Nehemías 1 - Bible in Tzotzil de Chenalhó with Deuterocanon

La sc'opan Dios ta stojol xchi'iltac ta Jerusalén li Nehemiase

¹ Li' ja' sc'oplal Nehemías: C'alal te oyun ta lum Susa vu'un li Nehemiasun xnich'onun Hacaliase, ja' jech ic'ot ta pasel ti c'alal jtob (20) jabil xa'ox yochel ta ajvalilal li Artajerjese, ja' ta u Quisleu.

² Ja'o te ic'ot cuts' calal Hanani, xchi'inoj c'otel jayibuc viniquetic ta Judá. Te lic jac'be c'u x'elan li Jerusalene xchi'uc li boch'otic icolic batel ta mozoinel ta Babiloniae.

³ Jech laj yalbicun: “Li boch'otic isutic batel ta mozoinele toj ep svocolic, toj ep q'uexlal cha'yic. Yu'un li coralton yu'un Jerusalene laj yich' jinesel; li smaque laj yich'an chiq'uel ta c'oc'”, xiyuticun.

⁴ C'alal laj ca'ye, lichoti, lic coc'ta jba. Oy jayibuc c'ac'al la cat co'nton ta sventa; laj quicta ixim, la jc'opan li Dios te oy ta vinajele.

⁵ Jech laj calbe: “Muc'ul Dios te oyot ta vinajel, vo'ot ti ech'em amuc'ul atsatsale, ti xi'bilote, ti mu xch'ay ta avo'nton li c'usi achapanoje, xchi'uc ti c'ux ta avo'nton li boch'o chayich'ot ta muc', ta xch'unic amantaltaque,

⁶ ta jc'anbot vocol ti ac'o avac' achiquin, ti ac'o avic' asat ta ya'yel jc'op ti li' chajc'opanot, vu'un li avajtunelune. Yu'un ta c'ac'al ta ac'ubal chajc'opanot ta sventa li jchi'iltac ta israelale, ja' li avajtuneltaque. Li' jamal chacalbot li jmul jtaojcutic ta atojol xchi'uc li jchi'iltaque. Ta melel c'alal ta jchi'iltac, ta cuts' calaltac jtaoj jmulcutic ta atojol.

⁷ Toj ven chopol c'usi la jpascutic ta atojol. Muc ja'uc la jch'uncutic li mantaletic, li chanubtaseletic avu'une, xchi'uc li c'usitic yan avaloj ti laj avac'buncutic ta sventa li avajtunel Moisese.

⁸ Pero na'o me ti jech ono'ox laj avalbe li avajtunel Moisese: ‘Me laj ata amulique, ta jpucoxuc batel ta yantic lumetic.

⁹ Pero me lasutic tal ta jtojole, me chlic ach'unic, me chlic apasic li mantaletic cu'une, ac'o me apucoj abaic batel c'alal to ta sti'iltac banamil, te to c'alal chbat jtsoboxuc tal, ta xquic'oxuc sutel ta banamil ti bu t'ujbil ono'ox cu'un sventa chi'ich'at ta muq'ue’, xavut ono'ox.

¹⁰ “Le'e ja' li anich'nabtaque, ja' li ateclumal ti laj apoj loq'uel tal ta amuc'ul atsatsale.

¹¹ Muc'ul Dios, ta jc'anbot vocol ti ac'o ava'ibun jc'op ti li' chajc'opanot, vu'un li avajtunelune, xchi'uc ac'o ava'ibe sc'op li avajtuneltac li' chasc'opanicote, ti tsc'an chayich'icot ta muq'ue. Ta jc'anbot vocol ti lec c'usi ac'o c'otuc ta pasel ta jtojol, vu'un li avajtunelune, xchi'uc ti ac'o c'uxucun ta yo'nton li ajvalile. Yu'un vu'un j'ac'ya'lel ts'usubun yu'un”, xcut li Diose.