Miqueas 7 - Bible in Tzotzil de Chenalhó with Deuterocanon

Toj chopol c'usi tspasic li israeletique

¹ Ay, toj abul jba, yu'un ja' jechun jech chac c'u cha'al boch'o chbat xc'uxc'ulta li c'usi tulbil xae, ti chbat to sq'uel me oy to tsta li ts'usub ti c'alal tulbil xa'ox sat, ti c'alal pits'bil xa'ox ya'lele, pero mu'yuc xa jta jchojuc; me jbejuc sba sat ti ja' tsc'an co'ntone mu'yuc la jta.

² Me junuc mu'yuc xa boch'o jun yo'nton ta stojol Dios li' ta banamil; mu'yuc xa boch'o tuc' yo'nton yu'unic li cristianoetique. Ja' xa no'ox oy ta yo'ntonic milbail; Ja' xa no'ox tsnopic c'u x'elan ch-och ta pets' yu'unic li xchi'iltaquique.

³ Ja' xa no'ox yabtelic o spasel li c'usitic chopole: li banquilaletique ta persa tsc'an smotonic; li jchapanvanejetique ta taq'uin chchapanvanic; li boch'otic muc' chac' sbaique ja' xa no'ox tspasic li c'usitic tsc'an yo'ntonique, jech te ta soc o yu'unic li lume.

⁴ Li boch'o lec yo'nton yu'unique ja' jech chac c'u cha'al ch'ix c'otem; li boch'o tuc' yo'ntonic yilele ja' jech xchopolilic jech chac c'u cha'al pimilal ch'ixtic. Pero tsta sc'ac'alil ta xich'beic stojol smulic, jech chac c'u cha'al laj yal li jq'uel-osiletic yu'unic ta toyol, ja' li j'alc'opetique. Jech chlic capijuc sjolic o.

⁵ Ja' yu'un mu me xanaban aba ta stojol li boch'o lec xac'opan aba achi'uque; mu me xapat avo'nton yu'un li boch'o lec bij chavile. Q'uelo me aba ta stojol li achi'il ta vayele, maco me ave.

⁶ Li queremetique chlic sna'le li stotique, jech noxtoc li tsebetique chlic stoy sbaic ta stojol li sme'ique. Li alibaletique chlic scontrainic li sme'el'alibique; te no'ox chlic scontrain sbaic ta snailal stuquic.

⁷ Pero li vu'une ja' no'ox te chcac' o sat ta stojol li Muc'ul Diose; ja' no'ox ta jmala chiscoltaun li Diose, ja' li jcoltavanej cu'une. Li Dios cu'une ta ono'ox xiya'ibun li jc'ope.

Li Muc'ul Diose ta xac'be stsatsal yan velta li israeletique

⁸ Vo'ote, jcontrainvanej cu'uncutic, mu me xcuxetuc avo'nton ti oy jvocolcutic chavile. Ac'o me liyalcutic ta lum, pero ta jtam jbacutic totsel; ac'o me oyuncutic ta ic' osil, pero ja' saquil osil chc'ot cu'uncutic li Muc'ul Diose.

⁹ Tsots ilinem ta jtojolcutic li Muc'ul Diose, ja' yu'un ta jts'iccutic, yu'un jtaoj jmulcutic ta stojol ja' to me lic sva'an sba ta jpojelcutique, xchi'uc me la xchapan li jmulcutique. Chlic yac'uncutic ta sac osil, jech ta xquilcutic ti tuc' scotol c'usi tspase.

¹⁰ Me laj yil li jcontrainvanej cu'une, chlic q'uexovuc, ac'o me jech to'ox laj yalbun: “¿Bu oy li Muc'ul Dios avu'une?”, xiyutun. Ta to jq'uel ti pech'bil ta teq'uel chcom, jech chac c'u cha'al ach'eltic ta xoraltique.

¹¹ Jerusalén, ta to sta sc'ac'alil ta xich' cha'meltsanel lec li acoraltonale; ta xich' muq'uibtasel batel li sts'aquiltac avosilale.

¹² Ta sc'ac'alil le'e ta xtal ta atojol scotol: xlic tal ta Asiria c'alal to ta Egipto, xlic ta uc'um Nilo c'alal to ta uc'um Éufrates, xchi'uc c'alal to ta jujujot nabetic, xchi'uc c'alal to ta jujujot vitsetic.

¹³ Li banamile xch'ijan chcom ta scoj smul li jnaclumetique; ja' stojol li yabtelique.

Sc'opanel Dios sventa scoltael Israel

¹⁴ Dios cu'un, chabio me lec li ateclumale, maco me lec ta ate' li achijtaque; yu'un stuc no'ox te nacalic ta toyolaltic, li yaxal banamil ta spat xocone yantic boch'otic te nacalic. Ac'o sa' sve'elic ta Basán xchi'uc ta Galaad, jech chac c'u cha'al laj ono'ox apasbeic ta vo'onee.

¹⁵ Ac'bo yilic sq'uelubiltac atsatsal, jech chac c'u cha'al laj apasbe c'alal laloq'ues tal ta Egiptoe.

¹⁶ Yu'un jech ac'o yilic li yantic banamile, jech ac'o yalicuc ta q'uexlal ac'o me toj ech'em xu' yu'unic; jech ac'o macuc yeic, ac'o macuc xchiquinic.

¹⁷ Ac'o staic ta lo'el ts'u'ilum jech chac c'u cha'al quiletel chon, jech chac c'u cha'al yantic chon ti ta banamil xpatet chanovique. Ac'o niquicuc loq'uel tal ta xi'el ta yut xch'enic; ac'o t'elajeticuc ta xi'el, chnopajic tal ta atojol, vo'ot li Diosot cu'uncutique.

La sc'anbeic perdón Dios li israeletique

¹⁸ Mu'yuc yan Dios jech chac c'u cha'al vo'ot, ti chapasbe perdón, ti chach'aybe ta avo'nton smulic li scomelal ateclumale. Muc teuc no'ox stsoq'uet o avo'nton ta stojol, yu'un ja' oy ta avo'nton li c'uxubinvaneje.

¹⁹ C'uxubinuncutic to yan velta; muco ta banamil li jchopolilcutique; jipo batel c'alal ta xchac natil nab li jmulcutique.

²⁰ Ac'o jechuc o avo'nton ta sventa c'usi avalojbe li Jacobe, xchi'uc ac'o avac' li c'uxubinel ti avalojbe ono'ox li Abrahame, ja' li jmoltotcutic ta vo'onee, yu'un jech ono'ox avalojbe ta jamal.