Nahúm 3 - Bible in Tzotzil de Chenalhó with Deuterocanon

¹ Ay, toj abul aba, jmilvanej lum. Nojemot ta puru epalc'op xchi'uc ta uts'intavanej; me jutuc mu'yuc spajeb li c'usitic chata ta pojele.

² Xlach'lun no'ox li nucule; squits'lajet no'ox li yacan caretaetique. Xvil no'ox tal ta anil li ca'etique; toyolic no'ox xbit tal li caretae.

³ Xyolobaj no'ox tal ta anil li ca'etique; sts'aylajet no'ox tal li espadae; xjaplajet no'ox tal li lanzae. Bats'i ep boch'o yayijem chcom; bats'i ep animaetic, mu xlaj ta atel. Ta smilbil viniquic xa no'ox te tsbosi yacanic o.

⁴ Ja' ta scoj smul li Nínive ti xco'laj xchi'uc jmulavil antse ti toj c'upil sbae, ti stuc xa no'ox jeche, ti lec chanem ta ac'chamel, xchi'uc c'usitic yan xu' yu'un tspase, ti la slo'la yantic banamil, yantic lumetic ta scoj li mulil tspase, xchi'uc ta scoj li c'usi sna' spasele.

⁵ Li Muc'ul Dios ti tspas ta mantal scotol te ta vinajele jech chal: “Vu'un li' oyun sventa chtal jcontrainot. Ta jvalc'un muyel c'alal ta asat li atseque, yu'un ta xcac'ot ta ilel ta stojol yantic banamil; ta xcac'be yilic ajvaliletic li abec'tal ti bu q'uexlal sba chava'ye.

⁶ Ta xcac' tal ic'ubal ta sba avac'ol; ta jsoques ac'oplal; ta jcomtsanot jech chac c'u cha'al c'a'ep.

⁷ Scotol li boch'o ta xilote ta xjatovic batel ta anil, jech chalic: ‘¡Li Ninivee ta xyavnaij o! ¿Boch'o to xu' chc'uxubin? ¿Bu ta jtatic boch'o chtal spatbe yo'nton?’, xiic.

⁸ ¿Me vo'ot xjelov to alequil jech chac c'u cha'al li lum Tebas te oy ta ti' uc'um Niloe? Yu'un setubil lec ta vo', ja' xa snacleb c'otem li vo'e, xchi'uc ja' xa coralton c'otem yu'un li nabe.

⁹ Li Etiopía xchi'uc Egiptoe ja' stsatsal yo'nton cha'ay, yu'un mu'yuc spajebal c'usi xu' yu'un; li Fut xchi'uc Libiae ja' spasoj ta co'ol yo'ntonic xchi'uc.

¹⁰ Pero laj ono'ox yich' chuquel batel ta yan banamil. Li ololetic yu'une laj yich' t'omesbel xch'utic ta chiquin xoraltic. Li viniquetic ti ich'bilic ta muq'ue la spasic canal tajimol xchi'uquic. Li jpasmantaletic yu'unique chucbil ibatic ta cadena.

¹¹ Ja' no'ox jech ec li vo'ote chavich' yacubtasel; ta xch'ay o avo'nton. Ta xlic anac' aba ta scoj li avajcontrae; chlic asa' boch'o chascoltaot.

¹² Li tsatsal coraltonetic avu'une ja' jech chc'ot jech chac c'u cha'al yunin sat higo; ti xlilet no'ox yalel me laj yich' lilinele.

¹³ Li avajsoldadotaque xco'laj xa xchi'uc antsetic chc'ot. Li sti' avosilale chjaman scotol sventa ch-och tal li avajcontrae. Li sbajubiltac ti lec tsotsique chc'ac' ta c'oc' scotol.

¹⁴ Lupo me ep ava'al ta sventa chacuxi ti c'alal te xa setubilote; chapano me lec apojobbail. Meltsano me lec li coralton avu'une; vots'o me lec, teq'uilano me lec li ach'ele; tsaco li smorteal ladrilloe.

¹⁵ Pero ta ono'ox xavich' chiq'uel ta c'oc'; te chayulesot o li espadae. Ac'o me bats'i epoxuc jech chac c'u cha'al c'ulub, ac'o me solel bolemoxuc jech chac c'u cha'al bilixetic, ta xculesot o ta j'ech'el jech chac c'u cha'al xve' c'ulubetic.

¹⁶ Solel laj avepajes li jchonolajeletic avu'une, xjelov to yepal jech chac c'u cha'al c'analetic ta vinajel. Co'olic jech chac c'u cha'al li c'ulubetic ti tstsac batel sve'elic, ti chvil batel xchi'uquique.

¹⁷ Li banquilaletic avu'une ja' jechic jech chac c'u cha'al c'ulubetic. Li banquilal soldadoetic avu'une ja' jechic jech chac c'u cha'al epal c'ulubetic, ti jun yo'nton te bo'olic ta coralton c'alal oy sique. Me iloc' li c'ac'ale, ta xvilic batel; mu boch'o sna' bu chbat.

¹⁸ “Ajvalil ta Asiria, ivayic li jchabichijetic avu'une; ibat xa ta ip li banquilaletic avu'une. Li ateclumale ta spuc sbaic batel ta vitsetic; mu'yuc xa boch'o tstsob sutel tal.

¹⁹ Mu'yuc bu xtaaj xpoxil o li atuch'emale; mu stac' poxtael o li ac'a'emale. Scotol li boch'o cha'yic c'u x'elan avocole xcuxet xa yo'ntonic, ta spac' sc'obic. Yu'un scotol laj yich' svocolic yu'un li achopolil ti mu'yuc spajebale”, xi li Muc'ul Diose.