Nahúm 1 - Bible in Tzotzil de Chenalhó with Deuterocanon

Li Diose ja' jpac-ajvalil stuc

¹ Li vun li'i ja' sc'oplal c'usi chc'ot ta pasel ta Nínive ti i'ac'bat yil li Nahúm liquem ta Elcose.

² Li Muc'ul Diose ja' Dios ti sna' x'it'ixaj yo'ntone, xchi'uc ja' jpac-ajvalil; ja' tspacbe sutel li boch'o chcontrainat yu'une, ta xilinta li yajcontrae.

³ Ta melel li Muc'ul Diose toj muc' yo'nton, pero toj ech'em svu'el; muc teuc no'ox tsts'icbe li boch'o oy smule. Li Muc'ul Diose te chanov ta tsatsal ic'al vo' xchi'uc ta sutub ic'; li toque ja' spucucal yacan.

⁴ Me ta sibtas li nabe, ta x'ul, jech ta x'ul scotol li uc'umetique. Li ts'i'laletic ta Basán, ta vits Carmeloe ta xtaquij scotol; li nichimetic ta Libanoe ta smats' scotol.

⁵ Li vitsetique ta xnic ta stojol li Diose, li bic'tal vitsetique ta x'ulan ta stojol. Li banamil xchi'uc scotol li cristianoetic te nacajtique ta xnic yu'un; sbejlijil banamil ta xnic ta stojol.

⁶ ¿Me oy boch'o xcuch yu'un c'alal me i'iline? ¿Me oy boch'o lec va'al chcom c'alal me itsan sc'ac'al yo'ntone? Li sc'ac'al yo'ntone ta spuc sba batel jech chac c'u cha'al c'oc', jech ta x'unijan scotol li ch'entique.

⁷ Li Muc'ul Diose toj lec yo'nton. Ja' stsatsal co'ntontic ti c'alal yorail oy tsots jvocoltique; ja' chchabi li boch'o ja' spatoj yo'ntonic ta stojole.

⁸ Yan li boch'o tscontrainique ta sves batel scotol jech chac c'u cha'al yip nojelal uc'um; ta snuts batel ta ic'al osil li yajcontrae.

⁹ ¿Me chanopic ti oy c'usi chopol chac'an chapasbeic li Muc'ul Diose? Li stuque j'ech'el ta x'ulesvan o. Mu'yuc boch'o xcuch yu'un chib velta.

¹⁰ Ac'o me ja' jechic jech chac c'u cha'al ch'ix ti solel xpech'oj sbae, ac'o me lec xu' yu'un cha'yic jech chac c'u cha'al jyacubel, pero ja' no'ox jech chc'aq'uic jech chac c'u cha'al jobel ti lec taquine.

¹¹ Nínive, vo'ot ta atojol iloc' li boch'o tsnop scontrain li Muc'ul Diose; ja' jun chopol jbijubtasvanej.

¹² Li Muc'ul Diose jech chalbe li steclumal Judae: “Ac'o me toj tsotsic, me toj epic li asiriaetique, pero ta xich'ic ulesel, j'ech'el chbatic o. Ac'o me laj to'ox cac'bot ep avocol, pero mu'yuc xa chacac'bot yan velta.

¹³ Li yabtejeb vacax xchucoj ta anuq'ue ta jlilin loq'uel; ta jtuch'be li cadenaetic xchucojot oe”, xut.

¹⁴ Li vo'ote, ajvalil ta Nínive, jech chal ta aventa li Muc'ul Diose: “J'ech'el ta xch'ay o ta alel abi, j'ech'el ta x'ul o ats'unubal. Te ta sna diosetic avu'un ta jlilin li c'usitic acuyojic ta dios ti pasbilic ta te', xchi'uc ta unijesbil taq'uine. Ja' te ta jmucot noxtoc, yu'un toj bats'i chopolot”, xi.

Laj yich' alel ti chlaj li lum Ninivee

¹⁵ Q'uelo avilic, le' xa xtal ta vitsetic li boch'o chtal yal lequil a'yeje, li boch'o chtal yal ti ta jta jun co'ntontique. Judá, nicuc no'ox q'uinetic avu'un; paso me li c'usitic avaloj chapase. Mu xa xtal stsacot o ta pleito li chopol cristianoetique, yu'un i'ulic xa o ta j'ech'el.