joiarib, smomnich'on Zacarías xnich'on Siloni.

⁶ Ti c'u yepal te inaquiic ta Jerusalén li smomnich'nabtac Farese ja' chanib ciento xchi'uc vaxquib xchanvinic (468) ta scotolic ti xu' xa yu'unic paspleitoe.

⁷ Li boch'otic liquemic ta Benjamine ja' Salú xnich'on Mesulam, smomnich'on Joed xnich'on Pedaías, smomnich'on Colaías xnich'on Maasías, smomnich'on Itiel xnich'on Jesaías,

⁸ xchi'uc yuts' yalalic Gabai xchi'uc Salai; ja' baluneb ciento xchi'uc vaxquib xcha'vinic (928) ta scotol.

⁹ Li banquilal yu'unique ja' Joel xnich'on Zicri, xchi'uc Judá xnich'on Senúa; ja' xchibal banquilal yu'unic te ta slumalic.

¹⁰ Li paleetique ja' Jedaías xnich'on Joiarib, smomnich'on Jaquín,

¹¹ xchi'uc Seraías xnich'on Hilquías, smomnich'on Mesulam xnich'on Sadoc, smomnich'on Meraiot xnich'on Ahitob; ja' banquilal te ta ch'ulna yu'un Dios,

¹² xchi'uc yantic xchi'iltaquic ta abtel te ta ch'ulna, ja' vaxquib ciento xchi'uc chib xcha'vinic (822) ta scotol. Te oy noxtoc Adaías xnich'on Jeroham, smomnich'on Pelalías xnich'on Amsi, smomnich'on Zacarías xnich'on Pasur, smomnich'on Malquías.

¹³ Xchi'uc te oy yan xchi'iltaquic, ja' li banquilaletic ta jujuchop sbiique; ja' chib yoxlajunvinic (242) ta scotolic. Xchi'uc te oy noxtoc Amasai xnich'on Azareel, smomnich'on Azai xnich'on Mesilemot, smomnich'on Imer,

¹⁴ xchi'uc yan xchi'iltaquic ti lec xu' yu'unic paspleitoe. Ja' vaxquib svucvinic (128) ta scotol. Li banquilal yu'unique ja' Zabdiel xnich'on Gedolim.

¹⁵ Li levietique ja' li'i: Semaías xnich'on Hasub, smomnich'on Azricam xnich'on Hasabías, smomnich'on Buni;

¹⁶ xchi'uc Sabetai xchi'uc Jozadab, ja' banquilaletic yu'un li levietique, ja' jpasmantaletic ta sventa abtel te ta spat xocon ch'ulna yu'un Dios;

¹⁷ xchi'uc Matanías xnich'on Micaía, smomnich'on Zabdi xnich'on Asaf, ja' li boch'o tsnit ta q'ueoj jq'uejimoletique xchi'uc ti c'alal oy c'usitic tstojbeic ta vocol Diose; xchi'uc Bacbuquías, ja' xchibal banquilal te ta stojol xchi'iltac, xchi'uc Abda xnich'on Samúa, smomnich'on Galal xnich'on Jedutún.

¹⁸ Ti c'u yepal levietic te inaquiic ta ch'ul lume ja' lajunvinic xchi'uc chanib yo'vinic (284) ta scotol.

¹⁹ Li jchabi ti'naetique ja' Acub, Talmón, xchi'uc yuts' yalalic; ja' lajchab sbalunvinic (172) ta scotol.

²⁰ Li yantic israeletique xchi'uc li yantic paleetic xchi'uc levietique te bat naquiicuc ta lumetic yu'un stuquic ta yosilal Judá.

²¹ Li j'abteletic ta ch'ulnae te inaquiic ta Ofel. Ja' banquilaletic yu'unic li Ziha xchi'uc Gispae.

²² Li banquilal yu'un levietic te ta Jerusalene ja' Uzi xnich'on Bani, smomnich'on Hasabías xnich'on Matanías, smomnich'on Micaía, ja' li smomnich'nabtac Asafe. Le'e ja' sventainojic jq'uejimoletic te ta ch'ulna yu'un Dios.

²³ Yu'un li ajvalile yaloj mantal c'u x'elan tsvoq'uilan sbaic ta q'ueoj ta jujun c'ac'al li jq'uejimoletique.

²⁴ Li boch'o va'al yu'unic ta sventa chc'opoj ta stojol ajvalil c'alal oy ya'yejique ja' Petaías xnich'on Mesezabeel, smomnich'on Zera, xnich'on Judá.

Sc'oplal butic inaquiic li yantic israeletique

²⁵ Oy jayibuc li boch'otic liquemic ta Judae te inaquiic ta lum Quiriat-arba, ta lum Dibón, ta lum Jecabseel,

²⁶ ta Jesúa, ta Molada, ta Bet-pelet,

²⁷ ta Hazar-sual, ta Beerseba,

²⁸ ta Siclag, ta Mecona,

²⁹ ta En-rimón, ta Zora, ta Jarmut,

³⁰ ta Zanoa, ta Adulam, ta Laquis xchi'uc ta yosilal, ta Azeca xchi'uc ta tsobtsobnaetic yu'un li jujun lume. Te lic naquiicuc batel ta Beerseba c'alal to ta stenlejaltic Hinom.

³¹ Li boch'otic liquemic ta Benjamine te inaquiic ta Geba, ta Micmas, ta Aía, ta Betel, xchi'uc ta tsobtsobnaetic yu'un,

³² ta Anatot, ta Nob, ta Ananías,

³³ ta Hazor, ta Ramá, ta Gitaim,

³⁴ ta Hadid, ta Seboim, ta Nebalat,

³⁵ ta Lod, xchi'uc ta Ono, xchi'uc ti bu stenlejaltic yu'un Jtentaq'uinetic sbie.

³⁶ Xchi'uc oy jayibuc levietic te inaquiic ec yu'un i'ac'bat yosilic ta Judá xchi'uc ta Benjamín.