Miqueas 5 - Bible in Tzotzil de Chenalhó with Deuterocanon

Ta Belén ta xloc' jun Jcoltavanej

¹ Jerusalén, seto aba lec ta coralton, yu'un joyibtabilot xa. Li jpasmantal ta Israele ta x'ac'bat tsots majel ta xocon sat.

² Vo'ot, Belén Efrata, biq'uitot ta scotol li jaychop sts'unubal Judae, pero ja' te ta xloc' ta atojol li Ajvalil yu'un Israele. Vo'one ono'ox sliquel tal sts'unubal.

³ Li' ta orae li Diose yictaoj comel li yu'untaque, pero ja' no'ox ti c'u sjalil sc'an xvoc' yol li ants ti sc'oplal tsvoq'ues jun olole. Jech chlic stsob sbaic tal yo' bu comen xchi'iltaquic li israeletic ti chucbilic batel ta yan banamile.

⁴ Li Ajvalil chtale ta stsatsal svu'el Muc'ul Dios ta xlic ventainvanuc jech chac c'u cha'al jun jchabichij; jech jun yo'nton chnaquiic li israeletique, yu'un li ajvalile ta xmuq'uib batel sc'oplal ta sbejel banamil.

⁵ Yu'un ja' chtal yac' jun o'ntonal. C'alal chtal stsacutic ta c'op li' ta cosilaltic li asiriaetique, c'alal chtal xpech'ic ta teq'uel li pasubmantaletic cu'untique, ta xlic jva'antic banquilaletic xchi'uc jpasmantaletic ti c'u yepal tsc'an ta sventa chbat scontrainic li asiriaetique.

⁶ Ta espada chbat tsalvanicuc ta yosilal li Asiriae; ta espada chbat sventainic li yosilal Nimrode. Ja' chiscoltautic loq'uel ta sc'ob li asiriaetic ti c'alal chtal scontrain li jlumaltique, ti c'alal chtal xpech'ic ta teq'uel li sts'aquiltac cosilaltique.

⁷ Li scomelal smomnich'nab Jacobe ja' jech chc'otic ta stojol yantic lum jech chac c'u cha'al job osil chac' tal li Muc'ul Diose, xchi'uc ja' jech chac c'u cha'al vo' chyal tal ta ts'i'laltic, mu ja'uc tsmalaic coltael yu'un li cristianoetique.

⁸ Li scomelal smomnich'nab Jacobe ja' jech chc'otic noxtoc ta stojol yantic lum jech chac c'u cha'al león ti c'alal te oy ta stojol yantic chonbolometique. Ja' jech chc'otic jech chac c'u cha'al león ta stojol jtsob chijetic ti ta ora tstsac me te chjelove, ti biq'uitic tsliline, ti mu jcotuc chcol yu'une.

⁹ Ja' jech ta stsal yajcontra li Israele; ja' jech ta xules scotol li boch'otic chopol yo'ntonic ta stojole.

¹⁰ Jech chal noxtoc li Muc'ul Diose: “C'alal me la sta li sc'ac'alil le'e, ta xcules scotol li ca'etic avu'une; ta jlajesbe sc'oplal scotol li caretaetic avu'une.

¹¹ Jech noxtoc ta jyavnaijes scotol li lumetic avu'une; ta jines scotol li tsatsal coraltonetic avu'une.

¹² Ta xcules noxtoc li j'ac'chameletic avu'une; mu'yuc xa jt'unuletic, j'ac'chameletic chcom avu'un.

¹³ Jech noxtoc ta jlilin li sloc'obaltac adios avich'oj ta muq'ue xchi'uc li tonetic acuyoj ta adiose; jech mu'yuc xa boch'o chlic yich' ta muc' li c'usitic pasbil ta ac'obique.

¹⁴ Ta jpits loq'uel ta atojol noxtoc li adios Asera te va'al avu'une, xchi'uc ta xcules o scotol li lumetic avu'une.

¹⁵ Ta jpacbeic sutel ta sc'ac'al co'nton li yantic banamil ti muc xch'unic li c'usi laj cale”, xi li Diose.