Miqueas 6 - Bible in Tzotzil de Chenalhó with Deuterocanon

Tsots tsc'opan steclumal li Diose

¹ Li' ta orae a'yo ava'yic c'usi chal li Muc'ul Diose: “Licanic, bat c'anic pojel ta stojol li vitsetique; ac'o c'otuc yech'al aveic ta tseltseltic.

² Vitsetic, snaclebtac banamil ti lec tsots oyoxuque, a'yo ava'yic c'u x'elan chalbe smul steclumal li Muc'ul Diose, yu'un li Muc'ul Diose ta stsac ta c'op li steclumale; ta stsal sbaic xchi'uc li Israele.

³ Jech chal li Muc'ul Diose: “Jteclumal, ¿c'usi chopol laj calbot? ¿C'usi chopol la jpasbot? Tac'bicun tal ca'tic.

⁴ Vu'un laj quic'ot loq'uel tal ta Egipto; vu'un la jpojot loq'uel ti bu abul aba ta mozoinele; vu'un la jtac batel ta atojolic li Moisés, li Aarón, xchi'uc li Mariae.

⁵ Jteclumal, na'ic me c'usi la xchapan ta aventaic li ajvalil Balac ta Moabe, xchi'uc c'usi stac'ubil laj yal li Balaam xnich'on Beore. Jech noxtoc na'ic me c'u x'elan ti c'alal lajelovic tal ta Sitim xchi'uc ta Gilgale, yu'un jech ac'o ana'ic ti tsotsic c'usitic la jpas ta atojolic, vu'un li Muc'ul Diosune”, xi.

Sc'oplal c'usi tsc'an Dios ac'o spas li cristianoe

⁶ ¿C'usi xu' chquich' batel ta stojol li Muc'ul Diose? ¿C'usi xu' chquich' o ta muc' li Dios te oy ta toyole? ¿Me ja' chquich' batel ta stojol li matanal sventa chich' chiq'uele, o me ja' chquich'be batel li ch'ium vacaxetic ti jun to jabil svoq'uelique?

⁷ ¿Me ja' lec chil Muc'ul Dios me chcac'be ep ta mil chijetique? ¿Me ja' lec chil ti chcac'be jech yepal aceite jech chac c'u cha'al yepal ya'lel lajunmil uc'umetique? ¿O me ja' lec chil ti ta jmilbe sba jnich'on ta sventa stojol jmul xchi'uc ta sventa jtoyobbaile?

⁸ A'yo ava'ay, cristiano, li Muc'ul Diose yalojbot xa li c'usi lec xu' chapase, xchi'uc sc'anoj xa ta atojol li c'usi ac'o apase: ja' no'ox tsc'an ac'o apas li c'usitic tuq'ue, ti oyuc yutsil slequil avo'ntone, xchi'uc ti biq'uit ac'o avac' aba ta stojol Dios avu'un ta sventa li c'usitic chapase.

Chopol chil Dios li boch'otic mu'yuc tuc' c'usi tspasique

⁹ Li Muc'ul Diose ta x'avan tal ta stojol li lume; li boch'o ta xich' ta muq'ue ja' bij. Li Muc'ul Diose jech chal: “A'yo ava'yic c'usi chal li j'alc'ope xchi'uc li Boch'o t'ujbil yu'une:

¹⁰ Ta sna li chopol cristianoe oy c'ulejalil te oy ti ta chopol c'u x'elan laj yich' taele. Li sbisol te oy ti mu'yuc ts'acale ven chopol chquil.

¹¹ ¿Me xu' mu'yuc smul chquil li boch'o mu'yuc ts'acal skilo xchi'uc ti mu'yuc ts'acal chac' li c'usi tsbise?

¹² Li jc'ulejetic li' ta lume ja' puru j'uts'intavanejetic; li jnaclumetic li'i puru epalc'op chalic, ja' no'ox chtun ta sventa lo'lavanej li yoq'uique.

¹³ Ja' yu'un, vu'un ta xcac'bot tsots atoj amul; ta xcac'bot tsots avocol; ta jyavnaijesot o ta scoj li amule.

¹⁴ C'alal chave'e, mu'yuc chnoj ach'ut, jech te chavi'naj o chava'ay; ac'o me chata c'usi oy avu'un, pero mu xnac' avu'un, yu'un ta spoj li avajcontra c'alal chtal smiloxuc ta pleitoe.

¹⁵ Li c'usi chats'une mu'yuc chatsob. Ac'o me chaloq'uesbe yaceiteal li sat oliva avu'une, pero mu'yuc chatunes; ac'o me chapits'be ya'lel li ats'usube, pero mu'yuc chavuch' ya'lel ts'usub.

¹⁶ Yu'un ja' laj avich'be ta muc' smantal li Omrie, ja' laj achan c'u x'elan yabtel li smomnich'nab Acabe; ja' laj achan li c'usitic la spasique. Ja' yu'un ta jyavnaijesot o; na'lebilot chacom achi'uc li jnaclumetic avu'une. Chacuchbe o xq'uexlalic li jteclum cu'une”, xi li Diose.